Mateu 12 - MUKANDA USANDU WA ZAMBI 1975

¹ Ha mwaka uze Yesu wapalikile ha tangwa lia Sambata mu minda; ni tumbaji twenyi evwile zala kashika aputukile kuhulula mitwe ya tiliku akalie.

² Alioze A-Fwariseu muze achimwene, ambile kuli iye ngwo, Tala, tumbaji twe kanalingi chize kuchalitele ni shimbi kulinga ha tangwa lia Sambata.

³ Alioze iye wambile kuli ayo ngwenyi, Kunwatangile chize alingile David, muze evwile zala, ni waze apwile hamwe nenyi, nyi?

⁴ Ngwe chize anjilile mu zuwo lia Zambi, walile mbolo ja kutumbieka, jize shimbi kuyamutayijile kulia iye, chipwe waze apwile hamwe nenyi, alioze asasendote wika?

⁵ Hanji kunwatangile mu shimbi ngwe ha masambata, asasendote mu tembele kakutangula Sambata hindu keshi chitela, nyi?

⁶ Alioze ngunambe kuli yenu ngwami, umwe munene Wahiana tembele kuno kwali.

⁷ Alioze kachi nwanyingikine chize muchilumbunuka ngwo, Ngunazange keke hi chitapo ko, kachi kunwahishile waze keshi chitela.

⁸ Mumu mwe Mwana Mutu iye mwene wa Sambata.

⁹ Wakatukile kuze, wanjilile mu sunangonga yo.

¹⁰ Kumanyi, mwapwilemo mutu ni kwoko lia kusosewa, amuhulile ngwo, Muchilita ni shimbi kuwuka ha tangwa lia Sambata, nyi? Hanga akamusume mutonga.

¹¹ Iye wambile kuli ayo ngwenyi, Mutu muka hakachi kenu, yoze mapwa ni panga umuwika, kachi maholokela mu wina ha tangwa lia Sambata, kechi hamukwata ukamuchizemo?

¹² Mba mutu kahianyine chikolo panga, nyi? Chocho kevwe chinalite ni shimbi kulinga kanawa ha tangwa lia Sambata.

¹³ Hohene yamba kuli mutu ngwenyi, Olola kwoko lie. Mba waliolwele; nelio liahindukile lingunu ngwe likwo.

¹⁴ Alioze A-Fwariseu atuhukile, amutwamine punga chize mahasa kumwonwona.

¹⁵ Alioze Yesu ha kuchinyingika wayile kweka, ni mbunga jinji amukawile; waawukile eswe.

¹⁶ Alioze waakanjishile chikolo kanda akamusolola.

¹⁷ Hanga chikamanunuke chize ahanjikile ku kanwa lia profeta Izaia ngwenyi,

¹⁸ Kavumbi kami yoze hingunamutongola; Ngunamuzange chikolo, yoze muli iye mbunge yami yinawaha: Kumungukasa Spiritu yami hali iye, mba kumakambujola upatwilo kuli akwa mavungu.

¹⁹ Kechi kalitachika, chipwe kechi kakololoka; mba niumwe kechi kevwa liji lienyi mu matapalo.

²⁰ Lumbungu wa kufwenya kechi kamumakuna, ni wanda wa kuneha mwishi kechi kaujima, ndo masolola upatwilo ukakumbe.

²¹ Ku jina lienyi akwa mavungu kumakatalatala.

²² Hohene anehene kuli iye umwe mukwa ndemoniu, kapuputa kanda kamama, wamuwukile, chocho kapuputa kanda kamama wahanjikile, wamwene.

²³ Ni mbunga jeswe alishikishilile, ambile ngwo, Yono mwe mwana David, nyi?

²⁴ Alioze muze A-Fwariseu achivwile, ambile ngwo, Yono keshi kutuhwisa andemoniu shina ni tachi ja mwata wa andemoniu.

²⁵ Alioze Yesu ha kunyingika manyonga jo, wambile kuli ayo ngwenyi, Wanangana weswe munuhandununa wene kumakaupwisa uhululu; limbo lieswe hanji zuwo lieswe mulihandununa liene kulichi kukola.

²⁶ Kachi Satana matuhwisa Satana, kachi malihandununa mwene; ngwe kuchi kevwe wanangana wenyi muukola?

²⁷ Kachi yami nakutuhwisa andemoniu ni tachi ja Mbelezepu, anenu a malunga ni tachi jaya akwatuhwisa? Kashika makapwa akwa kunupatwila.

