اوّلین نامَه قورَنتیانیرا 15 - کتاب مقدس به زبان تالشي - گویش مرکزیمسیح زِندَ آبه 1 بِرااِن، ایسَه بَپیمَه اِنجیلی کن شِمرا موعیظَم کردَ، شمَرا یاد آفَنِم، هَه اِنجیل کن قِبول کردِرون و چَی سَر آمبَستیرون 2 و چَی واسیطنَه نیجات بَگَتیرون، البَت اَگَم اَ کلامی کن بَشمَرا موعیظَم کردَ، آمبَست غَم برَ. غَیراَز اِم، دَدار ایمانِرون وردَیَه. 3 اِمی خونه کن اَز موهیم ترین چیی ایی کن بَمن آرَستَه، شِمَرام اییلام کردَ: اِم کن مسیح هَتَه کن موقدسَه نوِشتَه اونکا آمیَه، چَمه گَناخون راکا مردَ، 4 و اِم کن دفِن بَه، و اِمکن هَه موقدسه نوِشتَه اون واتَنه، سوومه روجیکا مردَاونکا زندَ آبَه، 5 و اِمکن بَشتنِش کِیفارا کن بَی پِطروس نی باتین، اَیر آکَردِشه و چَی به دومله اَ دانزَ شاگردیرا اَیر آبه. 6 چَی به دوملَه هنی دییرَ کَرَرا پانصَد گِلَه برا اونرا دیار آبَه. خَیلییِن اَوونکا هَنوزَنی زندَ اینَه، هر چَنَه تیکَلی ایی اَونکا مردَ این. 7 دومله یعقوبیرا اَیر آبه و چَی به دومله رسولون گیردیرا، 8 و آخِریکا مِرا نی کن هنته خردَنی کن نارَس زندَشون ببو، اَیر آبَه. 9 اِمی خونه کن اَز رسولون دِلَکا گِچترینیمَه، و حتی لَیاقتم نییَه بَمن رسول خِلِه بِکَن، اِمی خاطر کن خدا کلیسا اَیذَت و آزار اَکریمه. 10 ولی اِمی کن ایسَه هِستیم خدا فِیضی خونه اَ، و چَی فیض مِرا بی بَرَ نِبَه. بر عَسک، اَز گِردِ اَوونکا چَتین تَر کارِم کردَ، ولی نِه اِشتَن، بَسکم خدا فیضی خونه، کن بَمِنه دَرِ. 11 پس چِه اَز چِه اَیِن، اَمه اِنتَرَ موعیظَه بَکَمون و شمَه اَته ایمان بوعَردیرون. مَردَ اِن زِند آبون 12 ایسَه اَگَم اییلام بَبیَه کن مسیح مَردَاونکا زندَ آبَه، چِنتَرَیَه کن بَعضی شِمَکا باتینَه مَردَاِن زندَ آنینَّب؟ 13 ولی اَگَم مَردَ اِن زندَ آنینَّب، پس حتی مَسیح نی مردَ اونکا زندَ آبَه نیَه. 14 و اَگَم مسیح مَردَاونکا زندَ آبَه نیَه، پس هِم چَمَه موعیظَه هیچَه، هِم شِمَه ایمان هیچَه. 15 اَمه حتی خِدارا دروعَه شاهید بَحیساب بَبیمون، اِمی خونه کن خدارا شاهیدی آدامونَه کن مَسیحِش مَردَاونکا زندَ آکَردَ، کن اَگَم مَردَاِن زندَ آنینَّب، پس خدا مسیحِش زندَ آکَردَ نیَه. 16 اِمی خونه کن اَگَم مَردَاِن زندَ آنینَّب، پس حتی مسیح نی زندَ آبَه نیَه. 17 و اَگَم مسیح زندَ آبَه نیَه، شمَه ایمان هیچَه و شمَه هَنی اِشتَن گِناخونکا هِستیرون. 18 پس اَیِنی کن مَسیح دِلَکا ایمان دارینَه و مَردین، نیفلَه آبین. 19 اَگَم تاکَه اَمه اِم زندَگیکا بَه مسیح امیدِمون هِستَه، اَمه دییرَ آدَمون گِردیکا بدبختَریمون. 