رَسولون اَعمال 17 - کتاب مقدس به زبان تالشي - گویش مرکزیپولوس سیلاس تِسالونیکی کا 1 پولوس و سیلاس شَهرِنِه آمْفیپولیس و آپولونیا کا دَیوَردین و شهر تَسا لونیکی را آرَستین، اَ جِگاکا یَهودییِن عیبادَتگا دارین. 2 پولوس اِشتَن عادَتی شیوار عیبادَتگارا شَه، و سِه گِلَه موقدسَه شنبَکا موقدسَه نوشتَه اون خونِه، اَوونَّه گَفَه ژَنِه اَکَریَه 3 و توضیح اَدَری، و دلیل اَوَری کن لازیم بَه مَسیح رَنج بِکَشِه و مَردَاونکا زندَ آبو. پولوس اَواجیَه: «اِم عیسی کن بَی شِمَرا اییلام بَکَم، هَه وعدَ آدوعَه مَسیحَه.» 4 بعضی اَوونکا و خَیلی خدا پَرَستَه یونانیونکا و یالَه کاولَه ایی سَر شِناسَه ژِنونکا، قانع آبین، و پولوس و سیلاسی آگنینَه. 5 ولی یَهودییِن زِرَشون بردَ و چَن گِلَه بازاری آوشَرَ آدَمِنِشون جَم آکَردَ، کاولَه ایی گِرد آکَردِشون و شَهریکا خَرا خِلِه راست آکَردِشون. یهودییِن پولوس و سیلاسی دوملَه اَگَردینَه و یاسونی کَرا هِژما بَردِشون تا اَوون جَماعَتی وَر بِرِن بوعَن. 6 وَقتی کن اَیِنِشون پَیدا نِکَردَ، یاسون و بَعضی برا اونکا، شَهری حاکیمون وَر دَراکِنِستِشون و لَسَّه ژِشونَه کن: «اِم مِردِن کن گِردِ دِنیاشون یَندِ ژَیَه، ایسَه اِم جِگارا آمَه اینَه 7 و یاسون اَیِنِش اِشتَن کَرا بَردَشَه. اِمِن گِرد، رومی ایمپرا طوری فِرمونیکا، نافِرمونی بَکَن و ایدعا بَکَن دییَرَ پادیشاهی هِستَه، کن چَی نوم عیسی اَ.» 8 وَقتی شَهری آدَمِن وحاکیمِن اِمِشون درَستَه، تَفشیش دَگِنِستین. 9 چَی بَه دومله یاسون و دییَرکسونکا ضیمانَت ویگَتِشون، اَیِنِشون آزاد آکَردَ. پولوس و سیلاس شهر بیریه کا 10 برا اِن هَه شَویکا، جَخت پولوس و سیلاسی شهر بیریَه را عندِشون. اَیِن وَقتی اَجِگارا آرَستین، یَهودیون عیبادَتگارا شینَه. 11 اِم یهودییِن، تَسالونیکی یهودیونکا نجیب تَر بین، اِمی خونِه کن پَیغومی اِشتیاقینَه قِبول کَردِشون و هَر روج موقدسَه کیتاوون اَخونینَه تا بِوینِن پولوس و سیلاسی گَفِن هنتَه خدا کلامی شیوارَ، یا نِه. 12 اِنتَرَکِه، خَیلی یَهودیونکا ایمانِشون وردِ، و یونانییَه ژِنِنی کن ایمانِشون وردَ بَه نی کَم نِبین، و یونانییَه سرشناسَه مِردونکا نی خَیلییِن ایمان وردِشون. 13 ولی وَقتی تَسالونیکی یَهودییِن سَر آگِنینَه کن پولوس شهر بیریَه کا نی خدا کَلامی اییلام بکَیه، اَ جِگارا شینَه و مَردومی جیکو جیکو ژِشون و شهریکا خَرا خِلِه راست آکَردِشون. 14 برا اِن جَخت پولوسی دَیرا کناریرا رَونَه آکَردِشون، ولی سیلاس و تیموتائوس بیریَه کا مَندین. 15 پولوسی بَدرقَه اَکَرِن، اَشون تا شهر آتِن وردِشون و چَی به دوملَه پولوس اَوون فرمون داشَه کن شهر بیریَه را ویگَردِن و خَیلی زوو سیلاس و تیموتائوسی چَی وَر بَینن. پولوس آتِنیکا 16 هَتَه کن پولوس آتِنیکا اَ دِ مُنتَظیر بَه، اِمی خونه کن اَوینیَه شَهر بوتون کا پَتلَمَه یَه، چَی روح بَرضَخ آبَه. 17 اِمی خاطِر، عیبادَتگاکا یَهودییِن و خدا پَرَستَه یونانیونَّه و هِنتَه هر روج شَهری مَیدونیکا راه دَیوَرونَّه گَفَه ژِنَه اَکَریَه. 18 چَن گِلَه اِپیکوری و رَواقیَه فیلسوفونکا نی بَینَه گَفَه ژِنَه کَردِشون. بعضی اَوونکا اَواجینَه: «اِم دَدارَ واج اَپیشَه چَه بِواجِه؟» دییَرِ کَسِن اَواجینَه: «مِثلِ اِمکن کا خلکَه خِدااون تبلیغ بَکَی.» اِمی خونه کن پولوس، عیسی، و مردَاون زندَ آبِه خونه اَوونَّه گف اَژَنیَه. 19 اَموقه پولوسیشون پِگتَه، ’آریوپاگوسی‘ را، هَه جِگایی کن آدَمِن گِرد آرَبین، بردِشونَه، و اَ جِگاکا بَشون واتَه: «بَبی سرآگنِستِه اِم تازَ آموجی کن کایشَه دوعِه، چِه چیَه؟ 