Alevi 19 - MUKANDA USANDU WA ZAMBI 1975

¹ Yehova yamba kuli Mose ngwenyi,

² Amba ku chikungulwila cheswe cha A-Izalele ngwe, Pwenu asandu mumu yami Yehova Zambi yenu nguli musandu.

³ Enu eswe mutu ni mutu nukalemese noko ni tatenu. Nukafunge Sambata jami. Yami Yehova Zambi yenu.

⁴ Kanda nutewulukila ku tuponya, hanji ku tuzambi twa kuzuzulula. Yami Yehova Zambi yenu.

⁵ Muze namutambula chitapo cha mulambu wa sambukila kuli Yehova, munuchilambula hanga anutambule kanawa.

⁶ Makachilia tangwa lioliene lia kuchilambula hanji ha kucha. Chihanda cheswacho chasala ndo tangwa liamuchitatu machocha mu kahia.

⁷ Nyi machilia ha tangwa liamuchitatu chapwa cha kuvwisa lwaji. Kechi kuchitambula.

⁸ Mweswawo machilia makambata uhenge wenyi mumu hajilula chuma chisandu cha Yehova. Amutete hakachi ka atu jenyi.

⁹ Muze munukacha mbuto ya mu chifuchi chenu kanda nukacha mu minda yenu ndusu ndo ku njiza. Chikwo nawa kanda nukahuhujola yize yinasala ha kucha.

¹⁰ Kanda nuhela uva yenu hululu, chipwe uva yize yaholokela hashi kanda nukayanda. Munuyihichikila chiswale ni njize. Yami Yehova Zambi yenu.

¹¹ Kanda nwiya. Kanda nwonga. Kanda nuhanjika mahuza umwe kuli mukwo.

¹² Kanda nulishinga ni mahuza ku jina liami, nukajilule jina lia Zambi yenu. Yami Yehova.

¹³ Kanda nupinjisa mukwenu hanji kumupupa. Fweto ya ngamba kanda yitwama mu kwoko lie ndusu ufuku ndo chimene.

¹⁴ Kanda nutuka kafwa-matwi. Kanda nusa chitalingiso mu jila ya kafwameso alioze pwenu ni woma kuli Zambi yenu. Yami Yehova.

¹⁵ Kanda nupatula ni uhenge hanji ni katonde kuli chiswale, hanji ni ulemeso kuli mulemu. Alioze munukapatwila mukwenu ni ululi.

¹⁶ Kanda nwendangana ni saki hakachi ka atu jenu. Kanda numanyina manyinga a mukwenu. Yami Yehova.

¹⁷ Kanda uswekela mukwenu kole mu mbunge ye, alioze hanjika nenyi kuchina musala ni mulonga mumu hali iye.

¹⁸ Kanda ukakala mulonga. Kanda ukapwa ni kakucha mu mbunge kuli atu je, alioze ukazange mukwenu ngwe wakulizanga yena mwene. Yami Yehova.

¹⁹ Fungenu yiyulo yami. Kanda nutayiza yimuna jenu kusema ni vungu lieka. Kanda nukuwa mbuto jiali munda umuwika. Kanda nuzala mazalo a mahina aali alipwila.

²⁰ Nyi lunga mapomba ni pwo wa kapinji yoze hamutenda kuli mukwo, alioze kanda achimukula hanji kumutusula, munuchisopa. Kechi kwashiha se pwo katusukile.

²¹ Alioze lunga akanehe mulambu wa uhie hali iye mwene kuli Yehova. Maneha kuji ya panga ku chikolo cha mbalaka ya chikungulwila akapwe mulambu wa uhie.

²² Sasendote mafuka mulonga wenyi havulumuna ni kuji ya panga wa mulambu wa uhie kumeso ja Yehova mba mulonga havulumuna mamukonekenawo.

²³ Muze mununjila mu chifuchi munukatumba mitondo yeka ni yeka ya kulia, mihuko yayo muyikapwa ngwe ya kujilika. Muyikapwa ya kujilika kuli yenu miaka yitatu. Kanda nukayilia.

²⁴ Ha mwaka wamuchiwana mihuko yayo muyikapwa yisandu, muyikapwa mulambu wa uhaliso kuli Yehova.

²⁵ Alioze ha mwaka wamuchitano munukalia mihuko hanga yikeme ya kulumbama kuli yenu. Yami Yehova Zambi yenu.

²⁶ Kanda nukalia yifwo niyimwe hamuwika ni manyinga jayo. Kanda nukalinga yuma ya kutaha ni ya wanga.

²⁷ Kanda nukakelula kambu jenu ha mbalangwe. Kanda nukapihisa masongo a wevu.

²⁸ Kanda nukaliteta ha mijimba yenu mumu hali afu. Kanda nukachata mijimba yenu. Yami Yehova.

²⁹ Kanda ukalumbula mwané wa pwo ha kumutumbika ku ukoi, kuchina chifuchi cheswe muchilimbukila mu ukoi, mba chifuchi cheswe chikazale tò ni ungulungulu.

³⁰ Fungenu Sambata jami. Lemesenu zuwo liami lisandu. Yami Yehova.

³¹ Kanda nukatewulukila kuli akwa mahamba ni akwa tufutafuta. Kanda nukaafupa nukalipihise no. Yami Yehova Zambi yenu.

³² Lwezenu vumbi kuli mukwa kambu jitoma. Munukalemesa meso ja mukulwana. Munukapwa ni woma kuli Zambi yenu. Yami Yehova.

³³ Nyi njize hatunga ni yenu mu chifuchi chenu, kanda munulinga chipi.

³⁴ Njize yoze hatunga ni yenu mapwa ngwe mwenyembo hakachi kenu. Munumuzanga ngwe nwakulizanga yenwene, mumu ni yenu nwapwile njize mu chifunchi cha Engitu. Yami Yehova Zambi yenu.

³⁵ Kanda nupatula ni uhenge, chipwe ni kweseka cha kusuha, hanji pezu, hanji kwalula.

³⁶ Mbalansa jenu jikapwe ja ululi, hi pezu ja ululi, ni *efa ja ululi, ni *hine ja ululi. Yami Yehova Zambi yenu yoze wanuchijile ku chifuchi cha Engitu.

³⁷ Munukafunga yiyulo yami yeswe ni shimbi jami jeswe kuyilinga. Yami Yehova.