Hebreu 12 - MUKANDA USANDU WA ZAMBI 1975

¹ Kashika, se kanatuseleka ni mbunga yinene yipwa haha ya yela, tumbilenu milalu yeswe ni shili yize ya kutulimbalimba chashi chichize, tunyongononenu kuzombokela jila yize hanase kulutwe lietu.

² Tuhulikilenu meso kuli Yesu, Kaputu kanda mukwa kupwisa ungunu Ufulielo, mwenawo ha uwahililo uze asele kulutwe lienyi, wanyongonwene mu lamba lia kulusu, nikulelesa je sonyi; hanatwama ku kwoko lia chindume lia ngunja ya Zambi.

³ Mumu Zewulenu kanawa yoze wanyongonwene ha kuhamika chinene cha yivulumunyi, cha kulimika nenyi, hanga kunuchi kevwa yikatalo, kunuchi kulezumioka mu mbunge jenu.

⁴ Yenu kanda nuchilimika ndo ku manyinga, nikulitachika ni shili:

⁵ mba hinunavulama kushinjila chize chinanuhete ngwe kuli ana ngwo, Mwanami, kanda ulelesa kufumba cha Mwene, chipwe kanda ulezumuka muze makukumika kuli iye.

⁶ Mumu yoze Mwene mamuzanga mamulamba ha kufumba, malamba ni shikote ana eswe maatambula.

⁷ Kachi nwakunyongonona mu lamba lia kufumba, kachi Zambi kakulinga kuli yenu ngwe kuli ana; mumu mwana muka tato keshi kumulamba ha kufumba?

⁸ Alioze kachi lamba lia kufumba kunushi nalio, ha lize ana eswe kakutambula chihanda, kachi nunapu ana ja utanji, hi nuli ana amwenemwene ko.

⁹ Chikwo nawa, twapwile ni atata a mu musunya akutulamba ha kufumba, twaalemesene: Shinaho chikolo kutuchi kuzeyela kuli Tato ya maspiritu, tukapwe ni mwono, nyi?

¹⁰ Mumu o chamwenemwene, atulambile ha kutufumba ha matangwa akehe nikulita ngwe chaawahilile, aiioze iye hanga tukafumbuke, hanga tukaliangane ha usandu wenyi.

¹¹ Achi, lamba lieswe lia kufumba Unasoloka haliapwila ngwe kulishi uwahililo, aiioze lia chinyengo, hindu kulutwe mulima mihuko ya ululi wa sambukila kuli waze akulifumba nalio.

¹² Kashika ololenu moko aze a upekepeke, ni makungunwa a kukokoloka.

¹³ Lingenu majila a kululama ha molu jenu, hanga chilema kechi kakondoloka, aiioze Shinaho akahinduke.

¹⁴ Kaulenu sambukila hamwe ni atu eswe, ni usandu, uze mutu kechi kamona Mwene nyi keshi nawo.

¹⁵ Talenu kanawa kuchina mapwa umwe wakuhona vumbi lia Zambi, kuchina muji umwe wa usasu muze wasoka, muunupinjisa, ni anji malichisa nawo;

¹⁶ kuchina chitanji umwe, hanji chijiluke, ngwe Esau, yoze ha kulia chimuwika walanjishile wata wenyi.

¹⁷ Mumu nunanyingika chipwe kulutwe, muze azangile kuhinga uwape, alitunyineye; (mumu kawanyine muhela akalikonyeke), chipwe waufupile chikolo ni masoji.

¹⁸ Mumu kunwejile ku mulundu uze mahasa kuukwata, wapwile weswe wa kahia, walayile ni milima ni chijimbi

¹⁹ ni kuhanjika cha chitavwi, ni kuhanjika cha maliji; chize waze evwile, alembele nilimwe liji likwo kanda akahanjika kama kuli ayo;

²⁰ mumu kahashile kunyongonona ha chize ayulile, nyi kachi kashitu maheta kama ku mulundu akamwase mawe.

²¹ Ni usolwelo uze wahiana woma, kashika Mose wambile ngwenyi, Ngunevu woma kuhiana ngunachikima.

²² Alioze yenu hinuneza ku mulundu wa Zaione, ni ku limbo lia Zambi ya mwono, Yerusaleme ya mwilu; ni ku yizavu yinji ya angelo;

²³ che kukungama cha eswe; ni ku chikungulwila cha atangu, waze anasonewa mwilu; ni kuli Zambi mwe Sopi ya eswe, ni kuli maspiritu ja akwa ululi hanaapwisa angunu,

²⁴ ni kuli Yesu mwe chitakanyishi cha usendo waha, ni ku manyinga a kusapwila waze akuhanjika yuma yipema yahiana Abele.

²⁵ Talenu kanda nulituna yoze unahanjika. Mumu kachi kapulukile muze alitunyine yoze waatumbile hano hashi, kachi kuhiana chikolo yetu kutuchi kuputuka kachi mutumba manyima kuli yoze unafumbu mwilu:

²⁶ yoze liji lienyi ha matangwa aze lianyikishine hashi; aiioze haliapwila hanalakenya ngwenyi, Hindu chisuho chimuwika nawa, mungukatukungisa hi hashi wika ko, aiioze lilu nawa.

²⁷ Alioze liji lino ngwo, Hindu chisuho chimuwika nawa, linalumbunuka kunungunuka cha yuma yize ya kunyika, ngwe ya ku yuma ya kutunga, hanga yuma yize kuyishi kunyika yikasale.

²⁸ Kashika, ha kutambula wanangana uze kuushi kuhasa kunyika, tupwenu ni vumbi, ku lize tukavumbike Zambi ni uvumbiko wa kupemena chikolo, ni ulemeso ni woma.

²⁹ Mumu Zambi yetu iye kahia kakulalisa.