प्रेरित 25 - चितवनिया थारुफेस्तसक यागा पावल 1 फेस्तस बडके हाकिम भके यापन छेतर यहुदियामा यइलिक तिन दिन पाछा उअ कइसरियासे यरुसलेममा गेलिय। 2 वहवाँ मुख्य पुजेरियाह हसे यहुदि यगुवासभ याके वकर यागा पावलक विरोधमा अभियोग यनलइ हसे 3 पावलक मुदाक कारवाहि करेके तहिँया पावलके यरुसलेममा पठादेवेके तहिँया फेस्तससाङे बिन्ति करलइ। केहकेकि हुनुका वकरेके पइडवाहिमा मारेके तहिँया जाल रचइ रहलइ। 4 बाकि फेस्तस हुनुकाके कहलिय, “पावल त कइसरियाक झ्यालखनवा बडिय हसे मुइ फेनि वहवाँ हल-हालि जाइ बडहिँ। 5 तोहारमधे अधिकार भेल कतेक जन यगुवासभ मोरसाङे यउह हसे यगर पावल किहो गल्ति करले बडिय जउँ, हुनुका वहवाँहिँ वकर विरोधमा अभियोग याने सकतइ।” 6 वकरपाछा फेस्तस लगभग आठ-दस दिनलइ हुनुकरसाङे यरुसलेममा रहके, कइसरियामा फिरलिय। वकर दोसरि दिन उअ अदालतक न्याय आसनमा बइठके पावलके वहवाँ यानेके आग्या देलिय। 7 जब पावल वहवाँ यलिय, तब यरुसलेमसे यइलि यहुदिसभ पावलक चारिवर ठडियाके वकर विरोधमा बहुत दोस लगोलइ। बाकि एगुडा फेनि दोसवाक परमान हुनुका देवे हइने सकलइ। 8 तब पावल यापन पछमा फदकते यसके कहलिय, “मुइ न त यहुदियानिक व्यवस्थाक विरोधमा न मन्दिरवाक कि रोमि सरकारक विरोधमा किहो गल्ति करले बडहिँ।” 9 बाकि फेस्तस यहुदियानिके खुसि पारेके तहिँया पावलके कहलिय, “कथि तोर वपरा लगोलि इअ मुदवाक कारवाहि मोर यागा यरुसलेममा हखइ कहके तुइ इछा करइ बडहि?” 10 तब पावल कहलिय, “मुइ रोमि सरकारक अदालतक यागा ठडियाइल बडहिँ हसे यहवाँहिँ मोर न्याय हखे परतइ। मुइ यहुदियानिक विरोधमा किहो खराब काम हइने करले बडहिँ कहके यपनहुँक फेनि डउलसे थाह बडइ। 11 यगर मुइ मृत्यु दन्ड पावेके लाइक किहो दोस करले बडहिँ जउँ, मुइ मरेके फेनि तयार बडहिँ। बाकि यहुदियानिक लगोलि इअ दोसवाह झुठा बडइ जउँ, कुनहुँ फेनि मोरके हुनुकर हथवामा सपे नाहिँ सकतइ। मुइ रोमि सम्राट कइसरके बिन्ति करबहिँ।” 12 तब फेस्तस यापन सल्लाह देलहरवानिसाङे सर-सल्लाह करके पावलके कहलिय, “तुइ कइसरक यागा बिन्ति करलेसे याबे मुइ तोरके कइसर लघिना पठादेबहिँ।” फेस्तस अग्रिपास रजवासाङे सर-सल्लाह लेलिय 13 किहो दिन पाछा राजा अग्रिपास हसे वकर बहिनिया बरनिकि फेस्तसके स्वागत करेके तहिँया कइसरियामा यलइ। 14 हुनुका वहवाँ बहुत दिन रहलेपर फेस्तस रजवा अग्रिपासके पावलक बारेमा कहलिय, “यहवाँ फेलिक्सक थुनके धरल एक जन कइदि बडिय। 