२ कोरिन्‍थि 13 - चितवनिया थारु

अन्‍तिम चेतवनि

¹ मुइ तोहार लघिना तिसरि पारि यवइ बडहिँ। धरमसास्‍तरवाक नियम यनुसार, “दु कि तिन जन साछिसभक गवाहिसे मतरे कुनहुँ फेनि बात सदि कहके साबित हसइ।”

² दोसरि पारि तोहार लघिना यवइकि तोहराके चेतवनि देले नहिँया याबे तोहारसे तनाउ रहइकि फेनि मुइ तोहराके चेतवनि देइ बडहिँ। मुइ फेरि यवइकि पहिला पाप करलहरानिके हसे याको ककरहुँके फेनि बाँकि नाहिँ छडबहिँ।

³ तखनहिँ ख्रिस्‍ट मोरसे फदकससि कि हइने कहके तोहरा परमान पउबह। तोहारसाङे व्‍यबहार करइकि हुने कमजोर हइने, बाकि तोहार बिचा सक्‍तिसालि बडसि।

⁴ केहकेकि हुने कमजोर हखइकि क्रुसमा टङेलसि, बाकि परमेस्‍वरक सक्‍तिसे हुने जिउतलसि। हमरा फेनि हुने नहिँया कमजोर भेल बडहुँ, बाकि परमेस्‍वरक सक्‍तिसे ख्रिस्‍टक लउठा जिवन हमारमा फेनि बडइ हसे उहे जिवनक सक्‍ति तोहारसाङे ब्‍यवहार करइकि देखेतइ।

⁵ तोहरा विस्‍वासमा बडह कि हइने कहके यपनहिँके जाँचके हेरिह। कथि येसु ख्रिस्‍ट तोहारमा बडसि कहके तोहरा महसुस हइने करसह। तोहरा जाँचमा असफल हखबह जउँ, ख्रिस्‍ट तोहारमा हइने बडसि।

⁶ मोर यासा बडइ कि, हमरा जाँचमा असफल हइने भेल बडहुँ कहके तोहार थाह बडइ।

⁷ हमरा त तोहरा खराब काम झिन करह कहके परमेस्‍वरसे परथाना करसहुँ। हमरा यपनहिँके डउल देखावेके तहिँया हइने, बाकि हमरा जाँचमा असफल भेल नहिँया लगले ताफेनि तोहरा ठिक काम करे सकह कहके परथाना करसहुँ।

⁸ केहकेकि हमरा सत्‍यक विरोधमा किहो करे नाहिँ सकबहुँ, बाकि सत्‍यक तहिँया मतरे करे सकबहुँ।

⁹ हमरा कमजोर भेले ताफेनि तोहरा बरियार बडह कहके हमरा खुसि बडहुँ हसे तोहरा सिद्ध बने सकह कहके हमरा परथाना करसहुँ।

¹⁰ मुइ तोहारसे तनाउ हखइकि इअ बतवा लिखइ बडहिँ, ताकि मुइ तोहार लघिना यवइकि प्रभुक देलि अधिकारके काडासे परयोग करे झिनपरइ। इअ अधिकार तोहराके बिगडावेके हइने, बाकि सुधारेके तहिँया मोरके दियाइल हखइ।

अन्‍तिम अभिवादन

¹¹ याखिरमा, प्रियसभ, याबे मुइ बिदा हखइकि, तोहराके इअ कहे चाहबहिँ कि, आनन्‍दित रहिह, तोहरा सिद्ध बनेके कोसिस करिह, एक-दोसरि जनके उत्‍साह दिह, सान्‍तिमा रहिह हसे सान्‍ति तके प्रेम देलाहर परमेस्‍वर तोहारसाङे रहबसि।

¹² तोहरा एक-दोसरि जनके पवितर प्रेमसे अभिवादन करिह।

¹³ यहवाँ भेलि जम्‍मे परमेस्‍वरक पवितर जनसभ तोहराके अभिवादन पठोले बडइ।

¹⁴ प्रभु येसु ख्रिस्‍टक अनुग्रह, परमेस्‍वरक प्रेम हसे पवितर-आत्‍माक सङगति तोहार जम्‍मे जनसाङे रहइ।