मतिक लिखल सुसमाचार 17 - चितवनिया थारु

येसुजिक भेस बदलाइलि

¹ इअ बतवा कहलिक छ दिन पाछा येसुजि पतरुस, याकुब हसे वकर भयवा युहन्‍नाके याको मन्‍सावानिसे छुटियाके यापनसाङे एगुडा उँच पहाडमा लेले गेलसि।

² पहडावा वपरा पुगलेपर चेलवाह हेरते-हेरते येसुजिक भेस बदलेलइ हसे हुनेक मोहडवा बेरिया नहिँया तके लुगवा बिजुलिक चहकार नहिँया गोरहर भेलइ।

³ तखनहिँ यरमरका अगमवक्‍ता मोसा हसे एलिया देखा परके येसुजिसाङे बात करे लगलइ।

⁴ इअ देखके पतरुस येसुजिके कहलिय, “प्रभुजि, हमरा यहवाँ भेल कतुरा डउल भेलइ! यगर यपनहुँ इछा करबहुँ जउँ, मुइ यहवाँ तिन गो छपरि बनोबहिँ, यपनहुँक तहिँया एगुडा, मोसाक तहिँया एगुडा हसे एलियाक तहिँया एगुडा!”

⁵ पतरुस फदकते-फदकते एगुडा चहकार बादर याके हुनुकाके झापदेलिय हसे उअ बदरियासे यसके कहके स्‍वर निकडलइ, “इअ मोर सोगावल पुतर हखिय, यकरसे मुइ खाँ खुसि बडहिँ। तोहरा यकर बतवा सुनिह।”

⁶ उअ स्‍वरवा सुनके चेलवाह डेराके भुयवामा घोप्‍टे परलइ।

⁷ बाकि येसुजि याके हुनुकाके छुलसि हसे यसके कहलसि, “उठह, झिन डेराह!”

⁸ तखनहिँ हुनुका वपरावरि हेरइकि, येसुजिके मतरे देखलइ।

⁹ जब हुनुका पहडावासे तर नभइ रहलइ, तब येसुजि हुनुकाके यसके आग्या देलसि, “तोहरा जथि देखलह उअ ककरहुँके फेनि झिन कहिह, जखनिलइ मुइ मन्‍सेक पुतर मरके फेरि नाहिँ जियबहिँ।”

¹⁰ तब चेलवाह येसुजिके पुछलइ, “एलियाके इअ धरतियामा ख्रिस्‍टसे पहिला यावे परतइ कहके व्‍यवस्‍थाक-गुरुसभ केहके कहसइ?”

¹¹ तब येसुजि जवाफ देके कहलसि, “हँ, सदियो, जम्‍मे चिजुवा ठिकठाक करेके तहिँया एलिया पहिलाहिँ यावे परतइ।

¹² बाकि मुइ तोहराके कहबहिँ, एलिया त यासकल बडिय, बाकि मन्‍सावाह वकरेके हइने चिनलइ। हुनुकर जथि मन लगलइ वकरेके उहे करलइ। वसने करके मुइ मन्‍सेक पुतर फेनि हुनुकर हथवामा परके दुःख भोगे परतइ।”

¹³ तब मतरे चेलवाह येसुजि बप्‍तिस्‍मा देलाहर युहन्‍नाक बारेमा कहले हखसि कहके बुझलइ।

येसुजि भुत-आत्‍मा लागल छउडके डउल बनोलसि

¹⁴ येसुजि यापन उअ तिन जन चेलवानिसाङे भिडवा भेलि ठउरियामा फिरके यइलेपर, एक जन मन्‍से हुनेक पाउ परते कहलिय,

¹⁵ “हे प्रभुजि, मोर बेटवाके दाया करहुँ, केहकेकि मिरगि रोग लगलेसे उअ खाँ दुःख पवइ बडिय। उअ कहियो यगियामा हसे कहियो पनियामा परसिय।

¹⁶ मुइ वकरेके यपनहुँक चेलवानिक लघिना यनलहिँ, बाकि हुनुका वकरेके डउल बनावे हइने सकलइ।”

¹⁷ येसुजि हुनुकाके कहलसि, “अरे अविस्‍वासि हसे हइलठ मन्‍सेसभ! मुइ तोहारसाङे कतेक दिन रहबहिँ हसे तोहराके कखनिलइ सहबहिँ? वकरेके यहवाँ यनह।”

¹⁸ तब येसुजि वकरमा भेलि भुतवाके डटलसि हसे उअ भुतवा छउडवासे निकडलिय तके उअ वइघरहिँ डउल भेलिय।

¹⁹ वकरपाछा चेलवाह चुपे-चुपे येसुजिके पुछलइ, “हमरा केहके उअ भुतवाके निकडावे हइने सकलहुँ?”

²⁰ येसुजि हुनुकाके कहलसि, “तोहारमा कम विस्‍वास भेलेसे हखइ। मुइ तोहराके सदियो कहबहिँ, यगर तोहारमा राइक एगुडा दाना नहिँया विस्‍वास हतइ जउँ, इअ पहडावाके ‘यहवाँसे हटके जाहि’ कहके कहबह जउँ, उअ हटके जेबिय हसे तोहरा जथि फेनि करे सकबह।

²¹ [बाकि यसनुक भुत त परथाना हसे उपाससे मतरे निकडावे सकेसइ।”]

येसुजि फेरि यापन मृत्‍युक बारेमा कहलसि

²² येसुजि यापन चेलवानिसाङे गालिल छेतरमा रहइखुनि, हुनुकाके यसके कहलसि, “मुइ मन्‍सेक पुतर दुस्‍ट मन्‍सावानिक हथवामा सपाए जाइ बडहिँ।

²³ हुनुका मोरके मारतइ, बाकि मुइ मरलिक तिन दिन पाछा फेरि जिइ उठबहिँ।” इअ बतवा सुनके चेलवाह खाँ दुःखित भेलइ।

मन्‍दिरक कर

²⁴ वकरपाछा, येसुजि हसे हुनेक चेलवाह कफरनहुम सहरवामा यापुगलेपर मन्‍दिरवाक कर उठोलहराह पतरुस लघिना याके पुछलइ, “तोहार गुरु मन्‍दिरवाक कर हइने तिरसिय?”

²⁵ तब पतरुस जवाफ देते कहलिय, “हँ, तिरससि।” जब पतरुस घरवामा पेसलिय, तब येसुजि वकरेके पुछलसि, “सिमोन, तोर विचार कथि बडइ? इअ संसारक रजवाह काकरसे कर उठोसइ? यापन बेटवानिसे कि दोसरे जनसे?”

²⁶ तब पतरुस जवाफ देते कहलिय, “दोसरे जनसे उठोसइ।” येसुजि वकरेके कहलसि, “वसके कहले, हुनुकर यपने बेटवासभ कर तिरे नाहिँ परतइ।

²⁷ बाकि हमरा हुनुकाके दुःख नाहिँ देउँ, उहेसे तुइ जाके तलवामा बनसि लगोसि हसे सबसे यागा बनसियामा बझलि मछरियाक मुहवा खोलसि। तुइ वकर मुहवामा एगुडा चाँनिक सिक्‍का पउबहि, उअ लिगाके तोर हसे मोर तहिँया कर तिरदेसि।”