MARIKO 1 - Chasu New Testament 1967

¹ Kivuko cha Mburi Yedi yakwe Yesu Kristo, Mwana wa Mrungu.

² Sa vuntu yeandikwe he mroti Yesaya, “Rereha, nituma ntume wangu Mozya he kizango chako, Enekuhareia nzia yako.

³ Izii la mraamberija uko nyika, ‘Hareheni nzia ya Mfumwa, Cheleleshani hantu evechija!’”

⁴ Hakavoneka Yohane ekibatiza uko nyika, na kubirikira m’batizo wa kuchwa mti kweete kushighiwa mabanu.

⁵ Vakamswia vose va isanga la Yudea na Yerusalemu, vakabatizwa he kianda cha Yordani, vekighamba mabanu avo.

⁶ Uo Yohane ekijikie suke ja mavoa a ngamia, na ngana he kikwidi, akala nzighe na nzoke ya mpako;

⁷ akabirikira ekiti, “Hena ezie nyuma hangu ena nzinya kunivecha, neri tekinifwenye kukodeka nakuterua mkoa wa viratu vyakwe.

⁸ Mi nemubatize na mpombe, mira ye enemubatiza na Mpeho Wedi.”

Kubatizwa kwakwe Yesu

⁹ Niho misi ila Yesu akaza kufuma Nazareti ya Galilaya, akabaizwa ni Yohane uko Yordani.

¹⁰ Hala indi ekikwea kufuma he mpombe, akavona wanga hekijuvuka, na Mpeho eikee sa nziva ekimseia;

¹¹ na izii likafuma uko wanga, leti, “We niwe Mwanangu, mkunde wangu; nekuizihirwe.”

Kugheshwa kwakwe Yesu

¹² Hala indi Mpeho akamtika noko nyika.

¹³ Akaikaa uko nyika misi makumi mane, ekigheshwa ni Shetani; akaikaa hantu hamwe na nyama ja sakeni, na vamalaika vekimtumikia.

Yesu evoka kubirikira

¹⁴ Yohane ekinachungwe, Yesu akatonga Galilaya, ekibirikira Mburi Yedi ya Mrungu,

¹⁵ ekiti, Igheri lakoloka, na vufumwa vwa Mrungu vwazengelela. Chweni mti muitikije Mburi Yedi.”

Yesu eitanga varateri va kuvoka

¹⁶ Naye ekivecha mbaimbai he bahari ya Galilaya, akamvona Simoni ne Andrea mjinawe, vekigera nyavu javo he bahari, ambu ne vareloa.

¹⁷ Yesu akavati, “Nzoni muniratere, nami ninemughosha vareloa vantu.”

¹⁸ Hala indi vakashigha nyavu javo, vakamratera.

¹⁹ Akavecha mozya hadori, akamvona Yakobo mwana Zebedayo ne Yohane mjinawe, navo vekireho he ngilawa vekihareha nyavu;

²⁰ niho akavaitanga, vakamshigha Zebedayo vavee he ngilawa hamwe na vandima, vakamratera.

Mwenye mpepo ebanjwa

²¹ Vakatonga mhaka Kapernaumu; msi wa sabato akaingia he sinagogi, akacheja.

²² Vakamaka haiwa he michejire yakwe; ambu ekicgeja sa mwenye nzinya, neri si sa vaandiki.

²³ Aho he sinagogi yavo hekina mntu egurirwe ni mpepo mbivi; akateta na wanga,

²⁴ ekiti, “Tunani nawe Yesu wa Nazareti? Weteza kutukenja? Nekummanyije iti niwe ula Ezerire wa Mrungu.”

²⁵ Yesu akaibohija, ekiti, “Huja chwi, ufume heye!”

²⁶ Ila mpepo mbivi ikamgusha kisa, ikaiyagha na izii ibaha, ikamfuma

²⁷ Vose vakamaka, vakavwijana, vekiti, “Ni kini iki? Ni icha ishaa! ambu kwa nzinya eazera mpepo mbivi, najo jimsikia.”

²⁸ Mburi jakwe jikagisha hala indi he masanga ose eho mabimbai ya Galilaya.

Mkwewe Petro na vangi vajinki vebanjwa

²⁹ Hala indi vekinafume he sinagogi, vakafika kaa hakwe Simoni ne Andrea, vena ne Yakobo ne Yohane.

³⁰ Mlala wavo mkaja Simoni, eshinjie, ekiwaa isha; hala indi vakamvwira mburi yakwe.

³¹ Akamswia, akamvushija kwa kumgura mkono, isha likamshigha, akavatumikia.

³² Hekinaoke chahemagheri, na izuva lekinanyirike, vakamwetie vose vewaa na venye mpepo.

³³ Na muzi wose wekivungane hala mpengeni.

³⁴ Akabanja vajinki vewaa mawaji a kila mbare, akafunya mpepo nyingi, neri asijikundije kuteta, ambu jemmanyije.

³⁵ Na chaheyavo kere, akavuka, akafuma, akatonga hantu hesina vantu kuraomba.

³⁶ Simoni na vaghenji vakwe vakamratera.

³⁷ Vekinamvone vakamti, “Vantu vose vekuenda.”

³⁸ Akavati, “Tutongeni hanntu hangi, he mizi ingi ya kunu hafuhi, nibirikire hata ho, ambu nicho neziie.”

³⁹ Akatonga ekibirikira he sinagogi javo, he isanga lose la Galilaya, na kufunya mpepo.

Kubanja mntu eumbuka

⁴⁰ Akaziiwa ni mntu eumbuka, akamsemba ekimdunkutia, na kumti, “Wekikunda uidima kunizerija.”

⁴¹ Naye akamsikiwa vwasi, akaronga mkono akamkunta, akati, “Nakunda, zera!”

⁴² Hala indi kuumbuka kwakwe kukamvuka, akazera.

⁴³ Akamkokontia mno, akamvusha hala indi,

⁴⁴ akamti, “Rereha, usiremvwira mntu kintu, mira tonga urekuvonyesha he mtasi, uinkije na kila Mose eazere vuntu vwa kuzera kwako, nesa kioke vuonwa hevo.”

⁴⁵ Mira akafuma, akavoka kubirikira viteto vijinki, na kuamberija iyo mburi; neri Yesu teidime wa kuingia he muzi eyoywe, esire ekiuko nze hantu hesina vantu; vakamzia kufuma kila hantu.