20 اِمی خونه کن اِشتِه گَفِن چَمَه گوشونرا عَجیب بومَی. پس بَپیمون چَوون مَعنی بِزنَم.» 21 گِردِ آتِنی آدَمِن و غَریبَه اِنی کن اَ جِگاکا زندَگی اَکَرین، دِ هیچ کاری غَیرَاز اِم نِدارین کن تازَ عَقایِدی خونه، گَفَه ژَنِه بِکَن و گوش آکرِن. 22 پس پولوس ’آریوپاگوسی‘ جمعیکا راست آمَندَ و واتِشه: «اَی آتِنیَه مِردِن، اَز بَشِمَه هَمَه جورَ خَیلی دیندار بَویندیم. 23 چون هَنگومی کن شَهریکا اَگَردیمَه اَ چیی کن شِمَه اَی بَپَرَستیرون کایبیم دَیَشتِه، ایلَه قِربونه جگام ویندَ کن چَی سَریکا نِوِشتَه بَه: نِه آزنِستَه خدا تَقدیم ببو. ایسَه، اَ چیی ایی کن شِمَه نِه آزنِستِه بَی بَپَرَستیرون، اَز بَشِمَه اییلام بَکَم. 24 «اَ خدایی کن دِنیا و هَر چیی ایی کن چَی دِلَکارَ خَلقِش کَردَ، و اَ کن آستامون و زَمینی صاحیبَه، معبدِنیکا کن اینسان اِشتَن بالینَه سِی آکَردَشَه کا نیَمَند. 25 و چییِنی کن اینسان بَپیشَه اِشتَن بالونَّه خِدارا سِی آکَرِ موحتاج نییَه، چون اَ اِشتَن، گِردِ آدَمون زندَگی و نَفَس و هَر دییَرَ چیی ایی بَخشِستشَه. 26 اَ دِنیا گِردِ قامون، ایلَه اینسانیکا بَوجود وردَشَه تا زَمینی گردِ جگا اونکا زندَگی بِکَرِن؛ و چَوونرا وقتِن و چَوون مَندِ جِگارا، حِدود تَیین کَردِشَه. 27 تا آدَمِن خدا دوملَه بِگَردِن و شاید چَی دوملَه گَردِستِه موقِه بَی پَیدا بِکَن، هر چَنَه کن خدا، هیچ کِرَم اَمَکا دور نیَه. 28 اِمی خونه کن، ”چَی دلَکارَ کن زندَگی بَکمون و حَرَکت بَکمون و وِجود دارَم؛“ هَتَه کن بعضی شِمَه شاعیرِن نی واتَشونه کن: ”حقیقتاً اَمه چَی اودومیکامون.“ 29 «ایسَه کن خدا اودومیکامون، چاک نیَه اِنتَرَ فکر بِکَرم کن خدا، هنته طِلِه یا نِقرَ یا سِه ایی شیوارَ، کن اینسان اِشتَن خِنَر و خَیالاتینَه، بَی هنته مُجَسَمه ایی شیوارَ تاشتَش ببو. 30 گِذَشتکا، خدا اِنتَرَ نافَم گیری نِدید اَگِرییَه. اَمّا ایسَه گِردِ آدَمونرا هَر جِگا ایکا کن مندین، فرمون دوعشَه کن توبَه بِکَرن. 31 چون اَ، ایی روجِش تَیین کردیَه کن چَی دِلَکا اَ مِردی واسیطَنَه کن معّیَن کردشَه، دِنیا سَر عیدالَتینه دیوون بَکَیَه و چَی زندَ آکَردِ مَردَاونکا، گِردیش اِم کاریکا خاطر جَم کردِش.» 32 وَقتی کن اَیِن مَردَاون زندَ آبِه خونِه دَرَستِشون، بَعضییِن بوکَه خوروستِه گَتِشون، ولی دییَرَ کَسِن واتِشون: «اَمه بَپیمونَه، اِمی خونِه هَنی بَتِکا دَرَسَم.» 33 پس پولوس چَوون جمعیکا شَه. 34 ولی چَن نَفَری بَی آگینین و ایمان وَردِشون. چَوون دلَکا دیونیسیوس کن ’آریوپاگوسی‘ ایلَه آدَمونکا بَه، ژِنی داماریس نوم، و هَنی چَن نَفَری دییَر، کن اَ کاولَکا بین. |
@ 2024 Korpu Company