Ubutukilo 6 - MUKANDA USANDU WA ZAMBI 1975

¹ Mba muze atu aputukile kwoka hashi nikusema ana a mapwo,

² ana a Zambi a malunga amwene ana a mapwo ja atu ngwo, Apema, kashika ambachile mapwo hakachi ka waze eswe azangile.

³ Mba Yehova yamba ngwenyi, Spiritu yami kechi kalitachika ni atu matangwa eswe, se iye nawa musunya. Hindu matangwa jenyi kumakapwa kulakaji lia miaka ni makumi aali a miaka.

⁴ Kwapwile yindululu hashi ha matangwa aze. Mba kulutwe nawa muze ana a malunga a Zambi anjilile kuli ana ja atu a mapwo, o aasemenene ana. Ana aze apwile akwa ndundo a shakulu; akwa lufuma.

⁵ Chocho Yehova yamona ungulungulu wa atu hashi, ngwenyi, Wahiana. Chikwo ngwenyi, Kutaka cheswe cha manyonga ja mu mbunge jo, chipi wika matangwa eswe.

⁶ Yehova yalikonyeka chize atangile atu hano hashi. Chamunehenene chinyengo mu mbunge yenyi.

⁷ Kashika Yehova yamba ngwenyi, Atu ano natangile mungwanongesa hashi; ni atu, ni tushitu, ni tututu, ni tujila a mu tetela, mumu hichangukonyekesa chize naatangile.

⁸ Alioze Noe wawanyine vumbi kumeso ja Yehova.

⁹ Yino ye yisemuko ya Noe. Noe wapwile mukwa ululi, keshi kapalia mu chisemuko chenyi. Noe waliendelele ni Zambi.

¹⁰ Noe wapwile ni ana atatu a malunga; ni Sheme, ni Hame, ni Yafwe.

¹¹ Hashi hapihile kumeso ja Zambi. Hashi te hazala to ni upupilo.

¹² Zambi wamwene hashi kumanyi hapihile mumu akwa mwono eswe hanapihisa majila jo hashi.

¹³ Mba Zambi yamba kuli Noe ngwenyi, Kumeso jami songo lia musunya weswe hilieza, mumu hashi hazala to ni upupilo kuli ayo, kashika mungwanongesa hamuwika ni he hashi.

¹⁴ Ulitungile ulungu wa mutondo wa mungofwe. Tunga yipatulo mu ulungu; ukaushile haze ni muchima ni usososhi.

¹⁵ Chichize muutunga: kusuha chawo muchipwa makulakaji atatu a yitenda; kutoha chawo muchipwa makumi atano a yitenda; kusuha chawo kwilu makumi atatu a yitenda;

¹⁶ ukatunge njanela mu ulungu, ku cheseko cha chitenda chimuwika akamutunge kwilu. Chikolo cha ulungu ukachise mu lumbu. Mukachilinga ni chipatulo cha hashi, ni cha hakachi, ni cha helu.

¹⁷ Mumu yami mwene munguneha sanga lia meya hashi lia kunongesa musunya weswe kushi lia malilu uze ukwete mwiku wa mwono; e eswe ali hashi kumafwa.

¹⁸ Alioze mungukolesa usendo wami ni yena. Kumukanjila mu ulungu, ni yena, ni ana je a malunga, ni mukwenu-pwo, ni mapwo ja ana je hamuwika ni yena.

¹⁹ Kuli akwa mwono eswe a musunya weswe, aali a ku mavungu eswe vungu ni vungu munjisa mu ulungu ukaafunge a mwono hamwe ni yena, akapwe a kuji ni chihwo.

²⁰ A kuli tujila nikulita ni mavungu jo, ni yimuna nikulita ni mavungu jo, ni tushitu eswe akukalala hashi nikulita ni mavungu jo, aali a ku mavungu eswe vungu ni vungu kumanjila hamwe ni yena ukaafunge a mwono.

²¹ Twala nawa kulia cheswe munulia, ukachikunge kuli yena, chikapwe kulia kuli yena ni kuli ayo.

²² Chocho yalinga Noe nikulita ni chize cheswe Zambi yamwamba, chocho yalinga.