MITHEW 19 - ATHARKUTHROU NT (BSI)

Ahran Ahui Rou Ah Chu Pi Na

¹ Jisu na nalimpa hi ril su nutienga amo na Galily hai thou wa Jordon aral ramtieng Judeah ah thingso ae.

² Wairul rija na mamu tieng juije hana am amo na ana asha ngei ta dom pi ae.

³ Chuna Pharisies ngei na phao weta makolla chang anna hita sai. “Anamei ta ejongpa rou akha sarukka mahran num juija hran hlak hi rouphun na angai ah meh?”

⁴ Jisu na sange, “Nangei na pa no the songa chau ha chu athou hai thou wa sempipa mitpu na namei apa ta sem ha.

⁵ Chungthieng na rillea hina rouram sarukka apa na manu mapa ta hla phur weta anamei kolla am shu oh hana ani ha atun chu akha wul so ae?

⁶ Chuna sarukka manui aniha ani ah ni oh weh akha chakso ae. Hana sarukka Chungthieng na tul pi sha hi atu akha na hran hlak no shu oh.”

⁷ Mani na Jisu ta sai ae, “Chu lea chu alo sarukka Moses na ngei hlak na jiek shi lea chu hran oh ta trongsan pe ah meh?”

⁸ Jisu na meengeita sange, “Nangei lungna hir hai sulla Moses na nanamei ta hran ranga amo na angai pe ah shi ah ae. Leisem hai thou chu nahi angai ano ae.

⁹ Chuna keina nangei kolla rilla aminge atu na hal, atu hal apa akha na anamei ta vokno shimshak chat ano lutta ahran tul shukka namei adang ta nei thing lea chu shimshi bohron mee ae ta la ange.”

¹⁰ Arui ngei na Jisu ta rillea, “Ejonga nahi jongpa na pisal sangam ani karra shuk kang lea chu taichang no pa na hella hra tekkae.”

¹¹ Jisu na sange, “Na roulam hi malmashi lim tarang no ae, chuti weta Chungthieng na pek sha mani tarang chak sa ae.

¹² Apa akha na alo wa tai chang no meh ti hi adang adang rouram am meh, rouram chu ahre na chu mani hata apok hai thou kom tol ae. Hana adang na chu mani thei chakka thangwan rengram taranga sem kom tol ae. Atu jongpa na nahi jui nea lea chu ha ta jui shu oh.”

Jisu Na Unga Ngeita Jaihra Pek

¹³ Mee ngei na unga makhai tama am na ah ruija wa ah mani taranga amo na mani chunga kut shi weta aniek rang nga ae. Chuti weta arui ngei na meengei ta ran na hla ae,

¹⁴ Jisu na rillea, “Unga ngei ha hamma shi no oh ka-am na ah wa shu oh mani ha, rouram chu wanram ha mani taranga ae.

¹⁵ Chuna Jisu na unga ngei chunga kut dung phur weta amo na thingso.

Achongpu Rungthar

¹⁶ Nahani akha apa akha na makolla wa weta ril, “Ocha, samla ringchang pha ranga kei na ejongpa tullu lu ang meh?”

¹⁷ Chuna Jisu na sange, “Ejerange kakolla ahra tullu taranga nangna sai ah am che?” “ahra akha chu am meh, nangna samla ring chang phanum ta lea chu jieksha rouphun ngei ha sung jella am mo.”

¹⁸ Amo na sai, “Ejongpa rouphun mo ae?” Hana Jisu na sange, “Nangna ekom mee that no oh; angna mee shimshi bohron tullu lu no oh; meepot kom nang naru thing no oh; nangna diekno meelung ngir tol no oh.

¹⁹ Nanu napa ta ajak atri oh, akha chu nangna inn ning tultieng ta natak mak hekta lungshi oh.”

²⁰ Rung thar hana Jisu ta sange, “Na limpa hi keina unga haithou wa ae no wa hang sange chuna ejongpa wat the song mo ae?”

²¹ Jisu na amota rillea, “Ejonga nangna hilim hi rakit num ta lea chu, thing weta na am nadon lim jur weta napha sum ha sara nouringei kolla pe thingo chu lea chu waram ma natarang am mange, chutilea chu kanutieng juijo.”

²² chuna rou hi rungthar hana theipha juija alung leima olla amo na thingso, ti chu amo hi anei adon mee ae.

²³ Hana Jisu na marui ngei ta rillea, “Keina diekka nangei kolla rillinge, achongpu malmashi ngei na wan rengram lut tanghi leima olla shuk kae.

²⁴ Keina nangei kolla rilsinge achongpu malmashi na Chungthieng rengram tung ang chu jangpu sha na ahriem na sunga lut pa na hella lei tekkae.”

²⁵ Rou hi arui ngei na theipha juija ehekta angak shukka ril, “Atu ngei na chu sanpi pha ang mo nu?” ta mani na sui.

²⁶ Jisu na mani ta an weta manikolla ril, “Nangei malmashi kolla chu nahi ane no ae,” chuti weta Chungthieng kolla chu aneno ti ekom am no ae.

²⁷ Pitar na sange, “Anno kani na eheilim pa houphur ra nanutieng jui songe kani chu ejongpa pha ang meh?”

²⁸ Jisu na mani ta rillea, “Keina athar simlei chung tarang adiek rou rillinge, meesanaopa na phomlu chunga ahung ajai phu ah phumlu chunga ong juija, kanutieng jui nangei asom ani kom phomlu ah ong weta Israel phung asom ani chunga pallange.

²⁹ Chuna atu jongnu atu jongpa akha na kasaruk ka ah inn alou houphur ra anoleh ah-u-anao, anoleh, manu mapa ah no lea asanao hou phurra thing lea chu amo na saruk riha hella pha ah samla ring chang kom pe ange.

³⁰ Chuti weta masha ah am ngei na atreem na chang ange hana meenu ngei na masha ange.