رَسولون اَعمال 21 - کتاب مقدس به زبان تالشي - گویش مرکزیپولوس اورشلیمیرا بشی 1 اَوونکا تاک آبِه بَه دوملَه، دَیرا راه نَه سَفَریرا رَونَه آبیمون و یَک راست ’کوسی‘ جَزیرَ را شیمون. سَو سَه، رودِسی جَزیرَ را شیمون و اَ جِگاکا پاتارا بندَریرا آرَستیمون. 2 اَ جِگاکا کَشتیی پَیدا کَردِمون کن فینیقیَه را اَشیَه. چَی سَریکا دَنِشتیمون و راه دَگِنِستیمون. 3 چَمَه چَپَه طَرَفیکا قِپرِسِمون ویندَ و اَیکا دَیَوردیمون، و سوریَه طَرَفیرا شیمون. چَی بَه دوملَه صوری بندَریکا ویرمیمون، اِمی خونِه کن اَجِگاکا پی کَشتی باری تَی آکَرینَه. 4 شاگِردِنِمون اَ جِگاکا پَیدا کردَ و هَف روج چَوون وَر مَندیمون. اَیِن خدا روح هیدایَتینَه پولوسیشون واتَه، اورشَلیمیرا نِشو. 5 وَقتی اَ روجِنی کن قَرار بَه اَ جِگاکا بومونَم، تَمون آبَه، سَفَریرا شیون. شاگِردِن گِرد اِشتَن ژِن و خِردَنونَّه اَمَشون تا شَهری بِرن بَردَقَه کَردَ. اَ جِگاکا دَیرا وَریکا زِنگ ژِمون و دِوا کَردِمون. 6 خدا حافیظی کَردِ بَه دوملَه، کَشتیکا دَنِشتیمون، و اَیِن نی اِشتَن کَرا ویگَردِستین. 7 اَمه چَمَه دَیرا اییَه سَفَری صوری بندَریکا هَنی ایدامَه آدامون و پِتولامائیسی شَهریرا آرَستیمون. اَ جِگاکا برا اون ویندِمونَه و ایی روج چَوون وَر مَندیمون. 8 سَو سَرا، اَ جِگاکا شهر قِیصَریَه را آمیمون. اَمه، فیلیپُسِ مُبَشِری کَرا شیمون، کن ایلَه اَ هَف نَفَریکا بَه کن اَیِنِشون خیدمت کردِرا اینتخاب کردَ بَه، و چَی وَر مَندیمون. 9 فیلیپُسِ چار گِلَه مُجَردَ کِلَه داری کن پیش گویی اَکَرینَه. 10 چَن روجی بَه دوملَه کن اَمه اَجِگاکا مَند بیمون، ایلَه پَیغمبر آگابوس نوم یَهودیَه ولَتیکا آرَستَه. 11 اَ چَمه وَر آمَه و پولوسی دالَه ویگَتِش، اِشتَن بالون و لِنگون بَینَه آبَستِش و واتِش: «خدا موقدسَه روح باتی: اورشَلیمی یَهودیِن اِم دالَه صاحیبی اِنتَرَکِه دَنَّبَست و غَیر یَهودیون دست آنَّدا.“» 12 وَقتی اِمی درَستِمون، اَمه و اَجِگا آدَمِن پولوسی خاشتو خاز کَردِمون تا اورشَلیمیرا مَشو. 13 ولی پولوس جواب آداشَه: «اِم چه کاریَه بَکَرون؟ چیرا اِشتَن بِرَمِستِه نَه چمن دِلی بَچاکِنِستیرون؟ اَز حاضِریمه خداوند عیسی نومی خونِه، نِه تاکَه زیندانیرا بِشوم، بَسکَم اورشَلیمکا نی بِمِرِم.» 14 وَقتی ویندِمونَه کن قِبول نیَکَرد، کِتا آمیمونَه و واتِمون: «اَ چیی ایی کن خداوندی خواستَه یَه هَته ببو.» 15 اَ روجون به دوملَه، سَفَریرا آمادَ آبیمون و اورشَلیمیرا راه دَگِنِستیمون. 