Yishima 28 - MUKANDA USANDU WA ZAMBI 1975

¹ Chingulungulu kakuchina chipwe niumwe kamuhangile; alioze akwa ululi kanahamuka ngwe ndumba.

² Ha kuvulumuna cha chifuchi alemu jacho mapwa anji; alioze ku malunga a malinjekela ni yinyingi kuyula chacho muchikalinduluka.

³ Chiswale yoze mapinjisa yiswale kapwa ngwe vula ya kuhungumuna, yize kuyahichikile kulia nichimwe.

⁴ Waze akwehuka shimbi kakuhalisa yingulungulu; alioze akwa kulinga shimbi kakulimika no.

⁵ Upatwilo kuwalumbunukine kuli atu api; alioze yuma yeswe yinalumbunuka kuli waze akufupa Yehova.

⁶ Shinaho chiswale yoze akwenda nikutuwika cha mbunge; hi pichi ko yoze wapiya mu ndako jenyi.

⁷ Mukwa kufunga shimbi kapwa mwana wa mana; alioze sepa lia yipulutu kakukolesa sonyi tato.

⁸ Mweswe mokesa upite wenyi ha kufwetesa mbwezo ni kufutukila, kakuufunga hali yoze mavwila keke yiswale.

⁹ Yoze matewulula twitwi lienyi ku shimbi, chipwe kulemba chenyi kuchakuzelwokesa.

¹⁰ Mweswe matwala mukwa ululi mu jila yipi, mwene malimbukila mu wina wenyi, alioze atu angunu mahinga che chipema.

¹¹ Pichi kanalimono ngwenyi, Nguli mukwa mana; alioze chiswale yoze apwa ni malinjekela mamusopesa.

¹² Muze akwa ululi makumba, ulemu unene uliko; alioze muze yingulungulu manangama atu kakuswama.

¹³ Mweswe masweka uvulumunyi wenyi kechi kawaha; alioze mweswe maushikisa nikuumbila mawana keke.

¹⁴ Kawaha yoze mevwa woma matangwa eswe; alioze yoze makalisa mbunge yenyi malimbukila mu lamba.

¹⁵ Yoze wayula yiswale ni ungulungulu kapwa ngwe ndumba wa kuhiohia, ni ursu yoze wakulihiza.

¹⁶ Mwanangana yoze keshi malinjekela mapwa mukwa kupinjisa nawa; alioze yoze kazangile chipululu masuhisa matangwa jenyi.

¹⁷ Mweswe yoze halitwika manyinga ja mutu mweswawo machinyina mu jondo; niumwe kanda amuchinda.

¹⁸ Mweswe menda nikululama mamupulula; alioze mweswe mapiya mu ndako jenyi malimbuka susumuku.

¹⁹ Yoze malima minda yenyi mapwa ni kulia cha kulumbama; alioze yoze makaula atu amokomoko maswala liakulu.

²⁰ Mukwa jika mapwa ni yiwape ya kulumbama; alioze yoze malipupwisa kupwa pichi kechi kasamba.

²¹ Kupwa ni katonde kuchapemene; chipwe kuvulumuna ha pinji ya kulia.

²² Yoze uli ni liso lipi mahanga upite fujifuji; kanyingikine ngwenyi, Uswale muunguwana.

²³ Yoze makanjisa mutu kulutwe mamuzanga kuhiana yoze wakupepieka ni limi lienyi.

²⁴ Yoze makeya kuli tato hanji naye nikwamba ngwenyi, Chavulumwine; iye kapwa ngwe sepa lia chonwonyi.

²⁵ Mukwa chipululu kakuvundula kulitachika; alioze mukwa kufuliela Yehova matoha.

²⁶ Yoze mafuliela mbunge yenyi mwene iye chihepuke; alioze mukwa kwenda ni mana mamupulula.

²⁷ Mukwa kuhana kuli yiswale kechi kahona; alioze mukwa kufuka meso jenyi mapwa ni mashingo anji.

²⁸ Muze yingulungulu manangama atu kakuswama; muze makuwa, akwa ululi moka.