MITHEW 6 - ATHARKUTHROU NT (BSI)

San Ranga Chupi Na

¹ “Malmashi ngei mai ah mani na ri ong shu oh ta nangei dramo am na tullu lu no ranga shilung lutta tullu lu oh. Nangna ejonga hata ae ta lea chu thangwan ram ma napa thieng kolla naolmant am mang no ae.

² “Chuna sarukka nalung lokka napek juija dang halla tumpet tum ma hypokrate (ahra sangei) na synagoge sunga akha chu lampi ah malmashi ngei na ajak atri ranga pek kha keina nakolla adiek rou rillinge, mani ha mani lommant pha shu so ae.

³ Chuna nalung lokka napek juija nakut chang tieng pana dangpha no shu oh nakut woitieng pa lu tullu.

⁴ Chuna napek juija aruhan ta pe oh, chuleh chu napathieng na, na lu tullu riveta amant pe ange.

Prathana Aniek Na

⁵ “Akha chu naniek juija hypokret (ahra sangei) hek ta ae no oh. Mani dit niek chu synagoge sunga kom ngir thou weta akha chu lamhou wa akha ah malmashi ngei na ri ranga keina nangei kolla adiek rou rillinge, mani ha mani kemant pha su so ae.

⁶ Chuti weta nangei niek jui apha ah na inn ki sunga thing weta eenhar kalveta meena mitta rillou napa thieng kolla nie oh aru hanta na lu tullu ri ah am pa na lumant pe ange.

⁷ “Akha chu naniek juija malmashi jat adangei hekta arimsalla lea ah, lea ah nie no oh rouram chu rou atam ril hana mani ril theipi shijo weta mani na hal hekta.

⁸ Mani hekta ae no oh, rouram chu napathieng na dange naniek matienga nakolla dang no ha.

⁹ Chuta lea chu nangei na hitta nie yo oh. “Wanram ma kanilim pathieng maming athieng ha chang shu oh:

¹⁰ ‘Narengram jung shu oh: wanram ma nahal hekta aleiram ma kom nahal ha chang shu oh;

¹¹ Awoni kani ahoppang rak pepi oh.

¹² Kani pak hai thou wa kanita ngakpi oh, kani na kom kanita diekno ae ngei ta ngakpi hek.

¹³ Akha chu kanita ahlem na nea no ranga, chuti weta hrano kut chung hai thou sanpi oh.’

¹⁴ Rouram chu nangei na meengei hrano hoino ngak ta lea chu wanram ma pathieng na kom nangta ngak ange.

¹⁵ Chuti weta nangna mee ngei hrano hoino ngak no taleh chu, pathieng na kom nahoino hratno ngak pi ang no ae.

Buhei Ah Niek Na

¹⁶ “Nangeina buhei ah niek juija hipokrate (ahra sangei) ngei hek ti no oh. Mani chu malmashi ngei na rijuija buhei mee ae ta dang ranga mani mai thiem ma am meh. Keina nangei ta adiek rou rillinge mani ha olmant ha pha shu so ve.

¹⁷ Chuti weta buhei ah amjuija nalukanga sharik not ta akha chu namai kom hrabakta phi oh.

¹⁸ Chuleh chu malmashi ngei na nanghi buhei ah am meh ta dang ang no ae, chuti weta mitna ri-low pathieng na chak na tullu lu rija am nangta olmant pe ange.

Wanram Ma Lal Sum

¹⁹ Leitha akha chu thir-rek na mangpi nea, akha chu aru thei pana kom ru nea na simlei ram ma nataranga chak selsum homma shino oh.

²⁰ Chuti weta leitha akha chu thir rek na mangpi no na akha chu aru thei panakom ru wa thingno na thangwan ram ma nataranga homma shi oh.

²¹ Rouram chu naselthul am na ah nalung kom hana am mange.

Pum Hina Awar

²² “Pum hina awar chu mit ae, ejonga namit na hra lea chu napum lim pa kom warrange.

²³ Chuti weta ejonga namit na hra no lea chu napum lim pa kom athiem na shi hakti ange. Ejonga nakolla am awar na thiemma am lea chu athiem ha eja ah thiem mang sha!

Chungthieng Akha Chu Anei Adon

²⁴ “Atu akha na mitpu ani shuk chang nea no ae, rouram chu akha tana anda weta akha tana lungshi ange anoleh, amo na akha ta chu mok weta akha ta chu hlou nal ange nangna Chungthieng akha chu lal sum ani hina hlou jui nea ang no ae.

²⁵ “Chuna saruka keina nang eita rillinge naring chang tarang ekom olno oh. E-bak inn ang mota, anoleh, napum taranga, echoi epai ang mo. Ringchang na bak rang-inn ta lella chung tekno meh, akha chu pum na punchoi dirchoi ta lel no meh!”

²⁶ Junga am awa ngei ta anno; mani muchi kom wor no ae hom ko hom no ae hana shangpang sunga kom shi no ae chuti phao sunga thungwan na pathiengna awon hoppi ah shi ae nang chu mani ta lel no wa cha meh?

²⁷ Nalung ol weta naring chang atan te atuna lonne ah meh?

²⁸ “Akha chu eje ranga napun dier taranga olla che? Anno loulei ahlam rei na alo ta tou mo manina tullu kom ae no la kom har no ae.

²⁹ Chuna keina nangei ta rillinge, Reng Solomon na machong mareng reita kom lella hra tek no ae.

³⁰ Awoni ah diekka am hina atuk chu sermei ah denga hou ang loulai ah tou rampa aphul ngei ta rukka Chungthieng na hija jonpi lea chu alowa ngoiring bet ngei oh malmashi nangei ta chu amo na punchoi hella jonpi ang mo weh?

³¹ Chuna olla hita rilno oh, ‘ejongpa bakkang monu? anoleh,’ Ejongpa inn nang monu? ‘anoleh,’ ejongpa seng ang mo nu?

³² Rouram hi jati adangei na hijongpa lim jonge akha chu wanram ma pathiengna nadit ang lim danga am meh.

³³ Chuti weta masha ah reng ram akha chu adiek lim jong masha oh. Akhu chu nalim pa hi amo na nangta lon pi ange.

³⁴ Chuna sarukka atuk taranga ekom hlawai no oh rouram chu atuk taranga atuk na ol shu oh, marung nie hana marungnie taranga ha ta chap cha ange.