Nehemia 9 - MUKANDA USANDU WA ZAMBI 1975

¹ Ha tangwa makumi aali ni liamuchiwana lia kakweji yono A-Izalele yakunguluka nikulitwamina kulia, ni chikeleyi, ni kulikwita mavu.

² Munyachi wa Izalele yalihandununa kuli yilambala eswe. Yamana nikushikisa milonga yo ni uhenge wa atato.

³ Yamana kuma kwo nikutanga mu mukanda wa shimbi ja Yehova Zambi yo chihanda chimuwika cha ku yihanda yiwana ya tangwa, mba chihanda chikwo cha ku yihanda yiwana yashikisa nikuwayila Yehova Zambi yo.

⁴ Henaho kwamanyine ha ukandukilo amwe A-Levi: Yeshua, ni Mbani, ni Kamiele, ni Shebania, ni Buni, ni Sherebia, ni Mbani, ni Chenani. Yalemba ni liji linene kuli Yehova Zambi yo.

⁵ Mba A-Levi, Yeshua, ni Kamiele, ni Mbani, ni Hashabania, ni Sherebia, ni Hodia, ni Shebania, ni Petahia yamba ngwo, Manenu nukafumanyise Yehova Zambi yenu chize ku miaka yeswe ndo ku miaka yeswe. Jina lie lia uhenya, lize liatunda helu lia ulemeso weswe ni uhaliso weswe, likafumane.

⁶ Yena uli Yehova; yena mwene ukawe. Yena watangile lilu, ni lilu lia malilu ni mbunga yamo yeswe, ni hashi ni yuma yeswe yiliho, ni tulunga-njiji ni yuma yeswe yilimo; ni yena kuwakuyifunga yeswe. Mbunga ya mwilu kakukuwayila.

⁷ Yena uli Yehova, mwe Zambi. Watongwele Apalama; wamuchijile ku Ure ya A-Kaletea nikumwaha jina lia Apalahama.

⁸ Wawanyine mbunge yenyi yingunu kumeso je; wakolesele nenyi usendo ukamwehe chifuchi cha A-Kanana, ni A-Hete, ni A-Amore, ni A-Perize, ni A-Yepushe, ni A-Ngikashe, ukachihane kuli akwa munyachi wenyi. Hiwalinga nikulita ni maliji je mumu uli mukwa ululi.

⁹ Wamwene luyinda wa tulamba twetu mu Engitu; wevwile muteto wo ku Kalunga-lwiji Muchila.

¹⁰ Walingile yilayi ni yikomokeso hali Falau ni hali ngamba jenyi eswe, ni hali atu eswe a chifuchi chenyi mumu wanyingikine chize alivwimbile kulimika ni ana je. Jina lie liafumanyine ngwe linafumana tangwa lia musono.

¹¹ Wapulile kalunga-lwiji kulutwe lio, chocho apalikile ndusu mu kalunga-lwiji hashi homu. Akwa kwakaula waanyashine mu meya asuku ngwe kakumbila liwe mu meya a tachi.

¹² Chikwo nawa waatetekelele mu nguji lia lelwa ha mwalwa, ni nguji lia kahia ha ufuku Ukaahe pangu mu jila yize chaatamba kuya.

¹³ Wahulumukine ha mulundu wa Sinai nawa wahanjikile no mwilu; waahele upatwilo wa pundu, ni shimbi jamwenemwene, ni yiyulo yipema ni maliji.

¹⁴ Waanyingikishine Sambata ye yisandu; waatuminyine maliji, ni yiyulo, ni shimbi ku kwoko lia Mose kavumbi ke.

¹⁵ Mwilu waatumine mbolo ha zala yo; ku liwe waachijile meya ha pwila yo. Waatumine anjile nikutambula chifuchi chize yena hiwalishinga kwaaha.

¹⁶ Alioze o tulamba twetu alengumukine; akwachile pami; kapanjikile ku shimbi je.

¹⁷ Kazangile kwononoka; kasolo kwiwuluka yikomokeso yize walingile hakachi ko. Akwachile pami ni ha kukukatukila atongwele umwe kasongo akahiluke ku undungo wo. Alioze yena uli Zambi mukwa kukonekena, mukwa vumbi, wa tò ni keke, kushi kutenuka washi, mukwa kulumbamisa utu wa zango, kashika kwaehukile.

¹⁸ Chipwe muze alilingilile mwana-ngombe wa kuzuzulula nikwamba ngwo, Yono Zambi yenu wanuchijile mu Engitu, nikukwihia kuhiana;

¹⁹ hindu mu keke ye yeka ni yeka kwaehukile mu puya. Nguji lia lelwa kuliaakatukile ha mwalwa mukwasongwela mu jila; chipwe nguji lia kahia ha ufuku mukwapangulwisa, ni kwalweza jila yize chaatamba kuya.

