1 Yoano 1 - MUKANDA USANDU WA ZAMBI 1975

¹ Yoze wapwile chize ku uputukilo, yoze Hitunamwivu, yoze hitunamumono ni meso jetu, yoze hitunamutale, ni moko jenu hitunamuvwavwata, ha kutwala ku liji lia mwono,

² (hanasolola mwono, mba hitunamono, twakushindakenya, tunanwambulwila mwono wa mutolo, yoze wapwile hamwe ni mwe Tata, hanamusolola kuli yetu);

³ yoze hitunamumono, Hitunamwivu, tunanwambulwilaye, hanga ni yenu nawa nukalikunde hamwe ni yetu; ni kulikunda chetu chamwenemwene chili hamwe ni mwe Tata, ni hamwe ni Mwanenyi Yesu Kristu:

⁴ Yino yuma tunasoneka, hanga uwahililo wenu ukazale tò.

⁵ Lino lie liji twevwile kuli iye, tunanwambulwilalio, ngwo, Zambi iye pangu, muli iye milima yakuhi niyimwe.

⁶ Kachi mutwamba ngwetu, Tunalikundu nenyi, hindu mutwenda mu milima, kachi mutuhanjika mahuza, kutushi kulinga umwenemwene.

⁷ Alioze kachi mutwenda mu pangu ngwe iye uli mu pangu, kachi mutulikunda umwe ni mukwo ni mukwo, ni manyinga a Yesu Mwanenyi kakutupemesa ku shili yeswe.

⁸ Kachi mutwamba ngwetu, Kutushi shili, kachi tunaliongo, ni umwenemwene kuushimo muli yetu.

⁹ Kachi mutushikisa milonga yetu, kachi iye wamwenemwene, iye mukwa ululi kutukonekena milonga yetu, ni kutupemesa ku uhenge weswe.

¹⁰ Kachi mutwamba ngwetu, Kutwavulumwine, kachi mutumupwisa mukwa mahuza, ni liji lienyi kulishimo muli yetu.