2 Timoteu 1 - MUKANDA USANDU WA ZAMBI 1975

¹ Yami Paulu, postolo wa Yesu Kristu ku upale wa Zambi, nikulita ni chilakenyo cha mwono uze uli muli Kristu Yesu,

² Kuli Timoteu, mwanami ngunamuzange chikolo: Vumbi, ni keke, ni sambukila ya kuli Zambi Tata ni Kristu Yesu Mwene wetu.

³ Kakusakwila kuli Zambi, yoze nakumulingila chize kuli akaka, ni mbunge yipema, ngwe nakukuvulwoka ha kuliumba chami, ufuku ni mwalwa, nikulitwamina nichimwe.

⁴ Nakwivwa usona kukumona, ha kwiwuluka masoji je, hanga ngukazale tò ni uwahililo;

⁵ ha kwiwuluka Ufulielo uze kuushi ulembekese, uze uli muli yena; uze wene watwamine hatangu muli kakenu Loye, ni muli noko Uhise mba ngunakunuka ngwami, Watwama muli yena nawa.

⁶ Ha chikuma chino ngunakwiwulula ukawunge chawana cha Zambi, chize chili muli yena ku kusayika cha moko jami.

⁷ Mumu Zambi katuhele Spiritu ya mwongo; alioze ya tachi, ni zango, ni mana.

⁸ Kashika kanda ukevwa sonyi ha Shindakenyo ya Mwene wetu, chipwe hali yami funge yenyi: alioze nyongonona ni utunu ndusu mu yipi hamwe ni sango lipema, nikulita ni tachi ja Zambi;

⁹ yoze hanatulamwina, hanatutambika ni kutambika chisandu, hi nikulita ni yitanga yetu ko, alioze nikulita ni upale wenyi mwene ni vumbi lienyi, lize atuhele shimbu miaka kanda yipwa.

¹⁰ Alioze haliapwila hanalisolola ku usolokelo wa Chilamwina chetu Yesu Kristu, yoze hanamanununa kufwa, hananeha ku pangu mwono kupola chakuhi mu sango lipema.

¹¹ Ku lino hanangusela mukwa kwambujola, ni postolo, ni longeshi ya akwa mavungu.

¹² Ha chikuma chino nawa, nakwivwa lamba lia yino yuma; alioze chishi kwivwa sonyi; mumu ngunanyingika yoze hingunamufuliela; ngunakunuka ngwami, Kanahase kufunga chize hingunamukunjika ndo tangwa lize.

¹³ Lalaminya ku cheseko cha maliji angunu aze hiunevu kuli yami, ni Ufulielo ni zango, yize yili muli Kristu Yesu.

¹⁴ Chize chuma chipema akukunjikilecho, funga ku tachi ja Spiritu Musandu, yoze wakutwama muli yetu.

¹⁵ Unanyingika chino, ngwami, Waze eswe ali mu Eshia hanakondoloka kuli yami; hakachi ko Fwijelu ni Hemojene.

¹⁶ Mwene akevwe keke hali akwa zuwo lia Onesefworu: mumu wanguhuzulwile kanji, kevwileko sonyi ha lenge liami.

¹⁷ Alioze muze apwile mu Roma, wangufupile ni mbunge yeswe, ndo wanguwanyine.

¹⁸ (Mwene akamwehe kuwana keke kuli Mwene ha tangwa lize;) ni uvumbiko wunji upwa haha wanguvumbikile nawo mu Efwesu, yena kuunanyingika kanawa.