اوّلین نامَه قورَنتیانیرا 6 - کتاب مقدس به زبان تالشي - گویش مرکزیژِژِ ایماندارون دِلَکا 1 هر وقت کَسی شِمَکا دییَرَ کَسی زِرَبَرا شَکایَتی دارِ، چنتَه جورعَت بَکَیه اَی موقدسَه آدَمون وَر بَردِ عَوَض، گِناخکارون محکمه را بِبَرِ؟ 2 نینَّزنی کن موقدسَه آدَمِن دِنیا سَردِرِ دیوون بَکنَه؟ پس شمَه کن قرارَ دِنیا سَر دیوون بکَرَ، چِنتَرَیَه کن گِچَه مَسئلَه اون سَر دیوون کَردِکا عِجِزیرون؟ 3 مگَم نینَّزنی کن اَمه فرشتَه اون سَر دیوون بَکَمون؟ چِه بِرَسِه اِم زندَگی گِچه مسئَله اون سَردِرِ دیوون کَردِ. 4 پس چیرا اِشتَن دِلَکا اِنتَرَ ایختلافون دَگِنستِه هَنگوم، کَسِنی وَر بَبَرون کن کلیسا دِلَکا، کَسی نینَّه؟ 5 اِمی باتیم تا بَشِمَه شرمندَ آکَم. شمه دِلَکا حَکیمَه شخصی مند نیَه کن بشا برا اون ایختیلافی حَلَّو فصل بکرِ؟ 6 برا اِشتَن برا زِرَبَرا محکمَرا بَشی، اَ نی بی ایمانون وَر؟ 7 اصلا اِنتَرَ ژژِ وِجود شِمَه دِلَکا، شمَرا سرافکندَگیَه. چیرا نَپیرون اَ بدی قِبول بَکَر؟ چیرا حاضیر نینَّه ضَرَر بکَرَ؟ 8 ولی شِمَه اِشتَن ظِلم بَکَرون و دییَری ضَرر بَژَرون، حتی اِشتَن برا سَر. 9 مَگم نینَّزنی کن ظالیمِن خدا پادیشاهی وارث نینَّب؟ گول مَرَ! بی عیفتِن، بوت پَرستِن، زینا کارِن، لواط کارِن، 10 پِتارچییِن، طمَع کارِن، عَرَخه هَرِن، زَبون اَدَرِن و آوشَرَ آدَمِن خدا پادیشاهی وارث نینَّب. 11 بعضی شِمَه اونکا گِذَشتَکا اِنتَرَ بینَه، ولی خداوند عیسی مسیح نومینَه و چَمَه خدا روح واسیطَنه شِمَشون شوشتَه، تقدیس آبیرون و صالح بَحیساب آمیرون. بی عیفتی کا بیوریجَه 12 «گِردِ چییِن مِرا جایِزَ،» ولی گِردِ چییِن مِفَت نینَّه. «گِردِ چییِن مِرا جایِزَ.» اَمّا نِمَشت چیی ایی چمن سَردِرِ حریف ببو. 13 باتین: «هَردَ چیی لَوَرا یَه و لَوَ هَردَ چیرا، و خدا، هِم اِمی و هِم اَی نیفیت آرَکَرد.» تَن بی عیفتیرا نییَه، بَسکَم خداوندی شِنَه و خداوند نی تَنی شِنَه، 14 و خدا، خداوندی مردَاونکا زندَ آکَردِش و اَمه نی اِشتَن خِنَرینَه زندَ آرَکَرد. 15 شِمَه نینَّزنی کن شِمَه جندَکِن مسیح اَعضا اَ؟ یعنی مَسیح اَعضا پِگِم و اَوون هنتَه ایلَه فاحیشَه اَعضا شیوار آکَم؟ هرگز! 16 شمه نینَّزنی کَسی کن فاحیشَه نَه بَخِتی، اَینَه ایلَه تَن بَبیَه؟ اِمی خونه کن توراتیکا نوشتَه آبَه یَه: «اَ دِ ایلَه تَن بَبینَه.» 17 ولی اَ کن خداوندینَه ایلَه بَبی، اَینَه ایلَه روحَه. 18 بی عیفتیکا بیوریجَه! هر دییرَ گناخی کن اینسان بَکَیه چَی تَنی بِرنیکا اَ، ولی اَ کن بی عیفتی بَکَیه، اِشتَن تَنی سَر گناخ بَکی. 19 مَگَم شمَه نینَّزنی کن شمَه تَن خدا موقدسَه روح مَعبَدَ، کن شمَه دَلَکارَو اَی خداکا ویگَتَرون؟، شمَه، دِ اِشتَن شِن نینَّه. 20 اِمی خونه کن شمَه خِرییِه را بَهاشون دوعَیه، پس اِشتَن تَنیکا خدا شکوه وجلال بدَرَ. |
@ 2024 Korpu Company