MITHEW 12 - ATHARKUTHROU NT (BSI)

Sabbath Rungnie Roulamma Sai

¹ Hana lei apha ah Jisu na Sabbath rungnie ah sang loupuk ajaija mathing juija marui ngei na won tam pa chu mani na sangbor hriem weta shang mal chip thou so weh.

² Pharisis ngeina ri ah Jisu kolla mani na ril lea, “Anno narui ngei na Sabbath rungnie ah hita mani ae chu rouphun ta ngeinum no ngei ae!”

³ Chuna Jisuna mani ta sange, “David akha chu ma mee ngei na wontam lei ah ae phur ha nangei na pa no chau?

⁴ Amo akha chu mamee ngei na Chungthieng inn sunga donna si badol bakha, routakka chu thiempu na chak bak phung shuk budol ae.

⁵ Amo lea Moses hana rouphun jiekka shi pa no chaup sabbath rungnie chang honna thiempu ngei na mokna inn na routakka kuipi halkom mani ta maral am no ae ta ril ha?

⁶ Chuna keina nangei kolla rillinge amunt hina Chungthieng mokna inn ta hella alok akha am meh.

⁷ Jieksha rou na rilleh, lungshi theingei ta di inge rithoi pot chu di nonge karil rou hi ejongpa mo nu ta nangei na dang ta lou chu aral am no ngei ta lal pi ang no wa ae.

⁸ Rouram chu Meesanaopa na sabbath hina mitpu ae.”

Akut Akha Tieng Athi Sha Apa

⁹ Jisu na amunt hou phurra synagog ka thingso weh.

¹⁰ Amunt hana apa akha na akut akha tiengpa thipa am meh, malmashi ahre na chu Jisu na ejong tullu akha ae juija maral jonga am jarra manina makolla sai, “Sabbath rungnie ah meeta dam pi hi rouphun hata ngei num ah mo ae?”

¹¹ Jisu na sange, “Ejonga nangei kar sunga akha na kelmo don na Sabbath rungnie ah athuk kum sunga tulla, amo ana akelmo hata la lut weta awao wa choi shuk kang no meh?

¹² Chuna malmashi na kelmo ta hella amant tam tek no meh? Chuna sarukka Sabbath rungnie ah ahra tullu lu chu rouphun ahra no meh?”

¹³ Hanapa chu akut akha tieng thisa apa ta amo na ril, “Nakut dok shukko,” Amo na akut dok shuk pa chu amo ha hrabakta akha tiengpa hek ti so ae.

¹⁴ Chunnapa chu Pharisis ngeina houphur weta Jisu ta that rang waisi thou so.

Chungthieng Ahalsha Suuk

¹⁵ Jisu na amota that ranga ngaitu hlak rou theija amona amunt ha haophur ra thingso; Manu tienga wairul rija na kom juije amona mani kar sunga ana ngei ta dampi.

¹⁶ Akha chu manita marou hana rouramma mani na ril shuk no rang rou pe ah hla ae.

¹⁷ Na hi so ae Chungthieng rouphu Isaiah ril phur trong ha tung ranga ae:

¹⁸ “Hi ae ka halsha suuk, makolla keina a halsa sange, kalungshit amo ha, makolla keina tin singe; machunga kamuihla hla ange akha chu amo na meejat adangei taranga adiek rou ril shuk kange.

¹⁹ Amona meeta rou ruk hlak kang no weh akha chu trong rang kom trong ang no weh, chu atu akha nakom lampi lamrukka marol thei ang no ae.

²⁰ Amona asul ana ngeita lungnem mange akha chu atujong, sannang am lao ngei ta ringrei ngei ange. Amo na ane na routreem pha thingma lim phao sunga.

²¹ Akha chu malmashi lim na makolla lung rang shi ange.”

Jisu Lea Beelzebul

²² Hana malmashi ahre na Jisu kolla atrong shukno akha chu mitcho akha ruija wa ae, ti chu amo ha tarik mant ah shi ae. Jisu na amota dampi ah amit kom riso hana atrong kom shukso.

²³ Jisu na lu tullu riweta wairul riha na ngakka, “Amo hi meh David spa ha” ta manina sai!

²⁴ Rou hi Pharisis ngei na thei juija mani na rilleh, “Amona tarik ta julla mahao nea hi amota ruija rol Beelzebul na machunga a nea jaitha pe ah ae sha ae.”

²⁵ Jisuna mani lunghal dangpha ah manita amona ril. Rengpal na ram akha ah mani masel sunga sul hlakka hran hlakka adang adang amleh chu ephao sot nea ang no ae. Akha chu hulok anoleh inn shunga mani kar kom sul hlakka ani shukka hran hlak lea chu ngir ra am mang no ae.

