मतिक लिखल सुसमाचार 3 - चितवनिया थारुबप्तिस्मा देलाहर युहन्नाक सन्देस ( मरकुस १:१-८ ; लुका ३:१-१८ ; युहन्ना १:१९-२८ ) 1 किहो बरस पाछा बप्तिस्मा देलाहर युहन्ना यहुदियाक उराठ-ठउरियामा याके यसके परचार करे लगलिय, 2 “तोहरा यापन-यापन मनवा पापसे फिरोह, केहकेकि स्वरगक राज लजिके यासकल बडइ।” 3 यसइया अगमवक्तावा फेनि इहे युहन्नाक बारेमा यसके कहले बडिय, “उराठ-ठउरियामा कुनहुँ एक जन जबड स्वर निकडाके यसके कहइ बडिय, ‘परमप्रभुक तहिँया पइडा तयार पारह, हुनेक पइडावाह सोझ बनोह’।” 4 युहन्ना उटक रउक लुगा पेहरिय, ठेकनवामा छालाक फाड बन्हिय। उअ सलह हसे बन-मधुक रस खइय। 5 तखनहिँ यरुसलेम सहरवासे, जम्मे यहुदिया हसे यरदन लदिया छेतरक चारिवरसे मन्सावाह वकर लघिना यावे लगलइ, 6 हसे यापन-यापन पाप स्विकार करते हुनुका युहन्नासे यरदन लदियामा बप्तिस्मा लेलइ। 7 बाकि जब युहन्ना फरिसि हसे सदुकि दफवाक बहुत मन्सेसभके बप्तिस्मा लेवे यवइकि देखके हुनुकाके कहलिय, “अरे सपवाक बचवाह, कुने तोहराके यावे लगइकि परमेस्वरक दन्डसे बचेके चेतवनि देलिय? 8 तोहरा पापसे यापन-यापन मनवा फिरोले बडह जउँ, उहे यनुसार चलह। 9 ‘हमरा अब्राहमक सन्तान हखहुँ’ कहतेमा बचे सकबहुँ कहके झिन सोचिह। मुइ तोहराके कहइ बडहिँ, परमेस्वर इअ पत्थरवानिसे फेनि अब्राहमक तहिँया सन्तान जरमावे सकबसि। 10 गछवानिक जरियामा टङिया परिसकल बडइ। उहेसे डउल फर हइने फराह जम्मे गछवा काटके यगियामा फकेतइ। 11 “मुइ त तोहराके यापन-यापन पपवा मानके मनवा फिरोलेसे पनियामा बप्तिस्मा देइ बडहिँ, बाकि मोरसे पाछा यलहरवा तोहराके पवितर-आत्मा हसे यागिसे बप्तिस्मा देबसि। हुने मोरसे खाँ महान बडसि, मुइ त हुनेक चप्पलवा बोकेके फेनि लाइक हइने बडहिँ। 12 ओसउना सुपा हुनेक हथवामा बडइ। हुने यापन खरिहनवा साफा करबसि हसे यापन यनवा ओसाके धनसरवामा धरबसि, बाकि भुसवा कबहुँ फेनि हइने बुतइना यगियामा जरादेबसि।” येसुजिक बप्तिस्मा ( मरकुस १:९-११ ; लुका ३:२१-२२ ; युहन्ना १:३२-३४ ) 13 वकरपाछा येसुजि युहन्नासे बप्तिस्मा लेवेके तहिँया गालिल छेतरसे यरदन लदियामा यलसि। 14 बाकि युहन्ना हुनेके यसके कहके रोके खोजलिय, “मुइ यपनहुँसे बप्तिस्मा लेवे परतइ हसे कथि यपनहुँ मोर लघिना याइल बडहुँ?” 15 बाकि येसुजि वकरेके कहलसि, “यखनि यसने हखे देउ, केहकेकि परमेस्वरक जम्मे इछा पुरा करेके तहिँया हमरा यखनि यसने करे परतइ।” इअ बतवामा राजि हखके युहन्ना येसुजिके बप्तिस्मा देलिय। 16 येसुजि बप्तिस्मा लेसकले पर, हुने वइघरहिँ पनियासे वपरा यलसि, तखनहिँ स्वरग खोलेलइ हसे हुने परमेस्वरक आत्माके घुटुरि नहिँया यापनमा परइ देखलसि। 17 तब स्वरगसे एगुडा यसनुक स्वर यलइ, “इअ मोर सोगावल पुतर हखिय, यकरसे मुइ खाँ खुसि बडहिँ।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.