Longeshi 9 - Mukanda Wa Zambi 1970

¹ Nanyongene kuhiana hakutwala ku Chuma chino, mba yingumona ngwami, Zambi kakuyula yitanga ya akwa mana ni ya akwa ululi, chibwe zango lio, hanji kole yo. Niumwe Unanyingika yuma yize yili kulutwe lienyi.

² Kulituchika kuchishiko. Songo lia akwa ululi lili ngwe lia yingulungulu, lia atu abema ngwe lia atu abi, lia akwa kuwayila Zambi ngwe lia waze keeshi kuwayila, lia waze akamulambula milambu ngwe lia waze keeshi kumulambula milambu. Kulituchika chakuhi mukachi ka mutu mubema ni Chivulumunyi, mu chize maamona mu mwono uno; mukachi ka mukwa kushingana ni yoze keeshi kushingana.

³ Songo lia atu eswe lili limuwika, chili chibi nawa ngwe yuma yikwo hano hashi. Ha miaka yeswe yize atu akubwa ni mwono, kaakubwa ni ndako ya ungulungulu ni uzaluke, mba susumuku haafwafwa.

⁴ Alioze yoze uli ni mwono hano hashi kaakusa ko mbunge ngwenyi, kulutwe mungumona yibema; kawa yoze uli ni mwono kanahiana tambwe yoze hafwa.

⁵ Ewa, akwa mwono kaananyingika ngwo mutufwa, alioze afu kaanyingikine nichimwe. No keechi kufumbula nichimwe; atu maavulama liakulu.

⁶ Zango lio ni kole yo, ni usolo wo, yeswe hiyafwa hamwe no. Keechi kubwa nawa ni chiyulo nichimwe cha mwono wa hano hashi.

⁷ Likoleleze ulie yakulia ye, awahilile; nwako vinyu ye ni kuwahilila. Yino yeswe yinawaha ku meso ja Zambi.

⁸ Matangwa eswe Wahilila ni kulikwiza.

⁹ Wahilila hamwe ni pwo lie yoze wakuzanga, ha matangwa eswe a mwono uno wamokomoko, uze Zambi hanakwehe. Wahilila kuhiana ha matangwa jawo, mumu kuuchi kumona yiwape yikwo mu lamba lie lieswe.

¹⁰ Uhondangana milimo ye yeswayo wakulinga, mumu muze muma lia afu kumushi milimo, chibwe kunyonga, chibwe chinyingi, chibwe mana; mwenamo muukaya.

¹¹ Yingumona nawa Chuma chikwo ngwami, hano hashi akwa kuzomboka fuji kuhiana keeshi kukumba matangwa eswe, ni akwa hamu kuhiana keeshi kukumba mu jita matangwa eswe, ni akwa mana keeshi kuyuka matangwa eswe, ni akwa malinjekela keeshi kubwa pichi matangwa eswe, ni akwa ulemu keeshi kutambula yihela yilemu matangwa eswe. Luyinda kakwiza kuli mutu mweswe susumuku.

¹² Kuwahashile kunyingika nichimwe cha kulutwe. Ngwe chize tujila akufwa mu muheto susumuku, hanji chize yishi akukwachika mu Wanda susumuku, Chenacho ni yetu nawa che twakufwa mu luyinda ni mu lamba susumuku muze kutwachinyongene.

Manyonga hakutwala ku mana ni uhepuke

¹³ Hinamona chilweza chibema chize chinalumbununa manyonga ja atu hakutwala ku mana.

¹⁴ Kwabwile kamwe kalimbo, te kumushi atu anji. Umwe mwanangana wa tachi yakajingilika yalulika kubuzula yipanga yako.

¹⁵ Mwabwile umwe lunga chiswale, alioze te mukwa mana yoze mahasa kulamwina lie limbo. Alioze niumwe wamunyongenene kama.

¹⁶ Yami te nakwamba ngwami, mana kaanahiana tachi, alioze niumwe Unanyongo ngwenyi, chiswale kali mukwa mana, tumubanjikenu.

¹⁷ Chibema kubanjika ku maliji ja mukwa mana chihumikiji, alioze hi chibema ko kubanjika ku maliji akukalumioka a mukwa kuyula wa mu mbunga ya yihepuke.

¹⁸ Mana kaakukwasa kuhiana yitwa ya jita, alioze Chivulumunyi umuwika mabihisa yuma yinji yibema.