16 بعضی شاگِردونکا کن قِیصَریکَا اَمونینَه نی، اَمَنَه آمینَه و اَمَشون مِناسونی کَرا بَردِشون تا چَی مِیمان بِبَم. مِناسون، قِپرِسی آدَمونکا و ایلَه قَدیمَه شاگِردونکا بَه. پولوس یعقوبیش ویندَ 17 وَقتی اورشَلیمیرا آرَستیمون، برا اِن اَمَکا چاکَه ایستقبال کَردِشون. 18 سَو سَرا پولوسینَه یعقوبی ویندِرا شیمون. ایسبیَه ریشِن گِرد اَجِگاکا مَند بین. 19 پولوس اَوون سَلام واتِش و گردِ اَ کارِنی کن خدا چَی خیدمتی واسیطَنه غَیر یهودیوون دلَکا کردَش بَه، چَوونرا ایلَه ایلَه، جیگیر کردِش. 20 وَقتی اَیِن دَرَستِشون، خِداشون ستایش کردَ. چَی بَه دوملَه پولوسیشون واتَه: «برا، هَتَه کن کاش ویندِ، هَزازان یَهودی ایمانِشون وردَیَه و گِرد شَریعَتیرا غَیرَتمَندین. 21 چَوون دِلَکا اِنتَرَکه گَه بَه گَه بَیَه کن تِه گِردِ یَهودیِنی کن غَیرِ یَهودیون دِلَکا زندَگی بَکَنَه، آموج دوعَرَ کن موسی اِ پَیغمبری شَریعَتیکا آگردِن، و باتیشَه کن نِبایَد اِشتَن خِردَنون سِنَت بِکَن و چَمَه رَسمون واتَنَه رفتار بِکَرِن. 22 ایسَه پی چِه کَردِ؟ حتما، اَیِن اِشتِه آمِه کا باخَبَر بَبینَه. 23 پس اَچیی ایی کن بَتِه باتیمون، اَنجوم بِدَ. اِم جِگاکا چَمَه وَر چارگِلَه مِرد هِستین کن نَذر بَداشتین. 24 اَوون اِشتَنَه بِبَه واَوونَّه پاجا آبِه رسمی اَنجوم بِدَ و چَوون خَرجی بِدَ تا بِشان اِشتَن کَلَّه اون تاشتِه. اِنتَرَکِه گِرد سَر آنَّگِنِست کن اِم چیی اِن کن اِشتِه خونِه گَه بَه گَه آبَه یه راست نیَه، بَلکَم تِه نی شَریعَتیکا ایطاعَت بَکشَه، و چَی دلَکا نی زندَگی بَکَش. 25 ولی غَیرِ یَهودیَه ایمان دارون خونِه، اَمه اِشتَن حِکمی ایلَه نامَه ایی دِلَکا چَوونرا آدامونَه و واتِمون کن پی هَردَ چیی کا کن بوتون تَقدیم بَیَه و خونیکا، دَمَردَ خَیوونون گوژدیکا و زینا کا رَت آبون.» 26 سَو سَرا، پولوس اَیِنِش اِشتَنَه بَردِشَه و اَوونَّه پاجا آبِه سونَّتی اَنجوم آداشَه. چَی بَه دوملَه مَعبَدیرا شَه تا پا جا آبِه روجون آخِری، کن اَ روجیکا هَر کِرَمیرا قِربونی تَقدیم آرَبیَه، اییلام بکَرِ. پولوسِشون مَعبدیکا ویلاخِنییَه 27 چیی ایی نِمندَ بَه کن پا جا آبِه، هَف روج تَمون آبو کن چَن گِلَه یَهودی کن آسیا وِلَتی شِن بین، پولوسی مَعبَدیکاشون ویندَ. اَیِن جَماعَتِشون جیکو جیکو ژَ و پولوسی گَتِشون، 28 اَیِن لَسَه اَژَنینَه: «اَی یهودی مِردِن، آرَسَه؛ اِم هَیَه کن خَیلی آدَمون، گِردِ جِگااونکا چَمَه قام و شَریعَتی زِرَبَرا و اِم جِگا زِرَبَرا آموج اَدَری. غَیرَاَز اِم، یونانیون نی مَعبَدی دِلَه دَروَردَشه و اِم موقدسَه جِگاش جیفینین آکَردشَه.» 29 اِمی خونه کن اَیِن چیمی بَه نَه تْروفیموسِ اِفِسُسی پولوسینَه شهری دلَکاشون ویندَ بَه و فکر اَکَرینَه کن پولوس اَی مَعبَدی دِلَرا بَردَشَه. 30 اَ موقه شهری گردِ جگا اونکا خَرا خِلِه راست آبَه! مردوم هَمَه طَرَفیکا هِژما اَوَرینَه و پولوسِشون گتَه، و مَعبَدیکا بِرنیرا دَراکِنیشون و جَخت مَعبَدی بَرَنگا اون اِشتَن پِشتیکا دَبَستِشون. 31 هَتَه کن اَپیشون بَه بَی بِکِشِن، رومی سربازون فَرماندَ را خَبَر آرَستَه کن اورشَلیمی گِردِ جِگا اونکا خَرا خِلِه ایی راست آبَه یَه. 32 اَ فرماندَ جَخت اِشتَن سَربازِن و اَفسَرونَّه جَماعتی طَرَف ویریتین. وقتی جَماعَتی چَم، فَرماندَ و چَی سَربازون گِنَه، پولوسی ژِکا دَست پِگَتِشون. 33 فَرماندَ نِزِک آمَه و پولوسی ویلاخِنیشَه و فِرمون آداشَه بَی دِ گِلَه زِنجِلینَه دَبَستِن. اَموقه دَپَرسِستَه کن اَ کیَه و چِش کَردَیَه. 34 جَمعیَتی دِلَکا هَر کَم چیی ایی لَسَّنَه اَواجی. فَرماندَ کن خَرا خِله خونِه نِشتِشَه حَقیقَتیکا چیی ایی سَر آگِنِسته، فِرمون آداشَه پولوسی قَلَه را بِبَن. 35 وَقتی کن پولوس قَلَه پیلَکانی نِزِک آرَستَه، آدَمِن اَنَه آسرَنگِستَه بین کن سربازِن مجبور آبین اَی اِشتَن بالون سَریکا ببَرِن. 36 جَماعَتی کن چَوون دوملَه کایبین آمِه، جِکَّلَه اَکَرین: «بَی بکِشَه!» پولوس مردومینَه گَف بَژَی 37 هَنوزَنی پولوسی قَلَه دِلَرا بَردَشون نِبَه کن پولوس فرماندَش واتَه: «ایجازَ دَرَ چیی ایی بَشِمَه بِواجِم؟» فرمانده واتِش: «تِه یونانی بَموستیش؟ 38 مَگَم تِه هَه مِصری نیشَه کن چَنَه چیمی بَه نَه شورِشی راست آکَردِش و چار هَزا آدَمَه کِش اِشتَنَه وَیاوونیرا بَردِش؟» 39 پولوس جواب آداشَه: «اَز ایلَه یَهودیَه مِرد، تارسوسِ کیلیکیَه آدَمونکایمَه، شَهری کن بی نوم و نِشون نیَه. خاشتو خازِمَه ایجازَ بدَرَ مَردومینه گَف بِژَنِم.» 40 وَقتی فرماندَ ایجازَش دوعَه، پولوس پیلَّکانی سَر پامَندَ و اِشتَن بالینَه مَردومی طَرَف ایشا کردِش. وَقتی کن گِرد ساکیت آبین، عِبرانیون زبانینَه اَوون اِنتَرَ واتِش: |
@ 2024 Korpu Company