Marku 8 - NOVO TESTAMENTO EM NDAU

Jesu anopekeja zvokuha vandhu vari zviuru zvirongomuna

¹ Ngaao mazuva apo kwayivapozve mbungano huru, yayinga isina cho kuha, iye wakadanija vajiji, wakati kwavari:

² “Ndino svipa mwoyo ngo ndava yo mbungano, ngokuti yakagara neni zvino aamazuva matatu, isina cho kuha.

³ Kuti ndikavaendesa kumakanyi kwavo vasati vaha, vanozowa ngo njara mu njira; no vamweni vavo vakabva ndhambo.”

⁴ No vajiji vake vakamupingura: “Mundhu ungazviwana kwapi zvimanda kuti agutise ava vandhu muno mushango?”

⁵ Naye wakavabvunjisa, kuti: “Muno zvimanda zvingana?” Vakati: “zvinomwe.”

⁶ Wakapanga mbungano kuti igare pasi. Wakatora zvimanda zvinomwe, wakazvibonga, wakazvigura, wakazvipa ku vajiji vake, kuti vazvidire pamberi pavo; navo vakazvidira ku mbungano.

⁷ Navo vayiva no hove doko shomani; wakajibonga wakananga kuti jidihwevo pamberi pavo.

⁸ Navo vakaha, vakaguta; navo vakabojera matshekeneswa ozvakasara akaita zvitengu zvinomwe.

⁹ Avo vakaha vaikhwedera mutengo wo zviuru zvirongomuna (4.000); naye wakavaendesa.

¹⁰ Paripo wakanghwina mu ngarava no vajiji vake, vakaguma mu nyika yo Dharamanuta.

Zvivoniso zvo simba ra Jesu

¹¹ Vafarisi vakaviya apo, vakatanga kumubvunjisa, vechipshaka kwaari chivoniso chinobva mu gore, vechimueja.

¹² Naye wakafemeruka zvikuru mu mweya mwake, wakati: “Uwu mubarihwana unopshaka ngenyi chivoniso? Ngozvirokwazvo ndinoti kwomuri mubarihwana uwu auzopuwi chivoniso.”

¹³ Wakavasiya, wakanghwinazve mu ngarava, wakaambuka mwombera.

Mumera wo vafarisi no wa Herodhi

¹⁴ Vajiji vayinga vakanganwa kutora chimanda; vayinga no chimanda chimwe choga mu ngarava.

¹⁵ Naye wakavapanga, echiti: “Ngwaranyi mumera wo vafarisi no mumera wa Herodhi.”

¹⁶ Vakapangana pakati pavo, vechiti: Ngokuti atina chimanda,

¹⁷ Jesu echiziva wakati kwavari: “Munopangana ngenyi ngokuti amuna chimanda? Amusati mwaziva nokuti kuzwisisa here? Mwoyo yenyu ichakandopata here?

¹⁸ Muno majiso musikavoni here, muno njeve musikazwi here? Amucherecheji here?

¹⁹ Naapo zvondakagurira vandhu vari zviuru zvishanu (5.000) zvimanda zvishanu, mwakabojera zvitengu zvingana zvakazara ngo matshekeneswa?” Vakati kwaari: “Gumi na zviviri.”

²⁰ “Naapo zvimanda zvinomwe zvakagurihwa ku vandhu vari zviuru zvirongomuna (4.000) mwakabojera zvitengu zvingana zvakazara ngo matshekeneswa?” Vakati kwaari: “Zvinomwe.”

²¹ Naye wakati kwavari: “Amusati mwazwisisa here?”

Kupembenujwa kwo bofu mu Bhetisaidha

²² Vakaguma mu Bhetisaidha. Vakazisa kwaari bofu, navo vakamupota kuti aripshase.

²³ Naye wakaribata ngo nyara, wakaribudisa kunja kwo dhoropa; naapo apfira mata mumajiso aro, wakadira nyara jake panyezuru paro, wakaribvunjisa kuti: “Unovona chiro here?”

²⁴ Naro rakaringira rikati: “Ndinovona vandhu asi ndinovavona inga miti inofamba.”

²⁵ Wakadirazwe nyara jake panyezuru po majiso aro, naro rakaringisisa, rakapembenujwa, rikavona zviro zvese pambhene.

²⁶ Wakariendesa kanyi kwaro echiti: “Usanghwinazve mundharaunda.”

Pedru unopupura kuti Jesu ndiye Kristu

²⁷ Jesu no vajiji vake vakaenda vakanghwina mu maguta wo Khesariya Firipi. Vechiri mu njira wakabvunjisa vajiji vake, echiti kwavari: “Vandhu vanoti, inini ndiri yani?”

²⁸ Navo vakamubvunja, vechiti: “Johani Mubhapatisi, no vamweni vanoti, Erija, asi vamweni vanoti, uri umwe wo vaprofeti.”

²⁹ Naye wakavabvunjisa: “Imwimwi munoti ndiri yani?” Pedru wakapingura wakati kwaari: “Iwewe uri Kristu.”

³⁰ Naye wakavapangisisa kuti vachazobvunja mundhu ndiye.

Jesu unovereketa ngo kufa no kumuka kwake

³¹ Wakatanga kuvajijisa kuti kunosisira kuti Mwana wo Mundhu atambujike ngo zvakawanda, no kurambwa ngo vakuru, no vapristi vakuru, no vatari, aurawe, ngosure kwo mazuva matatu amukezve.

³² Wakavereketa izwi iri pambhene; Pedru wakamutora kuenda padivi; wakatanga kumuthusa.

³³ Asi iye, naatenderuka, avona vajiji vake, wakamurambisa Pedru, wakati: “Ibva uende sure kwangu, Sathani; ngokuti auzwisisi ngo zva Mwari, asi izvo zvo vandhu.”

³⁴ Naapo wadanijirazve kwaari mbungano pamwepo no vajiji vake wakati kwavari: Ndiyani unoda kuviya sure kwangu, ngaajirambe, atore muchinjiko wake anditevere.

³⁵ Ngokuti pikija ndiyani unoda kuponesa ndaramo yake unozorashikihwa ndiyo, no uwo unozorashikihwa ngo ndaramo yake ngo ndava yangu no yo vhangeri, unozoiponesa.

³⁶ Ngokuti mundhu unozoviihwa ngenyi, kudari echiviihwa ngo nyika yese, arashe ndaramo yake?

³⁷ Ngokuti mundhu unozopenyi kuti aviihwe ngo ndaramo yake?

³⁸ Ngokuti pikija ndiyani unozopsheruka ndini, no mazwi angu kuno uwu mubarihwana unoomba no unoshaisha, Mwana wo Mundhu unozopsherukavo ndiye apo oozoviya mu Muuthende hwa Baba wake, pamwepo no ngirosi jake jakachena.