VAEBRANIA 8 - Chasu New Testament 1967

Vutasi vwakwe Kristo na kiaghano kishaa

¹ Igheri, he ivyo tweteta, kiteto kibaha ni iki: tuna mtasi m’baha sa uu, eikae mkono wa kume wa kichumbi cha kifumwa cha Vubaha uko wanga,

² mndima wa hantu hezerire, na wa lila ihema la idi, elo levikiwe ni Mfumwa neri si mntu.

³ Ambu kila mtasi m’baha evikwa ainkije vila vyeinkijwa na matasi; heicho kitara uu naye akete kintu cha kuinkija.

⁴ Nanga ekiho he isanga esekioka mtasi, ambu hena vareinkija matasi sa vuntu viziomo vyeazera,

⁵ evo vehirira fwanyanyi na kivuri cha vintu vya uko wanga, sa vuntu Mose eazerwe ni Mrungu, ekina kuringanye kuhareha lila ihema; ambu eti: “Rereha unaharehe vintu vyose kwa fwanyanyi ila wevonyeshwe uko he ntuvi.”

⁶ Mira iki avona ndima yedi kuvecha, kila e mrekundanya wa kila kiaghano chedi kukela chevikiwe na kuazerwa he viravo vyedisha.

⁷ Ambu nanga kila cha kuvoka chesekiduike, hesekivoneka kapengere ka kila cha keri.

⁸ Ambu aho ekivashagha, eti: “Rereha misi ineza, nivwo vuntu Mfumwa eti, Nami ninevakoloshija va nyumba ya Israeli na nyumba ya Yuda kiaghano kishaa;

⁹ Tekikaoke sa kila kiaghano neaghane na vazima vavo, He misi ila nevagurire mikono yavo nivafunye he isanga la Misri. Ambu tavaikaa he kiaghano changu, Nami sivaendie, nivwo vuntu Mfumwa eti.

¹⁰ Ambu kiaghano neneaghana na nyumba ya Israeli Nyumba ya misi ii ni iki, nivwo vuntu Mfumwa eti; Ninevainka viziomo vyangu he madunganyo avo, Nineviandika he ngoro javo, Nami nineoka Mrungu wavo, Navo veneoka vantu vangu.

¹¹ Navo tevekachejanye kila mntu na ula vetijanye, Na kila mntu na mndughu wakwe, ekiti: ‘Mmanye Mfumwa.’ Ambu vose venenimanya, Kuvokia mdori hata m’baha wavo.

¹² Ambu ninevashighia vivivi vyavo, Na mabanu avo sikareakumbuka kangi.”

¹³ He uko kuti: Kiaghano kishaa, akighosha kila cha kuvoka kuoka isambo. Mira kintu kikanavoka kuoka isambo, na kusakaa kiho hafuhi na kuteka.