20 ولی مسیح واقییَن کن مَردَاونکا زندَ آبَه یَه و اَ اَولین کَسیَه کن مردِ بَه دوملَه زندَ آبَه یَه. 21 چون هَتَه کن مَردِ ایلَه اینسانی واسیطنَه آمَه، مردَاون زندَ آبِه نی ایلَه اینسانی واسیطنَه آ. 22 چون هَتَه کن آدَمیکا گِرد بَمَردینَه، مَسیح دِلَکا نی گِرد زندَ آنَّب. 23 ولی هَر کَم اِشتَن نوبَه موقه: اوَلیکا مسیح کن نوبر بَه؛ و چَی به دوملَه، چَی آمِه هنگوم، اَیِنی کن مَسیح شِنینَه زندَ آبون. 24 چَی به دوملَه آخیرَ زمان آرَرَست، اَموقه ایی کن پادیشایی خدای دَدَ دست آرَدا، یعنی اَموقه کن هر حکومت و زاکین و قدرتی نیفیت بَکیَه. 25 اِمی خونه کن اَ پی تا زمانی کن گِردِ اِشتَن غَنیمون پابِن بَرکَرِ، سلطنت بکَرِ. 26 آخِرین غَنیم کن پی نیفیت آبو، مرگَه. 27 اِمی خونه کن خدا «گِردِ چییون چَی فِرمون و چَی لنگون بنیکا آناشَه.» ولی وقتی کن باتی «گِردِ چییِن چَی فرمون آکردشَه و چَی پا بنیکا آناشَه»، دیارَ کن خدا اِشتَن، اَ کن گِردِ چییون مسیح لنگون بنیکا آناشَه، دَربَر نییگَت. 28 هَنگومی کن گِردِ چییِن بَیکا فرمون بَبَن، پس زوعَه اِشتَن نی اَ کَسی فرمون بَبییَه کن گِردِ چییِنِش چَی لنگون بنیکا آناشَه، تا خدا کُل در کُل ببو. 29 اَگَم نِه، مردومی منظور مَردَاون نیابَت غَسل تعمید گَتِه چِه چییَه؟ اَگَم مردَ اِن زندَ آنبون، چیرا مردوم چَوون نیابَت تعمید بَگَتین؟ 30 و یا چیرا اَمه هر ساعتیکا اِشتَن جانی خطَریکا دَمونَفند؟ 31 برا اِن، اَ ایفتخاری کن چَمَه خداوند مَسیح عیسی دِلَکا شمَه خونه بَداشتیمَه، چَی سَر قسم بردیمَه کن اَز هر روج کام مَردِ. 32 اَگَم چمن جنگِستِه شهر اَفِسُسی آدَمونَّه کن اَشیا شیوار بین، چه بَرَ ایی اَیکا بردَمه؟ اینسانی چَمیکا کام گَف ژِ، اَگَم مردَاِن زندَ آنینَّب، «بِرَ بَرَمو و بِنجَم اِمی خونه کن سَف سَه بَمَردیمون.» 33 گول مَرَ: بَدَ آدَمینَه همنشین بِه، چاکَه اخلاقی مِچِم بَکَیَه.» 34 اِم دَدارَ گَفونکا کن چَوون خونه مست آبَه ایرون، عَقلی سَر بِرَو دِ گناخ نِکَرَ؛ اِمی خونه کن بعضیِن هِستینه کن خدا آنینَزنی اِمی باتیمَه تا شرمندَ آبَه. تَنی کن زِندَ آبو 35 ولی ایی نفر دَرَپرسِست: «مردِاِن چِنترَ زندَ آنَّب و چِنتَرَ تَنی نَه آن؟ 36 اَی نافَم! اَ چیی ایی کن بَکَشتیشَه، تا نِمِرِ زندَ آنیَبن. 37 اَ چیی ایی بکَشتیش، اَ تَنی کن پیی ببو نییَه، بَلکَم تاکَه دونَه یَه، ایسَه گَندِم ببو یا دییَرَ دونَه اِن. 38 ولی خدا اَ دونَه را، تنی که اِشتَن بَی اینتخاب کردشَه آرَدا و هر دونَه ایی را ایلَه تَن، چَی مخصوص آرَدا. 39 اِمی خونه کن تَنِن گِرد ایلَه نینَّه. آدَمونرا ایلَه مودیل تَن هِستَه، خَیوونونرا دییَرَ مودیل، و پرندَاونرا دییَر مودیلی ؛ مایِن نی دیَرَ مودیلی تَن بداشتین. 