हिब्रु 8 - चितवनिया थारु

येसुजि हमार प्रधान पुजेरि

¹ हमार कहे खोजल मुख्‍य बात इहे हखइ कि, हमार एक जन यसनुक प्रधान पुजेरि बडसि, जुने स्‍वरगमा महान परमेस्‍वरक सिंहासनक दहिनिकलहरवा जाके बेठल बडसि।

² हुने महापवितर ठउरियामा प्रधान पुजेरि भके सेवाक काम करससि, उहे चाहिँ सेवा करना यसल तम्‍बु हखइ। जुन मन्‍सावानिक बनावल हइने, बाकि प्रभु यपनहिँ बनोले हखसि।

³ जम्‍मे प्रधान पुजेरियाह परमेस्‍वरके भेटि हसे भोग चढावेके तहिँया नियुक्‍त भेल हसइ। उहेसे हमार प्रधान पुजेरिया फेनि परमेस्‍वरके किहो चिजु चढोहिँ परतइ।

⁴ यगर हुने इअ धरतियामा रहतसि त हुने पुजेरि नाहिँ हखतसि, केहकेकि व्‍यवस्‍थाक कहलि यनुसार भेटि चढोलहर पुजेरिसभ त पहिलहिँसे बडते बडइ।

⁵ पुजेरियानिक करना सेवा त स्‍वरगमा भेलि चिजुक नक्‍कल हसे छाहर मतरे हखइ। मोसा पवितर तम्‍बु बनावे लगोइकि परमेस्‍वरसे यसनुक आग्‍या पउले रहलिय, “हेरहि, पहडावामा तोरके देखोलि नमुना नहिँया तुइ जम्‍मे चिजु बनोसि।”

⁶ बाकि येसुजिक पउलि सेवाक काम याको पुजेरियानिक कामसे फेनि महान बडइ। वसने परमेस्‍वर हसे हुनेक मन्‍सेक बिचा येसुजिक बन्‍हलि लउठा करार पुरनि करारसे उतम बडइ, केहकेकि इअ करार झन उतम प्रतिग्यासभमा बन्‍हाइल बडइ।

⁷ यगर उअ पहिला करारमा गल्‍ति नाहिँ हतिय त दोसरो करार बाँन्‍हे नाहिँ परतिय।

⁸ बाकि परमेस्‍वर यापन मन्‍सावानिके दोस देखोते यसके कहलसि, “परमप्रभु कहससि, उअ दिन यवइ बडइ, जब इस्राएल हसे यहुदाक घरानासाङे मुइ एगुडा लउठा करार बन्‍हबहिँ।

⁹ इअ करार हुनुकर पुरखावानिसाङे बन्‍हलि करार नहिँया नाहिँ हतइ, जब मुइ हुनुकर हथवा पकडके मिस्र देसवासे निकडाके यनलहिँ, परमप्रभु कहलसि, हुनुका मोर बन्‍हलि करार भङ करलइ, उहेसे मुइ हुनुकर वास्‍ता हइने करलहिँ।

¹⁰ परमप्रभु कहससि, यावेवाला दिनवामा मुइ इस्राएलक मन्‍सावानिसाङे लउठा करार बन्‍हबहिँ। हुनुकर मनवामा मुइ मोर व्‍यवस्‍था राख देबहिँ, हुनुकर हृदयमा उअ लिख देबहिँ। मुइ हुनुकर परमेस्‍वर हखबहिँ, हसे हुनुका मोर परजा हतइ।

¹¹ तखनहिँ कुनहुँ फेनि ‘परमप्रभुके चिनह’ कहके यापन पोरसियवाके कि यापन नतदरवाके सिखावे नाहिँ परतइ, केहकेकि छोटेसे लेके जबडलइ जम्‍मे जन मोरके चिनतइ।

¹² केहकेकि मुइ हुनुकर करलि दुस्‍ट काम छमा करदेबहिँ, हसे हुनुकर पाप मुइ फेरि कबहुँ नाहिँ सम्‍झबहिँ।”

¹³ परमेस्‍वर इअ करारके “लउठा करार” कहलेसे हुने पहिला बन्‍हलि करारके पुरान ठहरोलसि। उअ करार किहो काम हइने लागके नास भके जेतइ।