²⁶ Ejonga Saitan na Saitan ta julla hou lea chu amo ha matak nang ta anda mee ae. Chu lea chu alota mareng ram na ngir ra am nea ang sa?

²⁷ Chuna ejonga keina Beelzebul jarra tarik ta julla houne lea chu nangei na chu atujong jarra manita julla hou nea ang chau? Chuna sarukka mani na nangei routan rengpa chang ange.

²⁸ Beelzebul jarra no ae Chengthieng muihla na keita tarik jul nea rang jaitha mapek hana ae, hina takpi chu Chungthieng reng ram hi nangei kolla am su sa so ae.

²⁹ Aratpa amota huppa shi no wa. Alota atujong akhana aratpa inn sunga lut weta manei madon ru wa shukne ang meh?

³⁰ “Kai hitta am ha-no amo chu keita anda mee ae, akha chu kei hitta hom ha no mee achok arel mee ae.

³¹ Chuna sarukka keina nangei kolla rillinge, malmashi pak akha chu hrano trong lim ta chu silpi ange chuti weta muihla athieng ta hrano trongshi ril chu sanpi rang am no ae.

³² Atu akha na meesanaopa ta anda ah trongshi ril hal kom sanpi ange; chuti weta atu jung na muihla athieng ta anda lea chu atun akha chu atreem nei no wa amota sanpi rang am no ae.

Thingkung Lea Ara

³³ “Theira ahra ra ranga theikung ahra pi ah ta ae, ejonga theikung hana hra no lea nathei kung ara ha hrano ra ange theikung hi ara hana akung amel dangpi ae.

³⁴ Arul nangei chu nakola hralou am weta alo ta ahra trong sukkang che? rouram chu namur ra ril shuk lim ha lungsunga hra no lim shuksa ae.

³⁵ Ahra mee hana chu makol hai thou wa ahra shuk kange hrano mee hana makolhai thou hra no shuk kange.

³⁶ “Chuna keina nangei kolla rillinge meengei na trongchui matrong phur lim ha routeemni ah pha ange.

³⁷ Hana sarukka na trong phur lim hana nangta diek, diekno routreem ange.”

Anealah Tullu Mu Pi Oh

³⁸ Rouphun ocha lea Pharisis ahre na hita ril shuk kae, “Ocha” “Kani na anealah tullu na ae ri num munge ta mani na sai.”

³⁹ Jisu na rilleh, “Atun rija ah hrano mee akha chu hlawang ngei jo!” nangei na anela tullu hi Chungthieng rouphu ril Jonah ta pek ano wa anela tullu pe ang nijo weh.

⁴⁰ Jonah na alok anga won sunga soun thum jan thum am chu hekta meesanaopa na soun thum jan thum alei sunga am mange.

⁴¹ Routreem nie ah Niniveh malmashi ngei na ngir thou ha weta halim ha ral ae ta ril shuk kange rouram chu Jonah rouril la mani lung hlong jarra; chuna keina nangei ta atun chu rou hi rillinge Jonah ta hella alok akha am meh!

⁴² Rengnu Shiba na routreem nie rungnie ah ngirthou haweta mani ta aral ngei ae ta nont ange, rouram chu simlei chung ram lim ma Solomon lungsin lungwar thei pha tik kae ta phao ae. Chutihal kom Solomon ta hel alok akha am meh.

Hrano Muihla Lea Na

⁴³ “Hana hrano muihla na malmashi kol hai thou shukka thing juija masolhak rang ramkang amunt na junga rol, chuti weta amunt akha phao tuk no wa lea ae,

⁴⁴ mathei chakka amona ril, ‘Keina shukka thingna inn tienga lea ang singe.’ Chuna amo na lea inn ha rukka thienga hra ah am ri sho.

⁴⁵ Chunapa chu amo na amota lel hrano tek ti muihla sari kom ruija thingso, mani makhaina makol hana am jui ja chu amo ha amatieng ta hella hrano tek so ae. Chuna sarukka atun rija hrano malmashi ngei kolla hi jongpa hrano hi shuk kange.”

Jisu Manu Akha Chu Anao Ngei

⁴⁶ Jisu na malmashi ngei hita trongthou hlakka am lei ah manu akha chu manao ngei na amo hita trong thou num ma awao wa ngir ra am meh.

⁴⁷ Chuna mani kar sunga akha na amota ril, “Nanu akha chu nanao ngei na nangta trongthou num ma awao wa ngirra am meh.”

⁴⁸ Jisu na sange, “Atumeh kanu? atu ngei na kanao ngei mo ae?”

⁴⁹ Chuna amo na arui ngei kolla kutchal hin weta rilleh, “Anno hi ngei hina kanu akha chu ka-u-kanao ngei ae!

⁵⁰ Rouram chu atu jongna Chungthieng wan Pathieng ahal ae mee amo ha ka-u-kanao kasar akha chu kanu ae.”