Efesu 4 - MUKANDA USANDU WA ZAMBI 1975

¹ Yami kashika, funge muli Mwene, ngunaliumbu kuli yenu, nukende ngwe chinatela kutambika chize hananutambika nacho,

² ni mbunge yeswe ya kulikehesa, ni umbovu, hamwe ni uhomboloji, nikulihumikiza umwe kuli mukwo mu zango,

³ nukalipupwise kufunga kununga cha Spiritu ni muya wa sambukila.

⁴ Kuuli mujimba umuwika, ni Spiritu umuwika, ngwe hananutambika mu kutalatala chimuwika cha kutambika chize anutambikile nacho;

⁵ Mwene umuwika, Ufulielo umuwika, upapachiso umuwika;

⁶ Zambi umuwika, Tato ya eswe, yoze uli helu lia eswe, ni kuli eswe, ni muli yetu eswe.

⁷ Alioze kuli mweswe hakachi ketu hanatwehe vumbi, nikulita ni njongo ya chawana cha Kristu.

⁸ Kashika kanambe ngwenyi, Muze azezukile kwilu, wafungile funge anji, wahanyine yawana kuli atu.

⁹ (Achi, ha kwamba ngwo, Wazezukile, kuchi shina hatangu wahulumukine nawa mu yihanda ya kushi ya hashi?

¹⁰ Yoze wahulumukine mwenawo wazezukile nawa helu lia malilu eswe, hanga akazalise yuma yeswe.)

¹¹ Iye hanahana amwe apostolo; ni amwe aprofeta; ni amwe akwa kwambujola; ni amwe tulayi ni alongeshi;

¹² kululika asandu ha milimo ya uvumbiko, mukukolesa mujimba wa Kristu,

¹³ ndo yetu eswe mutuheta ku kununga cha Ufulielo, ni ku chinyingi cha mwe Mwana Zambi, kuli mutu mungunu, ku cheseko cha Chizundamo cha kuzala tò cha Kristu:

¹⁴ hanga kutuchi kapwa ana-akemba nawa, ngwe tukahunguke ni mikanya ni kuhungumioka kweka ni kweka ni fuji yeswe ya longeso, ku kwonga cha atu ni unjiliji nikulita ni maliji a kuhengesa;

¹⁵ alioze nikukakaminya ku umwenemwene mu zango, tukatatuke ni yuma yeswe kuli mwe mutwe, iye Kristu.

¹⁶ Kuli iye we mujimba weswe wakusepekenya nikununga, ni chize makonekeno eswe akuhana, nikulita ni cheseko cha kulinga cha chihanda cheswe, chakuweza ku kulitatwisa cha mujimba wene mu zango.

¹⁷ Kashika chino ngunambe, ngunashindakenya muli Mwene ngwami, Kanda nukenda nawa ngwe mavungu akwenda mu kunyonga cho chamokomoko,

¹⁸ nikulá mu kunyonga cho, kahandunuka ku mwono wa Zambi mumu ha kwalajala chize chili muli ayo, mumu ha ukalu wa mbunge jo.

¹⁹ Eno se halitwamina kwivwa chimwe, hanalitumbikila ku ujila, mukulinga luchisa mweswe, hamuwika ni chipululu.

²⁰ Alioze yenu kunwalilongesele Kristu chocho;

²¹ kachi chinapu chocho ngwe hinunamwivu, hanufumba muli iye, ngwe umwenemwene uli muli Yesu.

²² Ngwe nukazule mutu mukulu, yoze wakulipihisa nikulita ni usolo wa kwonga, nikulita ni kwenda chenu cha kunyima;

²³ nukapwe aha mu Spiritu ya kunyonga chenu,

²⁴ nukazale mutu mwaha, yoze hanamutange mu ululi ni usandu wamwenemwene nikulita ni Zambi.

²⁵ Kashika nikumbila mahuza, hanjikenu umwenemwene mweswe ni mwenyembo wenyi; mumu tuli yihanda yimwe ya mukwo.

²⁶ Tenukenu; kanda nuvulumuna; tangwa kanda Ukanjila ha utenu wenu;

²⁷ mwe Satana kanda numwaha unjililo.

²⁸ Yoze weyile kanda akeya nawa; alioze Shinaho akakilikite, akalinge yipema ni moko jenyi, hanga akapwe ni chize cha kulianyina ni yoze mahona.

²⁹ Liji lia kupihisa nilimwe kanda lituhuka mu makanwa jenu, alioze lize Unapeme ha kukolesa, nikulita ni chize muchitamba, hanga Ukahane vumbi kuli waze akwivwa.

³⁰ Kanda nuvwisa chinyengo Spiritu Musandu wa Zambi, yoze muli iye hananujiki ni Chijikilo ndo tangwa lia ukule.

³¹ Usasu weswe, ni ufwatulo, ni utenu, ni zungo, ni kutukana, yimbilenu, hamwe ni uhuka weswe.

³² Pwenu ni utu umwe kuli mukwo, akwa mbunge ja kwivwa keke, nikulikonekcna umwe ni mukwo, chizechene ngwe Zambi nawa hananukonekena muli Kristu.