प्रेरित 12 - चितवनिया थारुपतरुस झ्यालखनवामा 1 उहे दिनवामा हेरोद अग्रिपा रजवा मन्डलियाक कतेक जनके पकडके दुःख देवे लगलिय। 2 उअ युहन्नाक दादा याकुबके तरवारसे मारे लगोलिय। 3 जब हेरोद रजवा यहुदियाह इअ कमवामा खुसि भेलइ कहके देखलिय, उअ पतरुसके फेनि पकडलिय। (तखनहिँ अखमिरि रोटि खाएके पबनिक जुन रहलइ।) 4 तब उअ पतरुसके पकडके झ्यालखनवामा थुनदेलिय हसे पतरुसके वगरेके तहिँया चार-चार जनक सिपाहिक चार दाफा बनाके सिपहियवानिके सपदेलिय। निस्तार-पाबनि वरइलेपर मन्सावानिक यागा यानके पतरुसके न्याय करेके तहिँया उअ विचार करइ रहलिय। 5 यसने पतरुस झ्यालखनवामा धरेलिय, बाकि मन्डलियाक मन्सावाह वकर तहिँया एक मन भके परमेस्वरसे परथाना करइ रहलइ। 6 हेरोद रजवा वकरेके मन्सावानिक यागा यनलि दिनवाक यागाक राति पतरुस दु गो सिकरिसे बान्हके दु जन सिपहियवानिक बिचा सुतल रहलिय हसे याको सिपहियवा फेनि झ्यालखनवाक दुवरियामा वगरइ रहलइ। 7 तब यरमरका प्रभुक एगुडा स्वरगदुत देखार परलसि हसे कोठवामा इजोर चम्कलइ। स्वरगदुतवा पतरुसके कोखवामा ठोकते “हलहालि उठहि” कहके उठोलिय। तब वकर हथवाहमा बान्हलि सिकरियाह फुचलइ। 8 वकरपाछा स्वरगदुतवा वकरेके कहलिय, “लुगवा हसे चप्पलावा पेहरहि।” तब पतरुस वसने करलिय। स्वरगदुतवा फेरि कहलिय, “चदरिया होरके मोर पाछा याउ।” 9 उहेसे पतरुस स्वरगदुतवाक पाछा-पाछा झ्यालखनवासे बाहरा यलिय। बाकि स्वरगदुतवाक करलि इअ कमवा सदियो हखइ कहके वकर थाह हइने रहलइ, बाकि उअ दर्सन देखइ बडहिँ कहके सोचलिय। 10 जब पतरुस हसे स्वरगदुतवा पहिला हसे दोसरि वगरलि दफवा कटके सहरवा भितरा यइना लोहवाक मुलदुवरियामा यलइ, उअ दुवरिया यपनहिँ खुललिय हसे हुनुका बाहरा निकडलइ। हुनुका निकडके एगुडा गलियावामा जाइकि स्वरगदुतवा पतरुसके छाडके गेलिय। 11 जब पतरुसक होस खुललइ, उअ यसके कहलिय, “याबे मुइ थाह पउलहिँ, कि परमप्रभु यापन स्वरगदुतवाके पठाके हेरोद रजवा हसे यहुदि यगुवासभ करे खोजलि जम्मे खराब कमवासे मोरके छुटकारा देलसि।” 12 इअ बतवा थाह पउलेपर, उअ मरकुस कहल युहन्नाक दाओ मरियमक घरवामा गेलिय। वहवाँ बहुत जन बटियाके परथाना करइ रहलइ। 13 जब पतरुस दुवरियामा ढोकढोकलिय, रोदा नाउँक एक जन कमारि छउडि दुवरिया खोले यलिय। 14 जब उअ पतरुसक स्वरवा चिनलिय, तब खुभे खुसि भके दुवरिया हइने खोलके दगुरते भितरा जाके कहलिय, “पतरुस दुवरियामा ठडियाइल बडिय।” 15 बाकि हुनुका वकरेके कहलइ, “कथि तुइ पगलाइ बडहि?” बाकि इअ बतवा सदियो हखइ कहके उअ जोड देके कहलिय। तब हुनुका कहलइ, “उअ पतरुसके हेरविचार करलाहर स्वरगदुत हखबिय।” 16 तखनहिँ पतरुस दुवरिया ढोकढोकोते रहलिय। जब हुनुका दुवरिया खोललइ, तब वकरेके देखके हुनुका छक परलइ। 17 बाकि पतरुस हुनुकाके चुप रहेके तहिँया हथवा बतलाके प्रभु वकरेके झ्यालखनवासे कस्के छुटकारा देलसि कहके हुनुकाके कहदेलिय। उअ “इअ बतवा याकुब हसे याको विस्वासियवानिके फेनि कहदिह” कहके कहलिय। वकरपाछा उअ वहवाँसे दोसरे ठउरिमा गेलिय। 18 बिहान भेलेपर, पतरुसके कथि भेलइ कहके सिपहियवानिक बिचा जबड खलबल भेलइ। 19 तब हेरोद रजवा वकरेके खोजेके हुकुम देलिय, बाकि सिपहियावाह वकरेके कहहुँ फेनि हइने पउलइ। उहेसे उअ वगरलहरानिके जम्मे केरकार करलिय हसे हुनुकरसे किहो जवाफ हइने पउलेसे हुनुकाके मृत्यु दन्ड देलिय। वकरपाछा हेरोद यहुदियासे कइसरिया सहर गेलिय हसे वहवाँहिँ रहलिय। हेरोद रजवाक मृत्यु 20 उहे जुनवामा हेरोद रजवा टुरोस हसे सिदोनक मन्सावानिसाङे खाँ खिसियाइल रहलिय। उहेसे उअ दुन्हु सहरवाक नेतवाह एक भके बलस्तस कहल हेरोदक एगुडा विस्वासिलो सेवकके मनाके हेरोदसाङे मेलमिलाप करेके तहिँया बिन्ति करे खोजलइ, केहकेकि हेरोदक देसवासे हुनुकर देसवामा यन्न यवइ। 21 एगुडा तोकलि दिनवामा, हेरोद रजवा यापन राजकिय लुगवा पेहरके राजगद्विमा बइठलिय हसे हुनुकर यागा भासन करलिय। 22 तब मन्सावाह जबड माहे चिलइते कहलइ, “इअ त मन्सेक फदक हइने हखइ, बरु देवताक फदक हखइ।” 23 तखनहिँ यरमरका प्रभुक एगुडा दुत वकरेके ठोकलिय, केहकेकि उअ परमप्रभुके महिमा हइने देलिय। तब उअ किरा परके मरलिय। 24 बाकि परमेस्वरक वचन फइललइ हसे विस्वासिक संख्या फेनि बढते गेलइ। 25 बारनाबास हसे साउल यरुसलेममा यापन सेवा पुरा करलेपर, हुनुका मरकुस कहल युहन्नाके लेके एन्टिओखिया सहर फिरलइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.