Shimbi 4 - MUKANDA USANDU WA ZAMBI 1975

¹ Enu A-Izalele panjikenu ku yiyulo ni ku upatwilo ngunanulongesa, nuyilinge, hanga nupwe ni mwono, nunjile ni kuzuka chifuchi Yehova Zambi ya tulamba twenu ananwehecho.

² Kanda nuweza ku liji ngunanwambelio chipwe kutepululako. Nufunge maliji a shimbi a Yehova Zambi yenu nanwamba.

³ Meso jenu hanamono chize Yehova alingile mumu hali Mbale-Peore mumu malunga eswe akawile Mbale-Peore, Yehova Zambi yenu hanaakuwisa hakachi kenu.

⁴ Hindu yenu eswe nwalalaminyine kuli Yehova Zambi yenu, nuli a mwono tangwa lino.

⁵ Kutala! Nanulongesele yiyulo ni upatwilo, ngwe Yehova Zambi yami wangwambile, nulinge chizechene mu chifuchi nunayi kuchizuka.

⁶ Nuyifunge, nuyilinge; mumu yino kuyapwa mana jenu ni yinyingi yenu kumeso ja mavungu makevwa yiyulo yino. O mamba ngwo, Chamwenemwene munyachi uno kuwapwa atu a mana ni yinyingi.

⁷ Mumu vungu lika linene liliko Ukwete Zambi hakamwihi no Chichize ngwe Yehova Zambi yetu ali hakamwihi ni yetu heswaho mutumutambikila?

⁸ Vungu lika linene liliko Ukwete yiyulo ni upatwilo ya ululi ngwe shimbi yino yeswe hinasa kumeso jenu tangwa Uno?

⁹ Chino wika ngwami, Nukanyame, nufunge chikolo mbunge jenu kuchina munuvulama yuma yize hinunayimono, kuchina muyikatuka ku mbunge jenu matangwa eswe a mwono wenu, ni ana jenu ni ajikulu jenu nwanyingikiseyo.

¹⁰ Nwalweze tangwa nwamanyine kumeso ja Yehova Zambi yenu mu Horepe muze ambile Yehova kuli yami ngwenyi, Ngukungulwile atu, mungwavwisa maliji jami, akalilongese kunguvwila woma matangwa eswe matwama hashi, akalongese ana jo.

¹¹ Yinukundama, yinumana ku kulwa mulundu, we mulundu unachiweme ni kahia ndo ku malilu, ni milima, ni lelwa, ni milima pwi lume.

¹² Yehova yahanjika ni yenu liji Unatuhuka mukachi ka ke kahia, enu nwevwile kuhiohia cha maliji ahoze kunwamwene mujimba niumwe, yinwivwa liji tuhu.

¹³ Yanulumbunwina usendo wenyi anwambilewo nuulinge, te kumi lia shimbi, iye yajisoneka ha mikanda yiali ya mawe.

¹⁴ Yehova yangwamba ha mwaka uze ngunulongese yiyulo ni upatwilo, hanga nuyilinge mu chifuchi nunazauka kuchizuka.

¹⁵ Kashika nukanyame kanawa, mumu kunwamwene mujimba niumwe ha tangwa lize Yehova wahanjikile ni yenu mu Horepe liji Unatuhuka mukachi ka ke kahia.

¹⁶ Kuchina munulilumbula nikulisongela kaponya mu kulifwa cha mujimba weswawo, hanji mu kulifwa cha lunga, hanji cha pwo,

¹⁷ hanji mu kulifwa cha kashitu umwe uli hashi, hanji mu kulifwa cha kajila wakuhumuka ha tetela,

¹⁸ hanji mu kulifwa ni chuma cheswacho cha kukalala hashi, hanji mu kulifwa cha yishi ali mu meya mushi lia hashi.

¹⁹ Kuchina munuhetula meso jenu ku malilu mba ha kumona tangwa, ni kakweji, ni matongonoshi, te yizavu yeswe ya ha malilu, munuhungumuka nikuyiwayila nikuyivumbika, yuma Yehova Zambi yenu wayipangilile mavungu, eswe ali kushi lia malilu.

²⁰ Alioze Yehova wanuchijile ku Engitu kwe ku lutengo wa utale, nukapwe atu a kuzuka iye mwene ngwe kuchapwa musono.

²¹ Chikwo nawa, Yehova yatenuka ni yami mumu hali yenu, yalishinga ngwenyi, Kuchi kuzauka Yordau hanji kunjila mu chifuchi chize chipema, Yehova Zambi yenu ananwehecho, chikapwe chihinga.

²² Alioze changutamba kufwa mu chifuchi chino, kanda nguzauka Yordau. Hindu enu munukazauka, nuzuke chifuchi chize chipema.

²³ Nukanyame ngwami, Kuchina munuvulama usendo wa Yehova Zambi yenu, aukolesele ni yenu, ha kulisongela kaponya mu kulifwa cha chuma cheswacho Yehova Zambi yenu anukanjishilecho.

²⁴ Mumu Yehova Zambi yenu iye kahia ka kulesa; Zambi ya ukwa.