²⁸ Alioze kachi yami ni tachi ja Spiritu ya Zambi nakutuhwisa andemoniu, kachi wanangana wa Zambi hiuneza hali yenu.

²⁹ Hanji ngwe kuchi umwe mahasa kunjila mu zuwo lia chitakame nikupunda yikwata yenyi shina hatangu makasa mwe chitakame? Mba mapunda liakulu zuwo lienyi.

³⁰ Yoze keshi hamwe ni yami, kanalimika ni yami; yoze keshi kukunga hamwe ni yami, kanamwanga.

³¹ Kashika ngunambe kuli yenu ngwami, Mulonga weswawo ni kushililika cheswacho kumakaakonekenacho atu, alioze kushililika Spiritu Musandu kechi kaakonekenacho atu.

³² Mweswawo mahanjika liji lia kulimika ni mwe Mwana Mutu, kumakamukonekenalio; alioze mweswawo mahanjika cha kulimika ni Spiritu Musandu, kechi kamukonekenacho, chipwe ha mwaka uno, chipwe ha uze muwizaho.

³³ Pemesenu mutondo, ni mihuko yawo muyipwa yipema; hanji pihisenu mutondo ni mihuko yawo muyipwa yipi: mumu mutondo kanaunyingika ku mihuko yawo.

³⁴ Enu, vungu lia yihili! ngwe kuchi munuhasa kuhanjika yipema se nuli yingulungulu? Mumu ku kulumbama cha mbunge kanwa mulihanjika.

³⁵ Mutu mupema ku upite upema wa mbunge masolola yuma yipema: ni chingulungulu ku upite wa ungulungulu wa mbunge masolola yuma ya ungulungulu.

³⁶ Alioze ngunambe kuli yenu ngwami, Liji lieswe liamokomoko lize atu mamba, kumakalilumbununa ha tangwa lia upatwilo.

³⁷ Mumu ku maliji je makakusambisa, ni ku maliji je makakuhisa.

³⁸ Hohene amwe a kuli akwa kusonyeka ni A-Fwariseu amukumbulwile ngwo, Longeshi, tunazange kumona chilayi kuli yena.

³⁹ Alioze waakumbulwile ngwenyi, Chisemuko cha ungulungulu kanda cha utanji muchifupa chilayi; ni chilayi kechi kaahacho shina chize cha profeta Yona:

⁴⁰ mumu chizechene ngwe Yona wapwile matangwa atatu ni ufuku utatu mu jimo lia yishi munene; chocho mwe Mwana Mutu kumakapwa mushi lia mavu matangwa atatu ni ufuku utatu.

⁴¹ Ha upatwilo akwa Ninive kumakakatuka hamwe ni chisemuko chino, o makachihisa: mumu alikonyekene ha kwambujola cha Yona; mba, umwe Wahiana Yona kuno kwali.

⁴² Ha upatwilo mwanangana wa pwo wa ku Sule kumakahinduka ni chisemuko chino, mba makachihisa: mumu iye wakatukile ku masongo a hashi mukwivwa mana ja Solomone; mba, umwe Wahiana Solomone kuno kwali.

⁴³ Alioze Spiritu ya luchisa muze te hatuhuka muli mutu maya ndusu muma mumu, nikufupa uhwimino, alioze keshi kuuwana.

⁴⁴ Hohene mamba ngwenyi, Munguhiluka ku zuwo liami muze natuhukile; mba muze te heza, maliwana liawashi, lia kukomba, lia kupemesa.

⁴⁵ Hohene maya, matwala hamwe nenyi maspiritu eka shimbiali a ungulungulu ahiana iye mwene, manjila, matwamamo, ni songo lia yoze mutu mulihiana kupiha. Chizechene kumuchikapwa nawa ku chisemuko chino cha ungulungulu.

⁴⁶ Shimbu te machihanjika ku mbunga, kumanyi, naye ni ana-akwo amanyine haze nikufupa kuhanjika nenyi.

⁴⁷ Mba umwe wambile kuli iye ngwenyi, Tala, noko ni ana-akwenu kanamana haze kanafupu kuhanjika ni yena.

⁴⁸ Alioze iye wakumbulwile yoze wahanjikile nenyi ngwenyi, Mama iya? Ana-akwetu aya?

⁴⁹ Wenyikine kuli tumbaji twenyi, ngwenyi, Talenu mama ni ana-akwetu.

⁵⁰ Mumu mweswawo malinga upale wa Tata yoze uli mu malilu, iye mapwa mwanakwetu ni pangiami ni mama.