Kolosu 2 - MUKANDA USANDU WA ZAMBI 1975

¹ Mumu ngunazange yenu nunyingike ngwe nakulitachika chikolo hali yenu, ni hali waze ali mu Laotisea, ni hali waze eswe kangumwene ku meso,

² hanga mbunge jo jikalilembejeke, ha kulinunga mu zango, hanga akapwe ni kulumbama cheswe cha chinyingi cha malinjekela, hanga akanyingike chijimbikilo cha Zambi, chenacho Kristu,

³ yoze muli iye upite weswe wa mana ni yinyingi kuwahengama.

⁴ Chino ngunambe, hanga niumwe kanda anwonga ni maliji a kulembejeka.

⁵ Mumu chipwe chishiko mu musunya, hindu kunguli hamwe ni yenu mu Spiritu, nikuwahilila ha kumona kululika chenu, ni kujikiza cha Ufulielo wenu muli Kristu.

⁶ Kashika chizechene ngwe nwatambwile Kristu Yesu mwe Mwene, chocho endenu muli iye;

⁷ nukatande miji, nukondomoke muli iye, nukalikoleze mu Ufulielo wenu, chizechene ngwe anulongesele, nikulumbama mu kusakwila.

⁸ Kanyamenu kuchina umwe manuhupa ni mana jenyi a kwonga nikulembejeka chamokomoko, nikulita ni ndongo ja atu, nikulita ni manyonga a hano hashi, hi a Kristu ko.

⁹ Mumu muli iye mwatwama kuzala tò cheswe cha Uzambi mu mujimba.

¹⁰ Ni muli iye kunwazala tò, mwenawo we mutwe wa mawanangana eswe ni yiyulo.

¹¹ Muli iye hananupwisa ngalami, ni ungalami hi wa kulinga ni moko ko, ha kuzula mujimba wa musunya mu ungalami wa Kristu;

¹² se hananufundu hamwe nenyi mu upapachiso, mu wenawo hananuhindwisa nawa hamwe nenyi ku Ufulielo ku kulinga cha Zambi, yoze wamuhindwishile hakachi ka afu.

¹³ Ni yenu, se nwapwile afu mu milonga yenu, ni mu ulima wa musunya wenu, yenu ngwami, Hananupwisa ni mwono hamwe nenyi, se hanatukonekena milonga yetu yeswe;

¹⁴ se hanajimuna chisoneko cha shimbi ja kutuhisa, chize chalimikine ni yetu: iye hanachichiza lume, nikuchihachila ha kulusu.

¹⁵ Se hanapupu mawanangana ni yiyulo, waahepwishile kumeso ja atu eswe, nikwakumba nayo.

¹⁶ Niumwe kanda anupatwila kashika ha kulia, hanji ha kunwa, hanji ha kutwala ku tangwa lia chiwanyino, hanji kakweji mwaha, hanji tangwa lia Sambata.

¹⁷ Yize yinapu yizulie ya yuma yize muyizaho; alioze mujimba wapwa wa Kristu.

¹⁸ Niumwe kanda anulimuna kwononona chenu, nikulengumuka ku mbunge yenyi ya kulikehesa, ni kuwayila cha angelo, nikupolongoza mu yuma yize hanamono, nikulifuza ni kunyonga chenyi cha musunya.

¹⁹ Keshi kukakaminya ku mutwe, kuli iye mujimba weswe, ha kulihoka, nikulinunga ku makonekeno ni mijipa, kuwakutatuka ni kutatwisa cha Zambi.

²⁰ Nyi nwafwile hamwe ni Kristu ku manyonga ja uhepuke a hano hashi, kuchi te nwakwenda ngwe nuli a hano hashi, nikulizeyesa ku ndongo jo?

²¹ Ngwo, Kanda nukwata, kanda nupanjika, kanda nusa minwe,

²² (yuma yize yeswe muyipola ha kulinga nayo), nikulita ni yambo ni longeso lia atu.

²³ Yenayo chamwenemwene yinasoloka ngwe mana yikwete mu uwayilo wa kuliyula, ni mbunge ya kulikehesa, ni kumwesa lamba we mujimba; alioze kuyishi tachi ja kukanjisa usolo wa musunya.