मतिक लिखल सुसमाचार 28 - चितवनिया थारुयेसुजिक पुनरुत्थान ( मरकुस १६:१-११ ; लुका २४:१-१२ ; युहन्ना २०:१-१८ ) 1 विसराम दिनक दोसरि दिन, यतोरवाक धुसमुसहि बिहनहिँ मरियम मग्दलिनि हसे दोसरि मरियम येसुजिक चिन्डिया हेरे गेलइ। 2 तखनहिँ यरमरका जबड भुइचाल यलइ, केहकेकि स्वरगसे परमप्रभुक एगुडा स्वरगदुत यलिय हसे चिन्डियाक दुवरियामा झपलि पत्थरवा होटाके वकर वपरा बेठलिय। 3 वकर मोहडवा बिजुलि नहिँया चहकार हसे लुगवा हिउँ नहिँया गोरहर रहलइ। 4 उअ चिन्डिया वगरलराह डरेसे दुलदुलइते भुयवामा भहडलइ हसे मरल नहिँया भेलइ। 5 बाकि स्वरगदुतवा उअ जनिनियासभके कहलिय, “झिन डेराह, मोर थाह बडइ, तोहरा क्रुसवामा टाङके मारलि येसुजिके खोजइ बडह। 6 येसुजि यहवाँ हइने बडसि, हुनेक कहलि नहिँया हुने जिउतल बडसि। तोहरा याके हुनेक देहिया धरलि ठउरिया हेरह न! 7 याबे हल-हालि जाके हुनेक चेलवानिके यसके कहिय, ‘प्रभु त मरलिसे जिउतल बडसि हसे हुने तोहारसे यागा गालिल जाइबडसि, तोहरा हुनेके वहवाँहिँ देखबह।’ मोर इअ कहलि बतवा याद करह।” 8 हुनुका वइघरहिँ चिन्डियासे निकडलइ। तब हुनुका डेरेलइ बाकि खाँ खुसि भके हुनेक चेलवानिके उअ बतवा कहेके तहिँया दगुरलइ। 9 जब हुनुका जाइ रहलइ, येसुजि हुनुकाके यरमरका भेटलसि हसे कहलसि, “तोहराके सान्ति हखइ।” तखनहिँ हुनुका येसुजिक टङवा पकडके हुनेके सेवा लगलइ। 10 तब येसुजि हुनुकाके कहलसि, “झिन डेराह, तोहरा जाके मोर चेलवानिके गालिलमा जायके कहदिह। हुनुका मोरके वहवाँहिँ देखतइ।” सिपहियावाह समाद पुगादेलइ 11 जब उअ जनिनियाह येसुजिक चेलवानिके समाद देवे जाइ रहलइ, तखनहिँ चिन्डिया वगरलहर कतेक जन सिपहियावाह सहरवावरि जाके चिन्डियामा घटलि जम्मे घटनवा मुख्य पुजेरियानिके कहदेलइ। 12 तब मुख्य पुजेरियाह मन्सावानिक यगुवावानिसाङे जामा भके सल्लाह करलइ। वकरपाछा हुनुका सिपहियवानिके बहुत पइसा देके, 13 “हमरा ‘राति निनाइखुनि येसुजिक चेलवाह याके वकर देहिया चोराके लिगलइ’ कहदिह कहके कहे लगोलइ, 14 यगर इअ बतवा रोमि बडकि हकिमवा सुनबिय, हमरा वकरसाङे बात मिलोबहुँ हसे तोहार कथियो गारह नाहिँ हतइ।” 15 उअ सिपहियावाह पइसा लेके मुख्य पुजेरियानि सिखोलि नहिँया कहलइ। इअ बतवा यहुदियानिक बिचा याजुलइ कहाइ बडइ। येसुजि चेलवानि लघिना परकट भेलसि ( मरकुस १६:१४-१८ ; लुका २४:३६-४९ ; युहन्ना २०:१९-२३ ; प्रेरित १:६-८ ) 16 वकरपाछा येसुजिक एगारह जन चेलवाह येसुजि जुन पहडावामा जायके कहले रहलसि हुनुका गालिलक उअ पहडावामा गेलइ। 17 जब हुनुका येसुजिके देखलइ, हुनेक यागा घोप्टे परलइ, बाकि कतेक जन चेलवाह “येसुजि हखसि कि हइने कहके?” सक करलइ। 18 तब येसुजि हुनुकर लघिना याके कहलसि, “हेरह, स्वरग हसे धरतियाक जम्मे अधिकार मोरके दियाइल बडइ। 19 याबे तोहरा जाके जम्मे जतियाक मन्सावानिके चेला बनोइह। तोहरा पिता, पुतर हसे पवितर-आत्माक नाउँमा हुनुकाके बप्तिस्मा दिह, 20 हसे मुइ तोहराके देलि जम्मे आग्या हुनुकाके पालन करेके सिखोइह। हेरह, मुइ संसारक वराटि दिनवालइ तोहारसाङे रहबहिँ।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.