Jobe 20 - Mukanda Wa Zambi 1970

Zofare

^1-2 Jobe, kubiha ngunevu; kashika Changutamba kukumbulula.

³ Hiwangushililika, alioze ngunanyingika chize mungukwamba.

⁴ Unanyingika, chize ku shakulu, muze Zambi asele mutu hano hashi,

⁵ chingulungulu niumwe katwamine ni uwahililo matangwa anji. Uwahililo wa yitanganyanyi uli wa kashimbu wika.

⁶ Chibwe malinangamisa ndoo kwilu, ni mutwe wenyi muuheta ku malelwa,

⁷ hindu kumakanonga ngwe fufuta. Waze te amunyingika maahula ngwo: “Kuli ali?”

⁸ Kumakatoka ngwe chilota, ngwe Usolwelo ha ufuku, kechi kamumona nawa

⁹ Atu keechi kamumona nawa homa haze te akutwama.

¹⁰ Ana jenyi a malunga maakahilwisa yuma yize te akwyia kuli yiswale.

¹¹ Mujimba wenyi wa tachi ngwe mukweze, alioze shimbu likepe muwalumuka fufuta.

^12-13 Ungulungulu kuwayema mu kanwa lienyi, kakwivwa kuwaha kuusweka mu kanwa.

¹⁴ Alioze yakulia muyalumuka yisasu mu lufu wenyi, mu jimo lienyi muyalumuka utende wa chihili.

¹⁵ Chingulungulu kakusaza ubite uze eyile, Zambi kakuuchiza mu jimo lienyi.

¹⁶ Chize chingulungulu akuminya chili ngwe utende wa chihili, we utende muukamushiha.

¹⁷ Kechi kamona njiji ja maji a olive, chibwe mihwiji ya wuchi ni yamwa.

¹⁸ Kumakahilwisa fweto ya kuhondangana chenyi, kechi kawahilila nayo,

¹⁹ mumu wamwesene yiswale lamba, kaatalile ko, yatambula mazuwo waze katungile ko.

²⁰ Zala yenyi kuyishi kuhwa.

²¹ Muze akulia keshi kuhichika nichimwe, kashika yiwape yenyi kuyichi kalinduluka.

²² Muze mabwa ni yuma yinji yahiana mabutuka kuyindama, susumuku lamba mulimulundumukina.

²³ Kuheshi Chuma, alie kwenyi ngwe chize anazange, Zambi makamumwesa lamba ni utenu wenyi weswe.

²⁴ Muze meseka kuchina mukwale wa utale, mwivi wa unengu muumutuwa ndusu.

²⁵ Mautomona mu mujimba wenyi songo liawo liakaulejima, mulituhuka mu kasashisa kenyi, mwongo hiwamukwata kuhiana!

²⁶ Yuma yeswe yize hanalitulikila muyitoka; iye ni akwa jiko lienyi eswe maakanonga mu kahia kaze kakawikile ko kuli mutu.

²⁷ Lilu mulisolola shili yenyi, ni hashi muhamusuma mulonga.

²⁸ Ubite wenyi weswe muutoka, muze Zambi mevwa ufwatulo.

²⁹ Yenayo Zambi anaswekela yingulungulu, lie lamba lize Zambi hanaabatwila.