मतिक लिखल सुसमाचार 20 - चितवनिया थारु

अंङगुरक बारिमा काम करलहरानिक दृस्‍टान्‍त

¹ येसुजि मन्‍सावानिके सिखोइखुनि यसके कहलसि, “स्‍वरगक राज एगुडा जागाक मालिक नहिँया हखइ, जुने यापन अंङगुरवाक बरियामा काम करावेके तहिँया काम करलाहर मन्‍से खोजे बिहनहिँ निकडलिय।

² उअ मलिकवा काम करलहरानिसाङे एक दिनक बनिहारि देबहिँ कहके सहमति करके हुनुकाके यापन अंङगुरवाक बरियामा काम करे पठोलिय।

³ नउ बजेवरि जब उअ बाहरा निकडलिय, कतेक जन मन्‍सेके बजरवामा वसहिँ ठडियाइल देखलिय।

⁴ तब उअ हुनुकाके कहलिय, ‘तोहरा फेनि मोर अंङगुरवाक बरियामा काम करे जाह हसे मुइ तोहराके पावे परना बनिहारि देबहिँ।’

⁵ उहेसे हुनुका काममा गेलइ। उअ मन्‍सावा फेरि बारह बजेवरि हसे तिन बजेवरि बाहरा निकडके जाके याको मन्‍सावानिके फेनि काममा लगोलिय।

⁶ वसने, पाँच बजेवरि फेरि उअ मन्‍सावा बाहरा यवइकि, याको मन्‍सावानिके फेनि वसहि ठडियाइल देखलिय। तब उअ हुनुकाके कहलिय, ‘तोहरा केहके वसहि दिन भर ठडियाइल बडह?’

⁷ हुनुका वकरेके कहलइ, ‘कुनहुँ फेनि हमराके बनिहारिमा हइने लगोइ बडइ।’ उअ हुनुकाके कहलिय, ‘तोहरा फेनि जाके मोर अंङगुरवाक बरियामा काम करह न त।’

⁸ “जब साँझ भेलइ, तब जगहवाक मलिकवा यापन काम करलहरानिक सिरदरवाके बलाके कहलिय, ‘काम करलहरानिके बलाके सबसे पाछा यलहरवासे लेके पहिला यलहरवानिके बनिहारि देहि।’

⁹ जब पाँच बजे काममा लगलि काम करलाहराह यलइ, हुनुका जम्‍मे जन एक दिनक बनिहारि पउलइ।

¹⁰ वकरपाछा, जब सबसे पहिला कमवामा यलहरवा यलइ, तब हुनुका बहुत बनिहारि पउबहुँ कहके विचार करलइ। बाकि हुनुका जम्‍मे जन फेनि एक दिनक बनिहारि मतरे पउलइ।

¹¹ हुनुका बनिहारि पउलेपर जगहवाक मलिकवाक विरोध करते

¹² यसके कहलइ, ‘इअ पाछासे यलहरवाह एक घन्‍टा मतरे काम करलइ हसे हमरा दिन भर घाममा मर-मरके काम करलहुँ। बाकि यपनहुँ हुनुकाके हमार बराबर दिनभरक बनिहारि देलहुँ।’

¹³ बाकि मलिकवा हुनुकरमधेसे एक जनके जवाफ देके यसके कहलिय, ‘सङहाति, मुइ यपनहुँके अन्याय हइने बडहिँ। कथि यपनहुँ मोरसाङे एक दिनक बनिहारिमा काम करबहि कहके राजि हइने रहलहुँ त?

¹⁴ यपनहुँ यापन पउलि बनिहारि लेके जाहुँ। इअ पाछासे यलहरवानिके फेनि मुइ यपनहुँक बराबर बनिहारि देवे खोजइ बडहिँ।

¹⁵ कथि मुइ यापन मन लगलि मन्‍सावानिके यपने पइसावा देवेके अधिकार मोर हइने बडइ? हसे मुइ दानि भेलेसे यपनहुँ केहके डाहे मरइ बडहुँ’?”