15 जब मुइ यरुसलेममा रहलहि, तखनहिँ मुख्य पुजेरियाह हसे यहुदि यगुवासभ वकर विरोधमा अभियोग यानके दन्डक तहिँया बिन्ति करलइ। 16 बाकि मुइ हुनुकाके कहलहिँ जखनिलइ दोस लगोलि मन्सावा दोस लगोलहरानिक यामने-सामने भके यापन पछमा सफाइ देवेके मउका हइने पउले बडिय, तखनिलइ रोमि सरकारक चलन यनुसार दोस लगोलि मन्सावाके दोसरे जनक हथवामा सपे हइने सकिय। 17 उहेसे, जब दोस लगोलहराह यहवाँ यलइ, तब मुइ देरि हइने करके दोसरि दिन पावलके अदालतमा यानेके हुकुम देलहिँ। 18 जब पावलक दोस लगोलहराह ठडियाके वकर विरोधमा अभियोग यनलइ, हुनुका मोर सोचलि नहिँया किहो गम्भिर दोस लगावे हइने सकलइ। 19 बरु हुनुकर यपने धरम हसे येसु कहल एक जन मरलि मन्सावाक बारेमा ठोरा-बोलि रहलइ। बाकि येसुजि यखनि फेनि जिउते बडसि कहके पावल दाबि करइ रहलिय। 20 इअ जम्मे बिसयक बारेमा कस्के अनुसन्धान करे सकबहि कहके मुइ यलमलेलहिँ। उहेसे मुइ वकरेके पुछलहिँ, ‘कथि तोर इअ मुदवाक कारवाहि यरुसलेममा जाके करे चाहबहि?’ 21 बाकि पावल रोमि सम्राट इअ मुदवाक फइसला करइलइ, मोरके झ्यालखनवा रहे देहुँ कहके बिन्ति करलिय। उहेसे मुइ रोमि सम्राट कइसर लघिना हइने पठोइलइ वकरेके झ्यालखनवामा राखेके हुकुम देलहिँ।” 22 इअ सुनके, राजा अग्रिपास फेस्तसके कहलिय, “मुइ इअ मन्सावाक बतवा यपनहिँ सुने खोजइ बडहिँ।” तब फेस्तस कहलिय, “यनदिने यपनहुँ वकर बात सुनबहुँ।” पावल राजा अग्रिपासक यागा 23 उहेसे दोसरि दिन अग्रिपास हसे बरनिकि धुमधामसे सभाभवनमा याके सेनापतियाह हसे सहरवाक गन्यमान्य मन्सावानिसाङे बेठलइ। तब फेस्तस पावलके यानेके हुकुम देलेसे वकरेके सभामा यनलइ। 24 वकरपाछा फेस्तस कहलिय, “माननिय राजा अग्रिपास हसे यहवाँ जामा भेल जम्मे गन्यमान्य मन्सेसभ, यपनहुँ जम्मे जन इअ मन्सावाके देखइ बडहुँ। यरुसलेम हसे यहवाँक जम्मे यहुदियाह यकरेके मारे परतइ कहके यकर विरोधमा मोर लघिना उजुरि करले बडइ। 25 बाकि इअ मन्सावा मृत्यु दन्ड पावेके लाइक किहो खराब काम करले मुइ हइने पउलहिँ हसे इअ यपनहिँ रोमि सम्राटके बिन्ति करलेसे, मुइ वकर लघिना पठावेके निरनय करलहिँ। 26 बाकि मुइ यकर बारेमा सम्राटके कथि लिखके पठाउ त? उहेसे यकरेके जाँचके यकर बारेमा लिखेके तहिँया किहो बात पावे सकहि कहके मुइ यकरेके यपनहुँ हसे खास करके राजा अग्रिपासक यागा यनले बडहिँ। 27 केहकेकि एगुडा कइदिक विरोधमा किहो अभियोग हइने देखाके, वकरेके सम्राटक लघिना पठावेके मोर हइने डउल लगलइ।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.