²⁵ Muze nwasema ana ni ajikulu hinwashimbula mu chifuchi, nyi munulilumbula ha kulisongela kaponya mu kulifwa cha mujimba weswawo, ha kulinga chipi kumeso ja Yehova Zambi yenu mukumwihia,

²⁶ ngunatambika malilu ni hashi yinushindakenye tangwa lino ngwo, Nikawashi munukakuwa liakulu mu chifuchi munuzauka Yordau kuchizuka. Kunuchi kwokesamo matangwa jenu, alioze munukakuwa liakulu.

²⁷ Yehova kumakanumwanga hakachi ka mavungu. Munukasala piliwiji hakachi ka mavungu kuze Yehova makanumwangina.

²⁸ Munukavumbikako tuzambi, yitanga ya moko ja atu, twa mitondo ni twa mawe, keshi kumona, chipwe kwivwa, chipwe kulia, chipwe kuhumbika.

²⁹ Alioze nyi munukafupako Yehova Zambi yenu munukamuwana, nyi munukamufupa ni mbunge jenu jeswe ni alma jenu jeswe.

³⁰ Ha luyinda ni yuma yino yeswe muyinuwana ha matangwa a kusula, mba munukahiluka kuli Yehova Zambi yenu ni kupanjika ku liji lienyi,

³¹ Mumu te Yehova Zambi yenu iye Zambi ya keke. Kechi kanwehuka yenu, chipwe kumwonwona, ka, chipwe kuvulama usendo wa tulamba twenu iye walishingile kuli ayo.

³² Kashika hulenu haliapwila ha matangwa a kunyima, shimbu te kanda nusemuka, katuke ha tangwa Zambi watengele mutu hashi, katuke ku songo limwe lia malilu ndo ku likwo, kutala nyi kwapwile chuma chipwa haha ngwe chuma chino chinene hanji kwivwa chuma Chichize.

³³ Te kwapwile atu amwe evwile liji lia Zambi Unatuhuka mukachi ka kahia, ngwe yenu nwevwile, mba atwamine a mwono nyi?

³⁴ Chipwe umwe Zambi weka wesekele limwe tangwa kuya ni kulitongwela vungu hakachi ka mavungu akwo ni yeseko, ni yilayi, ni yikomokeso, ni jita, ni kwoko lia ndundo, ni kwoko lia kwolola, ni yuma yinene ya kukolesa mwongo, nikulita ni yeswe anulingilile Yehova Zambi yenu mu Engitu kumeso jenu nyi?

³⁵ Anulwezelecho yenu, hanga nunyingike ngwenu, Yehova iye Zambi. Wakuhi weka shina iye wika.

³⁶ Yanuvwisa liji lienyi Unatuhuka mwilu, anufumbe. Hano hashi yanumwesa kahia kenyi kanene. Nwevwile maliji jenyi anatuhuka mukachi ka kahia.

³⁷ Mba se iye wazangile tulamba twenu, yanutongola yenu ana jo kulutwe lio. Yanuchiza ku Engitu iye mwene te kwali hakachi kenu, ni tachi jenyi jinene,

³⁸ mukuhuma mavungu kumeso jenu ananuhiana ni unene ni ndundo, mukununjisa yenu, mukunwaha chifuchi cho chikapwe chihinga, ngwe chinapu musono.

³⁹ Kashika, nyingikenu musono, nuchipachikile mu mbunge jenu, ngwami, Yehova iye Zambi mwilu ni hashi. Wakuhi weka niumwe.

⁴⁰ Nufunge yiyulo yenyi ni maliji jenyi a shimbi, ngunanwambeyo musono, hanga nutwame kanawa; ana jenu nawa kulutwe lienu akatwame kanawa, hanga nwokese matangwa jenu mu chifuchi Yehova Zambi yenu ananwehecho cha mutolo.

⁴¹ Henaho Mose yahandununa membo atatu mu sali lia Yordau, kutala ku Chivumbuko,

⁴² mukwa kushiha mutu akachinyineko, te anashihi mukwo kachihalile, kamuvwilile kole kunyima, hanga atwame ni mwono ha kuchinyina ku limbo Umwe lia wano.

⁴³ Ngwo, Mbezere mu puya, ha chana, hali A-Rupene, ni Ramote mu Ngiliate hali A-Ngate, ni Ngolane mu Mbashane hali A-Manase.

⁴⁴ Shimbi yino Mose wasele kumeso ja A-Izalele,

⁴⁵ Shindakenyo jino, ni yiyulo yino, ni upatwilo uno, ambile Mose kuli A-Izalele ha kukatuka mu Engitu,

⁴⁶ mu sali lia Yordau, mu chikulo chatalangana ni Mbete-Peore mu chifuchi cha Sahone, mwanangana wa A-Amore, Watwamine mu Heshebone yoze amulambile kuli Mose ni A-Izalele ha kukatuka mu Engitu.

⁴⁷ Yazuka chifuchi chenyi ni chifuchi cha Oge mwanangana wa Mbashane, mianangana aali a A-Amore apwile mu sali lia Yordau kutala ku Chivumbuko.

⁴⁸ Katuke ku Aroere kwatwama ku kulwa chikulo cha Amone ndo ku Mulundu wa Zaione (wenawo Hermone),

⁴⁹ ni kweswe ku Arapa mu sali lia Yordau kutala ku Chivumbuko, ndo ku Chitende cha Arapa ku ukandukilo wa Pisiga.