Mika 6 - MUKANDA USANDU WA ZAMBI 1975

¹ Ivwenu chize Yehova anambe ngwenyi, Katukenu nulisambise kumeso ja milundu; mindundena yikevwe liji lienu.

² Enu milundu ivwenu chikuma cha Yehova, ni yenu fundamentu jikolo ja hashi; mumu Yehova kanasumu atu jenyi, makasopa ni A-Izalele.

³ Atu jami, yika nanulinga? Hahi nanupinjisa? Ngukumbululenu!

⁴ Nanuchijile ku chifuchi cha Engitu, nikunukula ku zuwo lia upinji. Natumine Mose, ni Arone, ni Miriame kunutetekela.

⁵ Enu atu jami, iwulukenu chize Mbalake mwanangana wa Moape watakile, ni chize Mbalau mwana Mbeore wamukumbulwile; ni chize chanuwanyine chize ku Shitime ndo ku Ngilingali hanga nukanyingike yilinga ya ulamwino wa Yehova.

⁶ Neka mungwiza kumeso ja Yehova nikulihetamina kumeso ja Zambi mwilu? Mungwiza kumeso jenyi ni milambu ya kulumba, hanji ni yimbembe ya ngombe ya mwaka umuwika?

⁷ Yehova mevwa kuwaha ni tununu twa kuji a mapanga hanji ni kumi lia tununu a njiji ja maji? Munguhasa kuhana mwanami mutangu ha mutonga wami hanji muhuko wa mujimba wami ukafwike shili ya mbunge yami?

⁸ Ena lunga, hanakulweze chize Chinapeme. Yehova yika anafupu kuli yena shina kupatula ni ululi, ni kuzanga vumbi, ni kuliendela ni Zambi ye ni kulikehesa?

⁹ Liji lia Yehova linatambika mu chihunda; mukwa mana mamona jina lie. Panjikenu ku mulumbu ni yoze waatongwele.

¹⁰ Munguhasa kuvulama upite wa ungulungulu mu zuwo lia chingulungulu, hanji njongo ya kukehesa yize yinashingiwa?

¹¹ Mungusambisa mutu ni mbalansa ya ungulungulu, ni njeke ya pezu ja kwonga?

¹² Pichi jenu kanazala ni upupilo; waze atungamo kakuhanjika mahuza malimi ja mu makanwa jo a kwonga.

¹³ Kashika hinaputuka kunulamba ni kunupwisa a hululu ha mukunda wa mitonga yenu.

¹⁴ Kulia munulia alioze kunuchi kukuta; zala muyikatwama muchima lienu. Munutulika yuma ahoze kunuchi kapita. Ni yize munupita, yami munguyikunjika ku katana.

¹⁵ Munukuwa mbuto alioze kunuchi kacha. Munufunga mitondo ya olevwe ahoze kunuchi kalikwata maji. Munukama uva ahoze kunuchi kanwa vinyu.

¹⁶ Mumu nwakufunga shimbi ja Omiri, ni yitanga yeswe ya munyachi wa Ahabe, ni yenu nwakwenda mu yiyulo yo, hanga ngukapwiseko kwa hululu, ni akwa kutwamako akasauke. Chocho kulenya cha mavungu muchikapwa hali yenu.