²⁰ Wahanyine Spiritu ye mupema kwalongesa. Kwachijile maná ye mu makanwa jo; waahele meya ha pwila yo.

²¹ Ewa, makumi awana a miaka waahokele mu puya; kahonene nichimwe. Mazalo jo kafwile; ni molu jo kajimbile.

²² Chikwo nawa waahele yifuchi ni mavungu yize waapangilile nikulita ni yihanda yo. Chocho azukile chifuchi cha Sahone, chifuchi cha mwanangana wa Heshebone, ni chifuchi cha Oge mwanangana wa Mbashane.

²³ Wokesele ana jo nawa ngwe matongonoshi a mwilu; waanjishile mu chifuchi chize wambile kuli atato ngwe, Mununjila ni kuchitambula.

²⁴ Chocho e ana anjilile ni kuzuka chifuchi, ni yena wazeyesele enya chifuchi kumeso jo, ngwami, A-Kanana; waakunjikile mu moko jo hamwe ni mianangana jo ni mavungu a chifuchi akalinge no cheswacho azangile.

²⁵ Atambwile yihunda ya yipanga-ya-mawe, ni chifuchi cha chinuno. Azukile mazuwo a tò ni yuma yeswe yipema—mashima a kutota mu liwe, ni minda ya uva, ni minda ya olevwe, ni mitondo ya ngolo ya mihuko. Chocho alile, akuchile, atohele, ni kuwahilila mu upeme we unene.

²⁶ Chipwe chocho akolemene ni kukukatukila, ni kumbila shimbi je kunyima yo, ni kushiha aprofeta je waze aashindakenyene akaatewulwise kuli yena nawa. Akwihile chikolo.

²⁷ Kashika waakunjikile kuli akwa kulimika no. O aapinjishile mba ha mwaka wa lamba lio, muze atetele kuli yena, ena mwilu waapanjikile; mba nikulita ni keke ye yeka ni yeka waatumine yilamwina waze aalamwinyine ku moko ja akwa kulimika no.

²⁸ Alioze muze hahwima alingile chipi nawa kumeso je, kashika waahichikile mu moko ja akwa kole jo akaayule. Hindu muze ahilukile nikuteta kuli yena mwilu waapanjikile, mba kanji kanji waapulwile nikulita ni keke ye.

²⁹ Waashindakenyene Ukaahilwise nawa ku shimbi je. Hindu alengumukine; kapanjikile ku shimbi je; avulumwine upatwilo we (nyi mutu maukaula matwamamo ni mwono), asekwile yipaya yo, akwachile pami, kasolo kupanjika.

³⁰ Alioze miaka yinji walihumikijine no. Waashindakenyene kuli Spiritu ye muli aprofeta. Hindu kasolo kwivwa, kashika waakunjikile mu moko ja mavungu a yifuchi.

³¹ Alioze mumu ha keke ye yeka ni yeka kwaamanunwine pundu, chipwe kwaehuka, mumu uli Zambi ya vumbi ni keke.

³² Kashika Zambi yetu, mwe Zambi munene, mukwa ndundo kole ni woma, mukwa kufunga usendo ni utu wa zango, kanda umona kukeha lamba lino lieswe hiliatushata, ni mianangana jetu, ni alemu jetu, ni asasendote jetu, ni aprofeta jetu, ni tulamba twetu, ni atu je eswe, chize ku miaka ya mianangana ja Asuria ndo musono.

³³ Alioze mu yuma yino yeswe hiyatushata uli mukwa ululi mumu hiwalinga ni umwenemwene; yetu hitwalinga ni ungulungulu.

³⁴ Chipwe mianangana jetu, ni alemu jetu, ni asasendote, ni tulamba twetu kafungile shimbi je, kapanjikile ku maliji je ni Shindakenyo ye yize waámbile.

³⁵ Mumu kakulingilile mu wanangana wo, ni mu upeme we unene waahele, ni mu chifuchi cha chinuno waahele kushi; kasolo kwecha yitanga yo ya ungulungulu.

³⁶ Kashika musono tuli ngamba, ni chifuchi chino wachihanyine kuli tulamba akalie mihuko yacho ni upeme wacho, tuli ngamba jamo.

³⁷ Kuchakwima mbuto ya kulumbama kuli mianangana waze hiwasela helu lietu mumu ha milonga yetu. O kakuyula mijimba yetu, ni yimuna jetu nikulita ni upale wo mba tuli ni luyinda munji.

³⁸ Hindu ha yuma yino yeswe tunakolesa usendo wa ngú. Tunausoneka, ni alemu jetu, ni A-Levi jetu, ni asasendote jetu kanaseho yijikilo yo.