نامَه، عِبرانیه نَتاجَه مسیحیونرا 13 - کتاب مقدس به زبان تالشي - گویش مرکزیقربونیِ اِنی که خدا راضی آرَکَرد 1 شمَه دلَکا برا اَ موحبت ببو. 2 مِیمان نوازی کردِ خَلکیکا قافل مبَه، چیراکن اَ کارینَه بعضییِن بی اِمکن بِزنن، فرشتَه اونکا پَذیرایی کردشونه. 3 اَیِنی کن زیندانیکاینَه یاد آمَفنَه، هنتَه کن اینگار شمَه نی اَوونَّه زیندانیکارون؛ و اَیِنی کن عذاب بکَشتین یاد آمَفنَه، اِمی خونه کن شمَه نی تنیکا عذاب بَکَشتیرون. 4 برزَ ایزدواج گردِ آدَمون دلَکا ایحترام بدارِ و ژِن و شو رابیطَه پاجا ببو، اِمی خونه کن خدا زیناکارون و بی عیفَتون سَر دیوون بکَیَه. 5 شمَه زندَگی پول دوستیکا رَت آکَرَ و اَ چیی ایکا کن هِستِرون قانع ببَه، اِمی خونه کن خدا واتشَه: «هرگز بَتِه وَر آنِمَدا، و بَتِه تاک آنیمَشت.» 6 پس اَمه نی بشامون ایطمینانینَه واتِه: «چمن یاوَر خداوندَ، پس نِمَترسست. اینسان بَمِنَه چِه بَشا کردِ؟» 7 شمه رهبرون یاد آرَفنَه، اَیِنی کن خدا کلامی شِمَراشون واتَه. چَوون زندَگی روِشی آخِری بوینَه و چَوون ایمانیکا سرمشق بیگِرَ. 8 عیسی مسیح، اییزِر و اومروج و تا ابد، هیَه. 9 موختلیفَه آموجونَّه گومراه آمَبه؛ چون اِم چاکَه کن اینسانی دل ، فیضیکا زبق بیگِرِ، نِه غَذا اِنیکا کن چَوون دوملَه اَشونرا، هیچ منفعتی نییَه. 10 اَمَرا ایلَه قربونَه جگایی هِستَه کن اَ اَوالَه پاسَرییِن حقِشون نییَه بَیکا برِن. 11 یالَه کاهین، خَیوونون خونی گناخی قربونیرا قودس الاقداسی دلَرا بَبَیه، ولی چَوون لَشون اوردوگا بِرنیکا بَسوتینَه. 12 هنترَکه، عیسی نی شهری دروازَ بِرنیکا عذابِش کَشته تا اِشتَن خونی واسیطنَه، آدَمون تقدیس بکرِ. 13 پس بِرَ اَمه نی اِم اوردوگا کا چَی وَریرا برِن برشَم و چَی ننگیکا و گِچ گیریگا شریک ببَم. 14 چون اَمه اِم جِگاکا شهری نیمونَه کن باقی بومونِه، بَلکَم اَ شَهریرا کن کا آمِه، ایشتیاقینَه چَم بَرا ایمون. 15 پس بِرَ عیسی واسیطنَه، یَژَن شکر کردِ قربونی، خدا تقدیم بکرَم. اِم قربونی، هه لِوون اَکینه کن چَی نومی اییتراف بَکن. 16 چاکی کردِکا و دییرَ کَسون شریک کردِ شمَه داشتَه چییونکا غیفلت نِکَرَ، اِمی خونه کن خدا انترَ قربونیکا خَشه. 17 اِشتَن رهبرونکا ایطاعت بکرَ و چَوون فرمون ببَه؛ اِمی خونه کن اَیِن شمَه جانیکا موحافیظَت بَکَن و پی حیساب پس آدَرِن. پس برزَ خَشینَه اِشتَن کاری اَنجوم بدَرِن نِه آه و نالِستِنه، اِمی خونه کن اِم شمَه نفع نییَبن. 18 اَمَرا دِوا بکرَ، چون موطمَعِنّیمون کن چَمَه ووژدان پاجا اَ و بَپیمون همه جورَ سربلند ببَم. 19 شمَکا بَپیمَه خَیلی دِوا بکرَ تا زو شمَه وَر ویگَردِم. 20 ایسَه کن صلح و سلامتی خدا، اَ زَیرونه عهدی خونی واسیطنَه، چَمَه خداوند عیساش مردَاون دلَکا زندَ آکردَ، یعنی پَسون یالَه شونَه، 21 هَه خدا بَشمَه هر چاکَه چیی ایی نَه موجهز بکرِ تا چَی ایرادَ اَنجوم بدَرَ. تا اَ چیی ایی کن خدا راضی آرَکَرد، عیسی مسیح واسیطنَه چَمَه دِلَکا کار بیگِرِ، هه عیسی مسیح کن تا ابد و تا ابد شکوه جلال چَیرا ببو. آمین. 22 اَی برااِن، بَپیمَه چمن اِم گَفی کن پند و اندرزَ تاو بوعرَ، اِمی خونه کن شمَرا خولاصَه نوشتِم. 23 بزنَه کن چَمَه برا تیموتائوس آزاد آبَیه. اَگَم اَ زو با بَینَه بوممَه و بَشمَه بَویندیمَه. 24 شمَه رهبَرِن و موقدسَه آدَمون گِردیرا سلام آدَرَ. اَیِنی کن ایتالیا کا مندین، شمَرا سلام دَرِن. 25 فیض شمَه گِردینَه دَرِ ببو. |
@ 2024 Korpu Company