Alevi 24 - MUKANDA USANDU WA ZAMBI 1975

¹ Yehova yamba kuli Mose ngwenyi,

² Ambila A-Izalele akakunehene maji apema a kusohola a azeite a lutemo hanga ndeya yikatemuke ufuku ni mwalwa.

³ Haze lia chikalakala cha Shindakenyo, mu mbalaka ya chikungulwila Arone makayilulika ufuku ni mwalwa kumeso ja Yehova. Chino muchikapwa chiyulo cha mutolo ndusu yisemuko yenu yeswe.

⁴ Akafunge ndeya ja kululika ha chikwachilo cha ndeya cha oru ya kusayisa kumeso ja Yehova ufuku ni mwalwa.

⁵ Chikwo nawa munwanda wunga wafufunuka nukalinge nawo kumi lia mbolo ni mbolo jiali. Mbolo yeswe muyipwa ya yihanda yiali ya ku kumi lia yihanda ya njongo ya efa.

⁶ Munukajilonga mu mikala yiali, jisambano mu mukala, jisambano mu mukala ha mesa ya oru ya kusayisa.

⁷ Munukasa libano yipema ha mikala yeswe yiali, jikapwe mbolo ja Chiwulwiso, mulambu wa kahia kuli Yehova.

⁸ Sambata ha Sambata Arone makajilonga kumeso ja Yehova hali A-Izalele. Usendo wa mutolo kashika kanda ahona.

⁹ Mujipwa ja mbala ja Arone ni anenyi a malunga. Majilia kumwe kuma kusandu mumu kuli iye mujipwa chihanda chisandu chahiana hakachi ka milambu ya kahia kuli Yehova. Yino chiyulo cha mutolo.

¹⁰ Tangwa limwe mwana wa lunga wa umwe pwo Ka-Izalele, alioze tato Ka-Engitu, wendele hakachi ka A-Izalele. Mwe mwana wa Ka-Izalele wazwelele ni tunwe Ka-Izalele mu chilombo.

¹¹ Mwana wa lunga wa pwo Ka-Izalele yashililika lie Jina, ha kutukana. Yamutwala kuli Mose. Jina lia naye Shelomite, mwana wa Ndibri, wa ku vungu lia Ndane.

¹² Yamufunga ndo Zambi masolola upale wenyi.

¹³ Yehova yamba kuli Mose ngwenyi,

¹⁴ Mukwa kutuka numunehe haze lia chilombo, waze eswe amuvwile kutukana akase moko jo ha mutwe wenyi, mba akwa chikungulwila eswe akamwase mawe.

¹⁵ Amba nawa kuli A-Izalele ngwe, Mweswe matuka Zambi yenyi akambate mulonga wenyi.

¹⁶ Yoze mashililika jina lia Yehova akamushihe. Akwa chikungulwila eswe akamwase mawe. Apwe njize, apwe mwenyembo, muze mashililika lie Jina, akamushihe.

¹⁷ Yoze mashiha mutu, neye akamushihe,

¹⁸ Yoze mashiha chimuna mamufweta, mwono ha mwono.

¹⁹ Muze umwe mapihisa mukwo, chizechene ngwe halinga, neye chocho akamulinge.

²⁰ Chifwaha cha kumakuna ha chifwaha cha kumakuna. Liso ha liso. Lizo ha lizo. Chizechene ngwe hapihisa mutu neye chocho akamupihise.

²¹ Yoze mashiha chimuna mamufweta. Yoze mashiha mutu kumafwa.

²² Munupwa ni shimbi yimuwika kuli njize ni kuli mwenyembo, mumu yami Yehova Zambi yenu.

²³ Chocho Mose yámbila A-Izalele mba yatwala yoze watukanyine haze lia chilombo. Yamwasa mawe. Chocho A-Izalele yalinga chize Yehova hatuma Mose.