Yoano 3 - MUKANDA USANDU WA ZAMBI 1975

¹ Achi, kwapwile mutu wa kuli A-Fwariseu, jina lienyi Nikondemu, mukwa kuyula hakachi ka A-Yunda.

² Iye wayile kuli Yesu ha ufuku, wambile kuli iye ngwenyi, Longeshi, tunanyingika yena uli longeshi unakatuka kuli Zambi; mumu niumwe mahasa kulinga yilayi yize yena wakulinga shina Zambi mapwa hamwe nenyi.

³ Yesu wamukumbulwile ngwenyi, Pundu, pundu, ngunambe kuli yena ngwami, Mutu kahashile kumona wanangana wa Zambi shina masemuka kwilu.

⁴ Nikondemu yamba kuli iye ngwenyi, Ngwe kuchi mutu mahasa kusemuka muze mapwa mukulwana? Mahasa kunjila chisuho chamuchiali mu jimo lia naye akasemuke, nyi?

⁵ Yesu wakumbulwile ngwenyi, Pundu, pundu, ngunambe kuli yena ngwami, Mutu kahashile kunjila mu wanangana wa Zambi shina masemuka ku meya ni kuli Spiritu.

⁶ Chize chinasemuka ku musunya, musunya; ni chize chinasemuka kuli Spiritu, Spiritu.

⁷ Kanda ukomoka ngwe hinamba kuli yena ngwami, Chanutamba kusemuka kwilu.

⁸ Ye fuji muyipalika kweswe muyipala, ni yena muwivwa liji liayo, alioze kushi kunyingika kuze muyikatuka ni kuze muyiya: chocho apwa mweswe wakusemuka kuli Spiritu.

⁹ Nikondemu wamukumbulwile ngwenyi. Ngwe kuchi yino yuma muyihasa kupwa?

¹⁰ Yesu wamukumbulwile ngwenyi, Yena uli mwe longeshi wa A-Izalele hindu kwanyingikine yino yuma, nyi?

¹¹ Pundu, pundu, ngunambe kuli yena ngwami, Yetu twakuhanjika yize tunanyingika; twakushindakenya yize hitunamono; ni yenu kunushi kutambula Shindakenyo yetu.

¹² Kachi nanwambulwilanga yuma ya hashi, kunushi kufuliela, ngwe kuchi munufuliela kachi mungunwambulwila yuma ya mwilu?

¹³ Mba niumwe wazezukile mwilu shina yoze wahulumukine mwilu, mwe Mwana Mutu, mwenawo mwilu mwali.

¹⁴ Chizechene ngwe Mose azundwile kapela mu puya, chocho chatamba kuzundula mwe Mwana Mutu;

¹⁵ hanga mweswawo mamufuliela, akapwe ni mwono wa mutolo.

¹⁶ Mumu chocho Zambi wazangile akwa hashi, wechele Mwanenyi wa wika, hanga mweswawo mamufuliela, kechi katoka, alioze akapwe ni mwono wa mutolo.

¹⁷ Mumu Zambi katumine Mwanenyi hano hashi, hanga akapatwile akwa hashi, alioze hanga akwa hashi alilamwine kuli iye.

¹⁸ Yoze mamufuliela keshi kumupatwila: yoze keshi kufuliela hanamupatwila kulu, mumu kafulieleleko jina lia mwe Mwana wa wika wa Zambi.

¹⁹ Uno we upatwilo, ngwo, Pangu hilineza hano hashi, ni atu azangile milima, hi pangu ko; mumu yitanga yo yapwile ya ungulungulu.

²⁰ Mumu mweswe wakulinga yipi keshi kuzanga pangu, keshi kwiza ku pangu, kuchina mamukumika ha yitanga yenyi.

²¹ Alioze yoze wakulinga umwenemwene kakwizaza ku pangu, hanga akasolole yitanga yenyi, hanayilingi muli Zambi.

²² Kulutwe lia yino yuma, Yesu wahetele ni tumbaji twenyi ku chifuchi cha Yundeya, washimbwileko hamwe no, nikupapachisa atu.

²³ Ni Yoano nawa wapwile nikupapachisa mu Enone hakamwihi ni Salini, mumu kwapwile meya anji kuze, ni atu apwile nikuyaya nikutambula upapachiso.

²⁴ Mumu Yoano kanda amumbila mu zuwo lia ususu.

²⁵ Kwapwile kashika mbandanga hakachi ka tumbaji twa Yoano ni A-Yunda ha kutwala ku kupemesa.

²⁶ O ayile kuli Yoano, ambile kuli iye ngwo, Longeshi, yoze wapwile hamwe ni yena kuze kanda lia Yordau, yoze wamushindakenyene, kumanyi, iye kakupapachisa atu, ni eswe kakuyaya kuli iye.

²⁷ Yoano wakumbulwile, ngwenyi, Mutu kahashile kutambula nichimwe shina mamwahacho kwilu.

²⁸ Yenwene nunashindakenya hali yami, ngwe nambile ngwami, Yami hi Kristu ko, alioze ngunatumiwa kulutwe lienyi.

²⁹ Yoze uli ni ndungi, mwe sandungi: alioze kasendo ka sandungi, yoze wakumana nikumwivwa, kakuwahilila chikolo mumu ha liji lia sandungi: uno uwahililo wami kashika unazala tò.

³⁰ Iye chamutamba kuya nikutoha, alioze yami changutamba kuya nikukehuluka.

³¹ Yoze unakatuka mwilu iye helu lia eswe: ni yoze unakatuka hashi iye mukwa hashi, iye kakuhanjika ya hashi: yoze unakatuka mwilu iye helu lia eswe.

³² Chize hanamono ni chize hanevu, chenacho kakushindakenya; alioze niumwe matambula Shindakenyo yenyi.

³³ Yoze hanatambula Shindakenyo yenyi hanase chinyingi chenyi ngwenyi, Zambi iye wamwenemwene;

³⁴ mumu yoze Zambi hanamutumu kakuhanjika maliji a Zambi: mumu keshi kuhana Spiritu ku njongo.

³⁵ Mwe Tata kakuzanga mwe Mwana; hanakunjika yuma yeswe mu kwoko lienyi.

³⁶ Yoze mafuliela mwe Mwana, mwono wa mutolo kali nawo; yoze keshi kwononoka kuli mwe Mwana, kechi kamona mwono, alioze utenu wa Zambi kuwatwama hali iye.