Jobe 4 - Mukanda Wa Zambi 1970

Pande jitangu Elifaze

^1-2 Nyi mungweseka kuhanjika limwe liji, kubiha muwivwa, nyi? Iya mahasa kuhola?

³ Yena hiunalongesa atu anji, hiunatakamisa moko ja akwa mulekeleke.

⁴ Maliji je haanahuzulula yoze wambile kulimbuka. Hiunakolesa manungunwa waze aubekebeke.

⁵ Alioze haliabwila, muze lamba hinakuwana yena, unalezumuka; muze hiliakuwana, chinakushimi.

⁶ Te wakuwayila Zambi, kuwavulumwine ko, kashika chatamba kumufuliela ni kumusa mbunge.

⁷ Haliabwila chinyenge, kulihi wamwene kama mutu nyi kavulumwine, mafwa? Kulihi wamwene kama tangia yibema matoka?

⁸ Yami hingunamono atu maalima minda ya shili ni kukuwa mbuto ya uhenge; haliabwila kaakuhela shili ni uhenge.

⁹ Zambi, ni ufwatulo wenyi, kaakwashiha ngwe kangonga wa tachi.

¹⁰ Yivulumunyi kaakuteta ni kubwozonoka ngwe tambwe, alioze Zambi kakwaholesa ni kwabukwola mazo.

¹¹ Kaakufwa ngwe tambwe, waze keeshi ni yakulia; kaakufwa, ni ana jo eswe kaakumwangana.

¹² Limwe tangwa yingwivwa hwe, limwe liji likepe.

¹³ Yilibwa ngwe chilota chikalu chize chakutungumuna mutu ha tulo.

¹⁴ Yingwivwa mwongo, mujimba wami weswe yiuchikima.

¹⁵ Kafuji kakepe yikanguhehukila ha huma, yingwivwa lwaji.

¹⁶ Yingumona ngwe mutu unamana, alioze yichibwa chikalu ha kumunyingika. Mba yingwivwa liji ngwo:

¹⁷ “Mutu mahasa kubwa mukwa ululi ku meso ja Zambi, nyi? Hanji mutu mubema ku meso ja yoze wamutangile, nyi?

¹⁸ Chibwe tuvumbi twenyi a mwilu, Zambi keshi kwafuliela.

¹⁹ Unanyongo ngwe, mafuliela mutu wa uma, mukwa fufuta yoze Zambi maliata ngwe ndulu, nyi?

²⁰ Mutu mahasa kubwa ni mwono ha chichamene, alioze ku chingoloshi, muze kanda kuchitoka, mafwa; yoze machinyingika wakuhi.

²¹ Yuma yeswe yize ali nayo maayanda, mafwa ni uhepuke wenyi.”