Amose 8 - MUKANDA USANDU WA ZAMBI 1975

¹ Chocho Mwene Yehova yangulweza, kumanyi mutonga wa mihuko ya lwiza.

² Mba yamba ngwenyi, Amose, yika unamono? Yingwamba ngwami, Mutonga wa mihuko ya lwiza. Yehova yamba kuli yami ngwenyi, Songo hiliaheta kuli atu jami A-Izalele; chichi kwapalika nawa nilimwe tangwa.

³ Mwene Yehova kanambe ngwenyi, Miaso ya mu tembele muyalumuka kulila mbimbi ha tangwa lize; mijimba ya afu muyikapwa yinji makayimbila kweswe nikuhola.

⁴ Ivwenu chino, yenu nwakuliata akwa kuhona; nwakusulisa yiswale mu chifuchi ngwenu,

⁵ Chiwanyino cha kakweji mwaha hali muchisulila hanga tukalanjise mbuto? Sambata ola yika muyipatuka, hanga tukakulise tiliku, tukakehese njongo ni kuweza ku ndando, ni kwonga ni mbalansa ja mahuza,

⁶ tukalande yiswale ni prata; tukalande akwa kuhona ni haku jiali nikulanjisa yiswaswa ya tiliku?

⁷ Yehova halishinga ni ulemu wa Yakomba ngwenyi, Pundu chichi kavulama yitanga yo niyimwe.

⁸ Te chifuchi kuchichi kachikima ha chikuma chino? Ni waze eswe atwamamo kechi kalishimwoka? Cheswe te kuchichi kazunduka ngwe lwiji Nilo, ni kupindangana ni kuhuwa nawa ngwe Nilo wa Engitu?

⁹ Mwene Yehova kanambe ngwenyi, Ha tangwa lize mungukanjisa tangwa ha tangwa ha muchima. Mungulayisa hashi ha ola ya mwalwa.

¹⁰ Mungukalumuna yiwanyino yenu mu kulishimwoka, ni miaso yenu mu kulila lungungu. Mungukajika mijimba yeswe ni yikeleyi, mungukasa lwole ha mitwe yeswe. Munguchipwisa ngwe kulila hali mwana wa lunga wa wika. Songo liacho mulipwa ngwe tangwa lisasu.

¹¹ Mwene Yehova kanambe ngwenyi, Matangwa kaneza muze mungukatuma kapunga mu chifuchi. Hi kapunga ka mbolo ko, hanji pwila ya meya, alioze ha kwivwa liji lia Yehova.

¹² Kumakendangana chize ku mbaka ndo ku mbaka, chize ku Norte ndo ku Chivumbuko; kumakazomboka sali ni sali nikufupa liji lia Yehova, alioze kechi kaliwana.

¹³ Ha tangwa lize *avirgem apema ni akweze makalezumuka ni pwila.

¹⁴ Waze akulishinga ni shili ya Samaria, nikwamba ngwo, Ni mwono wa zambi ye, Ndane; hanji, Ni mwono wa jila ya Mbia-shipa, o kumakalimbuka; kechi kahinduka nawa nilimwe tangwa.