نامَه کُولُسی کلیسا را 4 - کتاب مقدس به زبان تالشي - گویش مرکزی

¹ اَی اَربابِن، اِشتَن وَزیَرونَّه عدل اینصافینَه رَفتار بکَرَ، چون بَموستیرون کن آستامونیکا شِمَرا نی اَربابی هِستَه.

² اوزون دِوا کا آمبَست ببَه، شکر کردِ نَه شمَه هَواس دِوا کا ببو.

³ و چَمَرا نی دِوا بکرَ، تا خدا کَلامیرا بَرَنگایی آکَرِ تا بشاعَم مَسیح رازی اییلام بکرَم، اَ رازی کن چَی خونه زیندانیکام.

⁴ دِوا بَکَرَ تا بشام هَتَه کن چاکَه، اَی واضِح اییلام بکَم،

⁵ کلیسا بِرنی آدَمونَّه حیکمتینَه رفتار بَکرَ و هر فِرصَتیکا چاکَه ایستفادَ بکرَ.

⁶ شمَه گَفن اوزون فیضینَه پتلَه و سنجیدَ ببون، تا بزنَه کن هرکَسی جوابی چنتَرَ بدَرَ.

آخِرین سَلامِن

⁷ تیخیکوس بَشِمَه کامیلا چمن حالیکا باخبَر بکیَه. اَ خاجَتیَه برا و اَمینَه پاسَری و بَمِنه خداوندی دلَکا هم خیدمتَه.

⁸ اَی شمه وَر رَونَه بَکَم تا چمن حالیکا با خبَر ببَه، و تا بشِمَه آلاونِه.

⁹ اَ، اونیسیموسینَه، کن چَمَه اَمینو خاجتیه برا اَ و شِمَکارَ، شمه وَر بومیَه. اَیِن بَشِمَه هر چیی اییکا کن اِم جِگاکا ایتفاق دَگنستِه باخبر بَکنَه.

¹⁰ آریستاخوس کن بَمِنه زیندانیکارَ، شمَرا سلام دَرِ؛ هِنتَرَکه برنابا عَمو زوعَه، مرقوس شمَرا سلام دَرِ. چیمی بَه نَه بَشمَه چَی خونه سیفارش کردَمه کن هر موقه شمَه وَر با، صدق دلینه بَی قبول بکَرَ.

¹¹ عیسی نی کن بَی یوستوس نی خِلِه بَکنه، شمرا سلام دَرِ. چمن هَمکارونکا کن خدا پادیشایی کاریکاینه، تاکَه اِم مِردِن سِنت بَه این، و اِمِن چمن آلاویستِه باعیث بَبینَه.

¹² اِپافراس کن شمَکا اَ و مسیح عیسی پاسَریَه، شمرا سلام دَرِ. اَ خدا کا بَپیشه کن شمَه هِنتَه یالَه آدَمِن و خاطِر جمعون شیوار آمبَست بومونَه، و خدا ایرادَ کامیلا فرمون ببَه.

¹³ اَز اِشتَن شاهیدیمَه کن اَ شَمرا و اَیِنی کن لائودیکیَه و هیراپولیسیکا هِستین، چَنه برکَه زَمت اَکَشیَه.

¹⁴ خاجتیَه دوختور لوقا و هنترَکه دیماس شمرا سلام بدان.

¹⁵ چَمه برا اِن و خالا اِن لائودیکیَه کا و هنترَکه نیمفا را و کلیسا ایی کن اِم خَنِمی کَکا هِستَه، سلام آدَرَ.

¹⁶ شمَه اِم نامَه خندِ بَه دوملَه، کاری بکَرَ کن اِم نامَه لاائودیکیَه کلیسا کا نی خندِ ببو؛ شمَه نی چمن نامَه، کن لائودیکیَه را نوشتم بوخونَه.

¹⁷ آرخیپوسی بواجَه: «اِشتِه هواس ببو خیدمتی کن خداوند اِشتِه دَست دوعَشه، کامیل اَنجوم بدَ.»

¹⁸ اَز، پولوس، اِم سلامی اِشتَن دسخَطینه کام نوشتِه. چمن زِنجِلون ام زیندانی یاد آرَفنه. فیض شمَنه دَرِ ببو.