प्रेरित 17 - चितवनिया थारुपावल हसे सिलास थेसलोनिके सहरवामा 1 वकरपाछा पावल हसे सिलास अम्फिपोलिस हसे अपोल्लोनिया सहरवामा हखते थेसलोनिके सहरवामा यलइ। वहवाँ यहुदियानिक एगुडा सभाघर रहलइ। 2 पावल यापन बनिया यनुसार लगातार तिन विसरामक दिनलइ सभाघरवामा जाके धरमसास्तरवासे हुनुकरसाङे छलफल करलिय। 3 उअ धरमसास्तरवामा लिखइलि बतवा बुझादेलिय हसे ख्रिस्टके दुःख भोगे परतइ हसे मरलिसे फेरि जिउते हखे परतइ कहके परमानित करदेलिय। उअ हुनुकाके इअ फेनि कहलिय, “मुइ जुन येसुजिक बारेमा परचार करइ बडहिँ, हुनेहिँ ख्रिस्ट हखसि।” 4 वकर कहलि बतवामा विस्वास करके कतेक जन यहुदिसभ पावल हसे सिलासक नहिँया प्रभुक चेला भेलइ। यसने परमेस्वरक डर मनलाहर बहुत ग्रिक जातिक मन्सेसभ हसे नाउँ चलल जनियानिसभ फेनि हुनुकरसाङे मिललइ। 5 बाकि कतेक यहुदिसभ खिस करलइ हसे बजरवाक बदमास मन्सावानिके बटियाके सहरवामा हुलदाङा करे लगोलइ। हुनुका पावल हसे सिलासके भिडवाक यागा यानेके तहिँया यासोनक घरवावरि दगुरके गेलइ। 6 बाकि हुनुका पावल हसे सिलासके वहवाँ हइने पउलेसे यासोन हसे याको विस्वासिसभके घिसियउते सहरवाक हकिमवानिक लघिना लिगलइ हसे जबड माहे चिल्लाके यसके कहलइ, “संसारके उलटपलट पारलाहर इअ मन्सावाह यहवाँ फेनि याइल बडइ। 7 यासोन हुनुकाके यापन घरवामा धरले रहलिय। हिनिका रोमि सासकक हुकुम हइने मनइ हसे येसु नाउँक एगुडा दोसरे राजा बडसि कहके कहसइ।” 8 इअ बतवा सुनके मन्सावाह हसे सहरवाक हकिमवाह यतियलइ। 9 याखिरमा हकिमवाह यासोन हसे वकरसाङे भेलि याको मन्सावानिसे धरउटि लेके हुनुकाके छाड देलइ। पावल हसे सिलास बेरिया सहरवामा 10 रात भेलेपर विस्वासिवाह पावल हसे सिलासके बेरिया सहरवामा पठादेलइ। हुनुका वहवाँ पुगके यहुदियानिक सभाघरवामा गेलइ। 11 वहवाँक मन्सावाह थेसलोनिके सहरवाक मन्सावानिसे डउल विचारक रहलइ, केहकेकि हुनुका पावलक कहलि बतवा खाँ खुसिसे गरहन करलइ हसे इअ जम्मे बतवा सदियो हखइ कि हइने कहके सबदिन परमेस्वरक वचन पढके जचइ। 12 उहेसे बहुत यहुदिसभ प्रभुमा विस्वास करलइ। हुनुका मतरे हइने बाकि उँच घरानाक ग्रिक जनियानि हसे मरदाना मन्सेसभ फेनि प्रभुमा विस्वास करलइ। 13 बाकि जब पावल बेरिया सहरवामा जाके परमेस्वरक वचन परचार करसिय कहके थेसलोनिकेक यहुदिसभ थाह पउलइ, हुनुका वहवाँ फेनि जाके मन्सावानिके पावलक विरोधमा उस्काके सहरवामा हुलदाङा करे लगलइ। 14 उहेसे वहवाँक विस्वासिवाह वइघरहिँ पावलके समुनदरवाक तिरवावरि पठादेलइ, बाकि सिलास हसे तिमोथि वहवाँहिँ रहलइ। 15 जुन मन्सावाह पावलके पुगावे गेल रहलइ, हुनुका वकरेके एथेन्स सहरवालइ लिगलइ। हुनुका वहवाँसे फिरके यवइकि पावल हुनुकाके “सिलास हसे तिमोथिके सकभर हल-हालि मोर लघिना पठादिह।” कहके समाद देलिय हसे वकरपाछा हुनुका वहवाँसे पावलक उअ समाद लेके बेरियामा फिरलइ। पावल एथेन्स सहरवामा परचार करलिय 16 जब पावल, सिलास हसे तिमोथिके एथेन्स सहरवामा इसियाइ रहलिय, तब उअ सहरवामा बहुत मुरतिसभ देखके उअ दुःखित भेलिय। 17 उहेसे उअ सभाघरवामा जाके यहुदियानिसाङे हसे परमेस्वरक डर मनलाहर ग्रिक जतियाक मन्सावानिसाङे येसुजिक बारेमा छलफल करिय। उअ सबदिन बजरवाक मुख्य चोकवामा जाके वहवाँ यइलि-गेलि मन्सावानिसाङे फेनि छलफल करिय। 