Mateu 15 - Mukanda Wa Zambi 1970

Ndako ja tushakulu

¹ Hohene Afariseu ni alongeshi a Shimbi yaakatuka ku Yerusaleme, yaaheta, yaahula Yesu ngwo:

² “Kuchi mba tumbaji twe akulituna ndako ja tushakulu twetu? Mumu keeshi kusana ku moko nikulita ni ndako jetu ja chijila muze anambe kulia.”

³ Yesu ngwenyi: “Ni yenu, kuchi nwakulituna Shimbi ja Zambi alioze nwakulinga ndako ja yenwene?

⁴ Mumu Zambi hanambe ngwenyi: ‘Lemesa tatenu ni noko,’ nawa ngwenyi: ‘Yoze mambila tato hanji naye chibi, chatamba kumushiha.’

⁵ Alioze yenu nwakwamba ngwenu, nyi umwe mambila tato hanji naye ngwenyi: ‘Chihanda cha yikumba yami chize nambanga kukwaha yena, hinachilambula kulu kuli Zambi,’

⁶ mutu yoze kuchamutambile nawa kukwasa tato. Chenacho nwakulituna Shimbi ja Zambi ni kutayiza ndako ja yenwene.

⁷ Yilembekese! Izaya kanawa ahanjikile hakutwala kuli yenu ngwenyi:

⁸ ‘Atu wano kaakungulemesa ni makanwa jo, alioze mbunge jo jili kusuku ni yami.

⁹ Chamokomoko akunguwayila, mumu kaakulongesa ndako ja atu ngwe Shimbi jami,’ Chenacho anambe Zambi.”

Yuma yize yakuvulumwisa mutu

¹⁰ Yesu yatambika mbunga, yaamba ngwenyi: “Banjikenu, chika nulumbunukine ngwami,

¹¹ chize chakunjila mu kanwa lia mutu, kuchishi kumuvulumwisa, alioze chize chakutuhuka mu kanwa lienyi che chakumuvulumwisa.”

¹² Hohene tumbaji yaakundama kuli Yesu nikumuhula ngwo: “Unanyingika ngwe Afariseu keevwanga wuli muze Wahanjikanga maliji wano, nyi?”

¹³ Neye yaakumbulula ngwenyi: “Chibuta cheswe chize Tata wa mwilu kachitumbile, makachitukula.

¹⁴ Echenu Afariseu! Kaali tetekeli tupuputa. Alioze, nyi kapuputa masongwela kapuputa mukwo, eswe aali maaholokela mu wina.”

¹⁵ Petulu yamwamba ngwenyi: “Tulumbunwine kama chishima chino.”

¹⁶ Yesu ngwenyi: “Kuchi, ni yenu nawa kunushi malinjekela, nyi?

¹⁷ Kuma kunwanyingikine ngwenu, chize cheswe mutu malia kuchakunjila mu jimo lienyi, mba kuchakutuhuka mu mujimba wenyi, nyi?

¹⁸ Alioze yuma yize yakutuhuka mu kanwa yakukatuka mu mbunge, yenayo yakuvulumwisa mutu.

¹⁹ Mumu mu mbunge mwakutuhuka manyonga abi. E akumuzondwola ni kushiha atu, ni kulinga utanji ni waze ali ku malo, ni kulinga utanji ni twamishi, ni kwiya, ni kuhanjika mahuza, ni kushililika.

²⁰ Yenayo yakuvulumwisa mutu, alioze kulia muze mutu kanda achisana ku moko ngwe chize anambe ayo, chize kuchishi kuvulumwisa mutu.”

Umwe pwo, chilambala, yafuliela Yesu

²¹ Yesu yakatuka ko, yaya ku chifuchi chize chakusulangana ni membo ja Tiru ni Sidone.

²² Umwe pwo wa ku Kanana, te katwama ku chifuchi chize, yeza kuli iye nikukololoka ngwenyi: “Mwene, Mwana wa David, nguvwile kama keke! Mwanami wa pwo kali ni mwiku wa luchisa; wakunumwesa lamba linji.”

²³ Alioze kamukumbulwile liji nilimwe. Tumbaji twenyi yaamukundama nikumulembela ngwo: “Muhange, mumu kanatukaula ni kutwaha chimbangwinya.”

²⁴ Yesu yakumbulula ngwenyi: “Zambi hanangutumu shina lume kuli mapanga a kutoka mukachi ka Israele.”

²⁵ Alioze mwe pwo yakundama nikuliumba ha makungunwa ngwenyi: “Mwene, ngukwase kama!”

²⁶ Yesu ngwenyi: “Kuchalitele kwanda yakulia ya ana ni kuyimbilila tuwa.”

²⁷ Pwo ngwenyi: “Chochene, Mwene, alioze chibwe tuwa kaakulia yifwenyufwenyu yize yakuholoka ku mesa ya akako.”

²⁸ Mba Yesu yamukumbulula ngwenyi: “Yena mama, ufulielo we unene! Chibwe ngwe chize unazange.” Mwanenyi yahinduka ha shimbu lizeliene.

Yesu yawuka mieji anji

²⁹ Yesu yakatuka ko, yaya ku mbumbulu ya chitende cha Galilea, yakanduka ha mulundu, yatwama ho.

³⁰ Mbunga jinene yeeza kuli iye, yaamunehena yitonji, ni tupuputa, ni yilema, ni tunaye, ni mieji akwo anji. Yaatumbika ku molu ja Yesu, neye yaawuka.

³¹ Mbunga yaalishimwoka ha kumona ngwo, tunaye kaanahanjika, yitonji kaanahinduka, yilema kaanende kanawa, tupuputa kaanamono. Atu yaalemesa Zambi ya Israele.

Yesu yalisa atu tununu awana

³² Yesu yambila tumbaji twenyi ngwenyi: “Mbunga yino keke nguneevwila, mumu kaali ni yami matangwa atatu, keeshi nawa nichimwe cha kulia. Chazangile kwashika ni zala, nyi ka, hanji maalezemuka mu jila.”

³³ Tumbaji yaamukumbulula ngwo: “Muno tuli mu puya. Kulihi mutuwana yakulia ya kulisa mbunga yibwa haha?”

³⁴ Yesu yaahula ngwenyi: “Mbolo jingahi nuli najo?” Ayo ngwo: “Shimbiali, ni tumwe tuyishi.”

³⁵ Mba Yesu yambila mbunga atwame hashi,

³⁶ yanda mbolo shimbiali ni e yishi, yasakwila, yabalwola mbolo, yabatwola yishi yipinji yipinji, yayaha tumbaji. No yaayanyina mbunga.

³⁷ Eswe yaalia, yaakuta. Tumbaji yaazalisa tupaya shimbiali ni yibalubalu yize yasalile ho.

³⁸ Waze alile, kwoka cho ngwe tununu awana a malunga, kuweza mapwo ni ana.

³⁹ Muze hashika mbunga, Yesu yanjila mu wato, yahiluka ku njiza ya Magadane.