40 هِنتَرکِه، آستامونیَه تَنِن و زمینه تَنِن وجود بداشتین. ولی آستامونِیه تَنِن شکوه و جلال ایی جورَ و زمینیه تَنون شکوه و جلال ایی جور دییَرَ. 41 آختاو اِشتَنرا شکوه و جلال بداشتی، مانگ اِشتَن شکوه و جلال، و اِستَرَ اِن نی اِشتَن شکوه و جلالی بداشتینَه؛ اِمی خونه کن هر اِستَرَ شکوه جلال دییَرَ اِستَرَ نَه فرق بَکَی. 42 مردَاون زندَ آبِه خونِه نی اِنترَیَه. اَ چیی ایی کن کَشتِه بَبی، پوستَه آرَبن؛ و اَ چیی ایی کن زندَ آرَب، پوستَه آنیَبن. 43 ذیلَتینه کَشتِه بَبی، عیزَتینه راست آرَبن. عِجِزگیرینَه کَشتِه بَبی، زبقینَه راست آرَبن. 44 نفسانیَه تَن کَشتِه ببیَه، روحانیَه تَن راست آرَبن. اَگَم نفسانیَه تَن وِجود بَداشتی، روحانیَه تَن نی وِجود بَداشتیَه. 45 هَته کن توراتیکا نوشتَه آبَیَه: «اَولین اینسان، یعنی آدَم، زندَ موجود آبَه»؛ آخِرین آدَم، روحی آبَه کن زندَگی دَرِ. 46 ولی اَولیکا روحانی، ناَمه بَسکَم نفسانی آمَه، و چَی به دوملَه روحانی آبَه. 47 اولین اینسان زمینیکا بَه و خاکیکا؛ دِوومین اینسان آستامونیکارَ. 48 هَته کن خاکیَه اینسان هِستَه، اَیِنی کن خاکیی اینَه نی هَتَه این؛ هَتَه کن آستامونییَه اینسان هِستَه، اَیِنی کن آستامونی اینَه هَته این. 49 و هَتَه ایی کن خاکیَه اینسانی صَفَتی بَشتَنکا گَتِمون، آستامونیَه اینسانی صَفَتی نی بَشتنکا بَگَتیمونَه. 50 برا اِن، اِمی بَشِمَه باتیم کن جندَک و خون نییَشا خدا پادیشایی وارِث آبو و اَ چیی ایی کن نیفیت بَبی، نییَشا اَ چیی کن نیفیت آنییَب وارث ببو. 51 گوش آدَرَ! بشِمه رازی باتیم: اَمه گِرد نِمِرم، بَلکَم گِرد تبدیل بَبیمون. 52 جَخت و ایله میجَه ژِکا، اَ موقه کن آخِرین زرنا سَس بَرا. اِمی خونه کن زِرنا سَس بَرَرا و مردَ اِن زندَ آبون و دِ نیفیت آنینَّب و اَمه تبدیل بَبیمون. 53 اِمی خونه کن اِم تَن کن نیفیت آرَبن پی اَ تَنی کن نیفیت آنییَبِن دکَرِ و اِم فانیَه تَن پی اَ تَنی کن فانیی نییَه دکَرِ. 54 وقتی کن اِم تَن کن نیفیت آرَبن اَ تَنی کن نیفیت آنییَبن دَرَکرد و فانیَه تَن اَ تَنی کن فانی نییَه درَکرد، اَموقه اِشعَیای پَیغَمبر اَ نوشتَه اَنجوم بَبیه کن باتی: «پیروزی مَرگِش ویبَردَ.» 55 اَی مرگ، اِشتِه بَردِ کِرَم جِگاکارَ؟ و اَی مرگ، اِشتِه گَشتِه کِرَم جگا؟» 56 مَرگی گَشتِه گِناخَه و گناخی زبق شریعتَه. 57 ولی خِدارا شِکر کن چَمه خداوند عیسی مسیح واسیطَنه اَمه پیروزی دَرِ. 58 پس، چمن خاجتیَه برااِن، آمبَست و پابِند ببَه، اوزون خداوندی کاری ویشتَر و ویشتَر اَنجوم بدَرَ، اِمی خونه کن بَموستیرون شمَه زَمَت خداوندی دِلَکا دَدار نییَه. |
@ 2024 Korpu Company