Mateu 28 - NOVO TESTAMENTO EM NDAU

Kumuka kwa Jesu

¹ Ngosure kwo sabatha, mu mambakweja ngo zuva ro kutanga ro vhiki kwakaviya Mariya Magadhareni, no umweni Mariya koovona guva.

² Vonayi, kwayinga kuriyo kuzungunyika kukuru kwo nyika; ngokuti ngirosi ya Mambo yakabzuka kubva mu gore, yakaviya yakamburumbuja ikabvisa buwe, nayo yakagara panyezuru paro.

³ Kuvoneka kwayo kwayinga kwakadari ngo mbheni, no nguvo jayo jayinga jakachena kudari ngo chando.

⁴ Ngokuyitya varindi vakahuta, vakayita inga vakafa.

⁵ No ngirosi yakati kumajimayi: “Musatya imwimwi; ngokuti ndinoziva kuti munopshaka Jesu uwo wakakohomehwa.

⁶ Aaripi pano akadi; ngokuti wamuka, kudari ngo zvaakavereketa. Viyanyi muvone pandau paayinga akavata.

⁷ Kasiranyi muende mubvunje vajiji vake, kuti, wamuka kwo vakafa, vonanyi unotungamira kuenda mu Garire.”

⁸ Navo vakaenda ngokukasira vechibva pa guva, vechitya no kudakara kukuru; vakagogoma koozivisa vajiji vake.

⁹ Vonayi, Jesu wakasongana navo, akati: “Ndinomuchungamija.” Navo vakaviya vakabata tshoka jake, vakamudira.

¹⁰ Naapo Jesu wakati kwavari: “Musatya; endanyi mwoobvunja vanukuna vangu kuti vaende mu Garire, vanozondivona apo.”

Kunyepa kwo vaJudha

¹¹ Zvino vachaenda, vonayi vamweni vo varindi vakaviya ku dhoropa, vakasumurira vapristi vakuru vese izvo zvakaitika.

¹² Naapo vakaungana pamwepo no vakuru, apo vayinga vapangana, vakapa mare yakawanda kumasocha,

¹³ vechiti: “Nanganyi imwimwi kuti vajiji vake vakaviya no usiku vakamuba, takavata.

¹⁴ No kudari izvi zvikazwika ngo mutongi, tinozomuvhikira nokuita kuti musava no ndava.”

¹⁵ Navo vakaashira mare iyo, vakayita kudari ngo zvovakapangwa, no izwi iri rakaparajwa pakati po vaJudha mbhera na nyamasi.

Jesu unovoneka ku vajiji vake mu Garire

¹⁶ No vajiji vari gumi naumwe vakaenda mu Garire, ku dundhu iro raakavapanga Jesu.

¹⁷ Naapo vamuvona vakamudira; asi vamweni vakagononda.

¹⁸ Na Jesu wakaviya kwavari, wakavereketa, echiti: “Simba rese rakapuwa kwendiri mu gore, no mu nyika.

¹⁹ Ndizvo, endanyi, mwechiita vajiji ku majinja ese, mwechivabhapatisa ngo zina ra Baba, noro Mwana, noro Mweya Wakachena.

²⁰ Mwechivajijisa kungwarira zviro zvese zvo ndakamupanga; vonanyi, ndinemwi mazuva ese mbhera kuguma kwo nyika.”