Hebreu 6 - MUKANDA USANDU WA ZAMBI 1975

¹ Kashika nikuhichika liji lia uputukilo lia Kristu, tusenyenu kulutwe ku ungunu; kanda tusela cheka nawa fundamentu ya kulikonyeka ku yitanga ya kufwa, ni Ufulielo kuli Zambi,

² ni ya longeso lia kusana, ni ya kusayika cha moko, ni ya Uhindukilo wa afu, ni ya upatwilo wa mutolo.

³ Ni chino mutulinga nyi Zambi matayiza.

⁴ Mumu ha kutwala kuli waze apangukile kamuwika, apanjikile chawana cha mwilu, aapwishile akwa kulianyina hali Spiritu Musandu,

⁵ apanjikile liji lipema lia Zambi, ni yipupu ya mwaka uze muwizaho,

⁶ nyi kulutwe mayehuka, kechi kuhasa kwahilwisa cheka nawa alikonyeke; se mahachila ha kulusu mwe Mwana Zambi cheka nawa; kakumukolesa sonyi kumeso ja atu eswe.

⁷ Mumu mavu aze akunwa vula yoze wakwizaho kanji, kakwima yilimalima hali waze akwalimina, kakutambula uwape kuli Zambi.

⁸ Alioze kachi mema mbimbo ni mazo-a-lunoka, kachi mapwa amokomoko, mapwa hakamwihi ni shingo; songo lio kuwema.

⁹ Alioze tunakunuka yuma yipema yahiana yino ha kutwala kuli yenu, akwetu a zango, ni yuma ya kulikaula ni ulamwino, chipwe tunahanjika chocho.

¹⁰ Mumu Zambi hi chihenge ko, akavulame milimo yenu ni zango lize nwalwezele ku jina lienyi, se nwavumbikile asandu, se nuchili ni kwavumbika.

¹¹ Tunazange ni mbunge yeswe mweswe wa kuli yenu akalweze kulipupwisa chimuwika, akasele chinyingi liakulu cha kutalatala ndo ku songo:

¹² hanga kunuchi kapwa yilenda, aiioze nukapwe akwa kwimbulula waze ku Ufulielo ni uhumikizo mahinga yilakenyo.

¹³ Mumu Zambi muze alakenyene kuli Apalahama, se kapwile ni yoze munene wahiana kulishinga ni jina lienyi, walishingile ni jina lienyi mwene ngwenyi,

¹⁴ Chamwenemwene, kuwahisa, kumungukakuwahisa, kwokesa kumungukakwokesa.

¹⁵ Chocho se wanyongonwene ni uhumikizo, wazukile chilakenyo.

¹⁶ Mumu atu chamwenemwene kakulishinga ni umwe Wahiana; ni shingo lia kukolesa liapwa songo lia kuhamika cheswe.

¹⁷ Muze mwene Zambi nikuzanga kulweza kuhiana chikolo kuli maswana ja chilakenyo, ngwe upale wenyi kuushi kuhasa kwalumuka, wachikolesele ni shingo.

¹⁸ Hanga ku yuma yiali kuyishi kuhasa kwalumuka, mu yino Zambi kechi kuhasa kuhanjika mahuza, tukapwe ni kulembejeka cha ngolo, yetu hitunachinyina kukwata ku kutalatala chize chili kulutwe lietu.

¹⁹ Chino tuli nacho ngwe ankora ya mbunge, kuyajikiza, kuyakola nawa, se yanjila muze muchima lia chikalakala cha hina;

²⁰ muze Yesu, iye tetekeli, hanatunjilila, se iye kapwa sasendote mukwa lutwe ndo ku miaka ya mutolo nikulita ni ngango ya Melekizeteke.