TITO 1 - Chasu New Testament 1967

Ngezya

¹ Paulo, mzoro wa Mrungu, na ntume wakwe Yesu Kristo, he vuntu vwa mwitikijo wa vala vesaghurwe ni Mrungu, na kucha kwa idi, kweete kumfoleka Mrungu;

² hena ikuji la nkalamo ya kae na kae, Mrungu eye esiteta mongo eturavie too kae na kae;

³ akafunukura kiteto chakwe he igheri lacho, echo nekivikiwe kukibirikira kwa iazero la Mkija wetu Mrungu;

⁴ Hakwe Tito, mwanangu wa idi hena ula mwitikijo ewo wetu. Mbonea na mporere yefuma ha Mrungu Vava na hakwe Kristo Yesu Mkija wetu, iikae nawe.

Kuvika vaghosi

⁵ Heicho, nekushighie Krete, nesa ukoloshe vila vyeimie, na kuvika vaghosi he kila muzi sa vuntu nekuazere.

⁶ Mntu esina cho eshaghwa nacho, mme wa mche mmwe, ena vana veitikije vesilahwa iti ni vareshinda kana tevesikia.

⁷ Ambu chemvaie Askofu aoke mntu chochose, kila e mnjama wa Mrungu; asioke mntu ekuizihija ye mwenye, asioke mjangu he kusikia oro, asioke mwengeji neri mkwakwa, asioke mraenda lumazo luvivi.

⁸ Mira aoke muori, mrekunda vyedi, ena kiringanyo, mwenye kitea, ezerire, ekuima;

⁹ ekigurisha kila kiteto cha mwitikijo sa vuntu echejijwe, nesa aidime kuvachunda vangi na michejire yena moo na kuvota venye nkani.

Vacheji va mongo

¹⁰ Ambu hena vajinki vesisikia, vena viteto vyesina lumazo, vareisha, na kukela ni vala vakitavani;

¹¹ evo chetara vajivwe myomo yavo. Avo vegharusha vantu va nyumba jose, vekicheja vyesitara he vuntu vwa malumazo mavivi.

¹² Mntu wa havo, mroti wavo venye etie, “Vakrete ni vamongo misi yose, ni sa majana mavivi, vareliisha, vadai.”

¹³ Vuonwa uvwo ni vwa idi. Heicho, uvabohie kwa vukai, nesa vaidime kukia he mwitikijo;

¹⁴ vasisikije simo ja Kiyuda, neri maazero a vantu, vekuvusha he vila e vya idi.

¹⁵ Vintu vyose ni vyedi he vala e vedi; mira tehena cho e chedi he vala e vavivi, vesiitikije; mira macha avo na midunganyire yavo vyajirara.

¹⁶ Vezumira iti vemmanyije Mrungu, mira hena mirongire yavo vemkana; ni vareshinirija, varebera, neri he kila kintu chedi, teveve neri.