18 तखनहिँ इपिक्युरि हसे स्तोइकि विद्धवानसभ फेनि पावलसाङे ठोरा-बोलि करलइ। हुनुकरमधेसे कतेक जन यसके कहलइ, “इअ फलफलियावा कथि कहइ बडिय?” तब याको जन कहलइ, “इअ त कुनहुँ विदेसि देवतावानिक बारेमा परचार करलिय,” हुनुका यसके कहलइ केहकेकि पावल प्रभु येसुजिक हसे हुनेक पुनरुत्थानक बारेमा परचार करलिय। 19 तब हुनुका पावलके अरियोपागसक कचहेरियामा लिगाके पुछलइ, “कथि यपनहुँक परचार करलि इअ लउठि सिछाक बारेमा हमरा जाने सकबहुँ? 20 केहकेकि यपनहुँ हमराके कबहुँ हइने सुनल एगुडा लउठा बात सुनोइ बडहुँ। उहेसे हमरा यकर बारेमा जाने खोजइ बडहुँ।” 21 केहकेकि एथेन्स सहरवाक मन्सावाह हसे वहवाँ रहलहरा जम्मे विदेसियाह याको कामसे फेनि बहुते समय लउठा-लउठा बात कहेके हसे सुनेके जुन बितोइ। 22 तब पावल अरियोपागसक कचहेरियाक बिचा ठडियाके कहलिय, “हेरहुँ, एथेन्स सहरवाक मन्सावाह, यपनहुँसभ खाँ पुजा-पाठ करसहुँ कहके मुइ थाह पउलहिँ। 23 केहकेकि इअ सहरवामा घुमफिर करइखुनि, मुइ तोहार पुजा करना ठउरिया फेनि देखलहिँ। एगुडा ठउरिमा भोग चढोना वेदियामा त झन ‘हइने चिनल देवताक तहिँया’ कहके लिखल रहलइ। यपनहुँसभ जकरेके हइने चिनके पुजा करसहुँ, मुइ वकर बारेमा याजु यपनहुँसभक यागा परचार करबहिँ। 24 जुन परमेस्वर इअ संसार हसे वकरमा भेलि जम्मे चिजु बनोलसि, हुने स्वरग हसे धरतियाक प्रभु भके, मन्सावानिक हथवासे बनोलि मन्दिरवामा बास हइने करससि। 25 हुनेके मन्सावानिसे किहो चिजु चाहिँ नाहिँ लगतइ, केहकेकि हुनेसाङे जम्मे चिजु बडइ। हुनेहिँ मन्सावानिके जिवन, प्रान हसे जम्मे चिजु देससि। 26 हुने एक जन मन्सेसे संसारमा रहेके तहिँया जाति-जातिसभ बनोलसि हसे हुनुकर जियना समय तके रहना ठउरि फेनि यगाहेसे तोकदेले बडसि। 27 मन्सावाह परमेस्वरके खोजइ हसे टो-छुके पावे सकइ कहके परमेस्वर यसके करले बडसि। ताफेनि हुने हमरा ककरोसे फेनि तनाउ हइने बडसि। 28 केहकेकि ‘हुनेमा हमरा जियसहुँ, बुलसहुँ हसे हमार अस्तित्व फेनि हुनेमा बडइ।’ जसने यपनहुँसभक कतेक कविसभ फेनि यसके कहले बडसि, ‘हमरा फेनि हुनेक सन्तान हखहुँ।’ 29 “हमरा परमेस्वरक सन्तान भेलेसे, परमेस्वर मन्सावानिक कल्पना हसे हथवाक कलासे बनावल सोन, चाँनि कि पत्थराक मुरति नहिँया हखसि कहके नाहिँ सोचुँ। 30 बितलि जुनवामा, मन्सावानि अनजानमा करलि गल्तिसभके परमेस्वर वास्ता हइने करलसि, बाकि याबे हुने जम्मे ठउरियाक जम्मे मन्सावानिके पछताप करेके तहिँया आग्या देले बडसि। 31 केहकेकि संसारक जम्मे मन्सावानिक न्याय करेके तहिँया हुने एक दिन तोक सकले बडसि हसे उअ दिन हुने यपनहिँ छानलि एक जनसे धारमिकतामा न्याय करबसि। उअ मन्सावाक न्याय करेके अधिकार बडइ कहके जम्मे मन्सावानिके परमान देवेके तहिँया परमेस्वर हुनेके मरलिसे फेरि जिउतोले बडसि।” 32 जब हुनुका मन्सावा मरके फेरि पुनरुत्थान हसइ कहके पावलसे सुनलइ, तब कतेक जन वकरेके ठाठा करलइ। बाकि याको जन कहलइ, “यकर बारेमा हमरा पाछे फेरि तोरसे सुनबहुँ।” 33 वकरपाछा पावल हुनुकरसे बिदा भेलिय। 34 बाकि कतेक जन पावलक कहलि बतवा गरहन करके प्रभु येसुजिमा विस्वास करलइ। हुनुकरमधे अरियोपागसक कचहेरियाक सदस्य डियनुसियस, दामारिस नाउँक एक जन जनियानि हसे याको बहुत जन फेनि रहलइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.