¹⁶ येसुजि याखिरमा यसके कहलसि, “उहेसे यखनि पहिला भेलहरवा बहुत जन पाछा हतइ हसे यखनि पाछा हखलहरा पहिला हतइ।”

येसुजि यापन मृत्‍युक बारेमा फेरि कहलसि

¹⁷ जब येसुजि यरुसलेमवरि जाइरहलसि, हुने यापन बारह जन चेलवानिके एकोरियाहे बलाके कहलसि,

¹⁸ “हेरह, हमरा यरुसलेम जाइबडहुँ। याबे मुइ मन्‍सेक पुतर मुख्‍य पुजेरियानि हसे व्‍यवस्‍थाक-गुरुसभक हथवामा सपेबहिँ। हुनुका मोरके मृत्‍यु दन्‍डक दोसि ठहरोतइ।

¹⁹ मोरके अयहुदियानिक हथवामा सपदेतइ। हुनुका मोर खिल्‍लि उडोतइ, मोरके कोडा लगोतइ हसे क्रुसवामा टाङदेतइ। बाकि तिसरि दिनवामा मुइ मरलिसे फेरि जिइ उठबहिँ।”

एगुडा दाओक बिन्‍ति

²⁰ वकरपाछा जब्‍दियाक बेटवाक दाओ, यापन बेटवाह, याकुब हसे युहन्‍नासाङे येसुजि लघिना यलिय। हुनुकर दाओ येसुजिक यागा ठेहुँनाके बिन्‍ति करलिय।

²¹ येसुजि वकरेके पुछलसि, “मुइ तोर तहिँया कथि करदेउ कहके तुइ बिन्‍ति करलहिँ?” तब उअ येसुजिके कहलिय, “यपनहुँक राजमा मोर इअ दु जन बेटवामधे एगुडाके यपनहुँक दहिनिकलहरावा हसे दोसरिके यपनहुँक लबडिकलहरवा बइठे देहुँ।”

²² बाकि येसुजि कहलसि, “तोहरा कथि मङइ बडह कहके तोहरा हइने जनसह। जुन कस्‍टक कचोरवा मुइ पिय जाइ बडहिँ, कथि तोहरा उअ पिय सकबह?” हुनुका कहलइ, “हमरा सकबहुँ।”

²³ तब येसुजि हुनुकाके कहलसि, “मोर कचोरवासे तोहरा पिय सकबह, बाकि मोर दहिने हसे लबडिकलहरवा बइठे देवेके अधिकार मोर हइने बडइ। इअ ठउरियाह हुनुकर तहिँया हखइ, जाकर तहिँया मोर पिता तयार पारले बडसि।”

²⁴ इअ सुनके, याको दस जन चेलवाह उअ दु जनसाङे खिसियलइ।

²⁵ बाकि येसुजि हुनुका जम्‍मे जनके बलाके कहलसि, “तोहार थाह बडइ कि, अयहुदि मन्‍सावानिक सासकसभ यापन परजावानिक वपरा मनपरि सासन चलोसइ हसे हुनुकर बडकि हकिमवाह हुनुकर तरक मन्‍सावानि वपरा यापन अधिकार जमोसइ।

²⁶ बाकि तोहार बिचा यसनुक झिन हखइ। तोहारमधे जुने महान हखे खोजबह, उअ तोहार याको जनक सेवक हखे परतइ,

²⁷ हसे जुने तोहारमधे सबसे पहिला हखे खोजतइ, उअ तोहार याको जनक दास हखे परतइ।

²⁸ वसने मुइ मन्‍सेक पुतर सेवा पावेके हइने, बरु सेवा करेके तहिँया हसे बहुत जनके छुटकारा देवेके तहिँया यपने प्रान देवे याइल हखहि।”

येसुजि दु जन यान्‍हर मन्‍सेके डउल बनोलसि

²⁹ जब येसुजि हसे हुनेक चेलवाह यरिहो सहरवासे जाइ रहलइ, तब एगुडा जबड मन्‍सेक भिड हुनेक पाछा लगलइ।

³⁰ तब पइडवाक तिरवामा दु जन यान्‍हर मन्‍से बइठल रहलइ। येसुजि उहे पइडवामाहे जाइबडसि कहके सुनके हुनुका यसके कहते चिलेलइ, “हे प्रभु, दाउदक पुतर, यपनहुँ हमराके दाया करहुँ!”

³¹ तब भिडवाक मन्‍सावाह हुनुकाके चुप लाग कहके डटलइ, बाकि हुनुका झन चिल्‍लाके कहलइ, “हे दाउदक पुतर, हमराके दाया करहुँ!”

³² तब येसुजि ठप्‍पे ठडियलसि हसे हुनुकाके बलाके कहलसि, “मुइ तोहार तहिँया कथि करदेहि कहके तोहरा चाहइ बडह?”

³³ हुनुका येसुजिके कहलइ, “हे प्रभु, हमार यखिया खोल देहुँ।”

³⁴ हुनुकाके देखके येसुजिक दाया लगलइ हसे हुनुकर यखिया छुदेलसि। वइघरहिँ हुनुका देखाह भेलइ हसे हुनेक पाछा लगलइ।