اوّلین نامَه قورَنتیانیرا 13 - کتاب مقدس به زبان تالشي - گویش مرکزی

موحبتی راه

¹ اَگَم اینسانون و فرشتَه اون زبانینَه گَف بژَنم، ولی موحبت مدارم، هنتَه صَدا دارَ سنجی و تَیَه تبلی شیواریمون.

² اَگَم پیش گویی کَردِ خنَری بدارم و بشام گِردِ رازونکا و دانایی کا سَر آگِنم، و اَگَم اِنتَرَ کامیلَه ایمانی بدارِم کن بشام کومون تِم دَروَرِم، ولی موحبت مدارِم، دَداریمَه.

³ اَگَم گِرد اِشتَن دارایی صدقَه بدَرِم و اِشتَن تَنی آرا پَسنَه اون دَست بَدَرم، ولی موحبتم مبو، مِرا هیچ فایدَ ایی نیشَه.

⁴ موحبت صبورَ و مِربانَه؛ موحبت زِرَ نییَبرد؛ موحبت پوزنییَدا و یالَه نار نییَه.

⁵ موحبَت بی اَدَب نییَه و اِشتَن منفعَتی دوملَه نی؛ موحبت آنییَس رَنگِست و اِشتَن دِلیکا کینَه نییَگَت؛

⁶ موحبت بَدی کَردِکا خَش آنیَبن، ولی حَییقتینه خَشی بَکَیَه.

⁷ موحبت گِردِ چییون تحمل بَکَی، موحبت گِردِ چییون باور بَکَی، اوزون اومید بَداشتی و گِردِ چییون تاو بوعَردییَه.

⁸ موحبت هیچ موقه تَمون آنیَبن. ولی پیشگو اییِن نیفیت بَبینه، و زَبانِن تَمون آنَّب ودانایی هیچ آرَبن.

⁹ اِمی خونه کن چَمَه دانایی ناچیزَ و چَمه پیشگویی نی ناچیزَ؛

¹⁰ ولی هَه موقه کن کامیل با، ناچیز نیفیت آرَب.

¹¹ اَموقه کن فِلَه خِردنی بیمَه، هِنتَه خِردَنون شیوار گَف اَژَنیمهَ و خِردَنون شیوار فکر اَکَریمَه و هنتَه فِلَه خردنون شیوار دلیل اَوَریم. وقتی کن مِرد آبیم، خِردَنه رفتاری آهَشتِمه.

¹² چون اَ چیی ایی کن ایسَه کامون ویندِ، هِنتَه آوَینَه دلَکا عَکسی شیوارَ؛ ولی زَمانی آرَرَست کن اِشتَن نَ کا بَویندیمون. ایسَه چمن دانایی ناچیزَ؛ ولی زَمانی آرَرَست کن کامیل بَزنیم، هَتَه کن خدا، چمن خونه کامیل گِردِ چییون بَزنییَه.

¹³ پس ایسَه، اِم سِه چیی بَمندیَه: ایمان، اومید و موحبت. ولی گِردیکا یال تَر موحبَتَه.