Mika 7 - MUKANDA USANDU WA ZAMBI 1975

¹ Lamba liami mumu hinapwa ngwe muze mihuko ya lwiza hayihela; muze uva hayihela, kukushi chichakata cha kulia, chipwe kuyu litangu kuhia, lize mbunge yami yakuzanga.

² Mukwa uwayilo hakuwa hashi, niumwe mukwa ululi wakuhi hakachi ka atu. Eswe kakujikinyina manyinga; mutu mweswe kakuzomba mukwo ni wanda.

³ Moko jo kakukwata ku chuma chipi achilinge ni mbunge yeswe. Ni mulemu ni ngaji eswe kakwita chindo; ni mutu munene kakwamba usolo upi wa muchima wenyi. Chocho kakuyiseleka yeswe hamuwika.

⁴ Mwe mupema hakachi ko kapwa-ngwe mukalale, yoze Wahiana ululi hakachi ko kapwa ngwe chipanga cha mbimbo. Tangwa lia tulayi twe, lia kastigu ye hilieza; kutatajala cho hichaheta.

⁵ Kanda ufuliela mwenyembo; kanda ujikijila sepa. Funga kanwa lie chipwe kuli pwo yoze wapomba mu kondo ye.

⁶ Mumu mwana wa lunga kakulelesa tato, ni mwana wa pwo kakukatukila naye; tembwa-mwanenyi malimika ni tato-pwo. Akwa kole ja mutu e akwa usoko wenyi.

⁷ Alioze ha kutwala kuli yami, mungutala kuli Yehova; mungutwaminyina Zambi ya ulamwino wami; Zambi yami mangwivwa.

⁸ Ena mukwa kole yami, kanda unguyunga. Chipwe mungulimbuka hindu munguhinduka nawa. Chipwe mungutwama mu milima Yehova mapwa pangu kuli yami.

⁹ Mungutambula utenu wa Yehova mumu hinamuvulumuna; ndo manguhakwila ni chikuma chami, ndo mangupatwila. Kumangutuhwishila mu pangu; kumungumona ululi wenyi.

¹⁰ Mba mukwa kole yami makamona, ni sonyi mujikafuka yoze wangwambile ngwenyi, Yehova Zambi ye kuli ali? Meso jami kumakamutala ni kulikwiza; mba makamuliata ngwe malowa a mu tapalo.

¹¹ Lie tangwa lia kutungayipanga ye ya mawe! Ha tangwa lize njiza ye muyikapalika kusuku.

¹² Ha tangwa lize makeza kuli yena chize ku Asuria ndo ku Engitu; chize ku Engitu ndo ku mwe Lwiji; chize ku kalunga-lwiji ndo ku kalunga-lwiji, chize ku mulundu ndo ku mulundu.

¹³ Alioze hashi muhapwa ha kwenyeka ha mukunda wa enyaho mumu ha mihuko ya yitanga yo.

¹⁴ Funga atu je ni mbwechi ye; ye mbunga ya mapanga je a chihinga, waze atwama ukawo mu musenge, he hakachi ka chifuchi cha manaka. Akalie mu Mbashane ni Ngiliate ngwe ku matangwa a shakulu.

¹⁵ Mungukaalweza yuma ya kukomwesa, ngwe ha matangwa aze atuhukile mu Engitu.

¹⁶ Akwa mavungu mamona mba mavwila sonyi ndundo jo. Masa moko jo ku makanwa jo ni matwi jo makafwa.

¹⁷ Kumakalesa fufuta ngwe tupela ngwe tushitu a kukalala hashi. Kumakatuhuka ku yihunda yo ya kukolesa nikuchikima; kumakatewulukila ni mwongo kuli Yehova Zambi yetu; kumakevwa woma ha mukunda wa yena.

¹⁸ Iya mapwa Zambi ngwe yena, mukwa kukonekena uhenge, ni kuzomboka milonga ya masalia ja chihinga chenyi? Kechi kufunga utenu wenyi wa mutolo mumu kakuwahilila ni utu wa zango.

¹⁹ Kumakatuvwila keke cheka nawa; kumakaliata uhenge wetu ni molu jenyi. Kumukambila milonga yetu mu mashima ja kalunga-lwiji.

²⁰ Kumukapwa mukwa jika kuli Yakomba; kumukasolola utu wa zango kuli Apalahama ngwe walakenyene kuli tulamba twetu chize ku matangwa a shakulu.