Mateu 19 - Mukanda Wa Zambi 1970

Yesu yalongesa hakutwala ku kushiha ulo

¹ Muze Yesu hamanununa maliji wano, yakatuka ku Galilea, yaya ku njiza ya Yudea musali lia lwiji Yordau.

² Mbunga jinene yaamukaula; Yesu yawuka ko mieji jo.

³ Afariseu yaamukundama hanga amweseke. Yaamuhula ngwo: “Muchilita ni Shimbi lunga kulakula pwo lienyi ha chikuma cheswe, nyi?”

⁴ Yesu ngwenyi: “Kunwatangile mu Mukanda wa Zambi, nyi? Ngwo: ‘Ha Ubutukilo Zambi yaatanga lunga ni pwo,’

⁵ Neye yamba ngwenyi. ‘Ha chino lunga makahichika tato ni naye akalinunge ni pwo lienyi, mba ayo aali maakabwa mutu umuwika.’

⁶ Chenacho hi aali nawa ko, alioze mutu umuwika. Kashika, chize Zambi hananungu, mutu kanda achihandununa.”

⁷ Afariseu yaahula Yesu ngwo: “Kuchi mba Mose wahanyine Shimbi ngwenyi, mutu chatamba kwaha pwo lienyi mukanda wa kulakula, mba akamweche?”

⁸ Yesu ngwenyi: “Mose wanutayijile kulakula mapwo jenu mumu nukwete mbunge jikalu. Alioze ha Ubutukilo kuchabwile chocho.

⁹ Ngunanwambe ngwami, nyi mutu malakula pwo lienyi, shina ha utanji, nyi mambata weka, lunga yoze halinga utanji.”

¹⁰ Tumbaji twenyi yaamwamba ngwo: “Nyi chikuma cha lunga ni pwo chinabu chocho, kuma kuchatambile kumbata.”

¹¹ Yesu ngwenyi: “Hi atu eswe ko maahasa kutayiza liji lino, shina lume waze Zambi hanaahe lio.

¹² Mumu ha yikuma yeka ni yeka malunga kahashile kumbata: amwe mumu asemukine yiheu, akwo yaapwisa yiheu kuli atu, akwo keeshi kumbata mumu ha Wanangana wa mwilu. Yoze mahasa, atayize longeso lino.”

Yesu yawahisa ana

¹³ Atu yaanehena Yesu ana hanga aase moko, aalembele. Alioze tumbaji yaakanjisa atu waze.

¹⁴ Yesu ngwenyi: “Tayizenu ana eze kuli yami. Kanda nwakanjisa, mumu Wanangana wa mwilu wa atu ngwe wano.”

¹⁵ Neye yaasa moko, mba yakatuka ko.

Mukweze pichi

¹⁶ Umwe mutu yakundama kuli Yesu, yamuhula ngwenyi: “Longeshi, Chuma chibema chika Changutamba kulinga hanga ngukabwe ni mwono wa miaka yeswe?”

¹⁷ Yesu ngwenyi: “Kuchi unanguhula hakutwala ku chibema? Umuwika lume mubema. Nyi unazange kubwa ni mwono, funga Shimbi.”

¹⁸ Neye yahula ngwenyi: “Shimbi jika?” Yesu ngwenyi: “Kanda ushiha mutu; kanda Ulinga utanji; kanda wiya; kanda ushindakenya mahuza;

¹⁹ lemesa tatenu ni noko; Zanga mwenyembo we ngwe chize wakulizanga yena mwene.”

²⁰ Mwe mukweze ngwenyi: “Shimbi jino jeswe hingunajifungu. Chika changusala kulinga nawa?”

²¹ Yesu ngwenyi: “Nyi unazange kubwa mungunu, yako ulanjise yeswe yize uli nayo, utetele yiswale mbongo jize, muukabwa ni ubite mwilu. Mba Wize ungukaule.”

²² Alioze mukweze yoze, muze hachivwa, yakatuka ni chinyengo, mumu te pichi.

²³ Mba Yesu yambila tumbaji twenyi ngwenyi: “Chamwenemwene ngunanwambulwila ngwami, chikalu pichi kunjila mu wanangana wa mwilu.

²⁴ Ngunanwambe nawa ngwami, chikalu kashitu munene, kamelu, kubalika ndusu mu chituwa cha ndongo. Alioze chikalu kuhiana pichi kunjila mu wanangana wa Zambi.”

²⁵ Ha kwivwa maliji wano, tumbaji yaalishimwoka kuhiana, yaahula ngwo: “Nyi chocho, iya kevwe mahasa kulilamwina?”

²⁶ Yesu yaatala nee, yaamba ngwenyi: “Atu kenu maachisa, alioze hi Zambi ko, mumu Zambi kakuhasa yuma yeswe.”

²⁷ Hohene Petulu yamwamba ngwenyi: “Tala yetu hitunahichika yeswe, hitunakukaula. Yika mutukabwa nayo?”

²⁸ Yesu ngwenyi: “Chamwenemwene ngunanwambulwila ngwami, muze Mwana Mutu makatwama ha chitwamo che nyi cha uhenya mu Mwaka Waha, yenu kumi ni aali waze nunangukaula, munukatwama ha yitwamo ya wanangana ni kubatwila mavungu kumi ni aali a Israele.

²⁹ Ni yoze hanahichika mazuwo, chibwe ayayo ni anakwo, hanji mandumbu, Chipwe tato, hanji naye, Chipwe ana, hanji minda mumu hali yami, makatambula yisuho kulakaji helu, ni makatambula nawa mwono wa miaka yeswe.

³⁰ Alioze anji waze ali atangu haliabwila kumaakabwa asula. Chimuwika nawa, anji waze ali asula haliabwila humaakabwa atangu.”