Jobe 19 - Mukanda Wa Zambi 1970

Jobe

^1-2 Tangwa lika munukecha kungubinjisa ni kungubalwola mutwe ni maliji jenu?

³ Yisuho kumi hinwangushililika; kunushi kwivwa sonyi chize nunangulelesa.

⁴ Chibwe nalingile yibi, mba yinanutale nyi?

⁵ Yenu nunanyongo ngwenu, nunanguhiana yami; nunambe ngwenu, ngunamono lamba mumu navulumwine.

⁶ Nyingikenu ngwenu, Zambi hangulinga chibi, ni kungulimba mu Wanda wenyi!

⁷ Ngunakololoka ngwami: “Kanangushihi!” Alioze kumbululo liakuhi. Niumwe keshi kwivwa kuteta chami ngwami, angubatwile kama ni ululi.

⁸ Zambi hangujikila jila, chahashile kubalika; hasweka jila yami mu milima.

⁹ Hanguchiza ubite wami weswe; hanguchiza lufuma wami.

¹⁰ Kanangumwesa lamba sali ni sali. Hanguchiza yuma yize nasele mbunge, ngunafu kwami.

¹¹ Zambi kananguvwila ufwatulo; kanangwalula ngwe nguli mukwa kole yenyi.

¹² Hatuma tujita twenyi ni kulimika ni yami; haajingilika zuwo liami.

¹³ Zambi hashinjika anakwetu angwehuke, hinabwa ngeji kuli eswe waze angunyingika,

¹⁴ usoko wami ni masepa jami hangwehuka.

¹⁵ Waze te akulia mu zuwo liami haanguvulama; tuvumbi twami a mapwo kaanangumono ngwe nguli ngeji, hanji kandaka.

¹⁶ Muze nakutambika kavumbi kami, keshi kungukumbulula, chibwe ngumulembejeke angukwase, hindu keshi kuzanga.

¹⁷ Pwo liami keshi kuzanga kwivwa vumba lia mu kanwa liami, chibwe waze nasemuka no kuli mama, keeshi kuzanga kungukundama.

¹⁸ Chibwe ana kaakunguseha, muze anangumono maangutuka.

¹⁹ Chibwe masepa jami kaakunguvwila lwaji, waze nakuzanga kuhiana, keeshi kunguzanga.

²⁰ Hinawangama kuhiana, hinasala yifwaha, hasala hakepe ngufwe kwami.

²¹ Nguvwilenu kama keke, yenu nuli masepa jami, mumu kwoko lia Zambi hiliangulamba.

²² Mumu yika nunanguhungumiona ngwe chize anangulingi Zambi? Ni haliabwila kujanuhwile ni kungumwesa lamba, nyi?

²³ Kachi umwe mutu mewuluka maliji jami, ni kwasoneka kama mu mukanda!

²⁴ Hanji kwoola kanawa ha liwe ni shizo, asoneke kanawa, hanga atwame ndoo ku miaka yeswe.

²⁵ Alioze ngunanyingika ngwami, mwilu hako liami ulimo; limwe tangwa mamana hano hashi nikuhanjika liji liakusula.

²⁶ Chibwe yikola hiyalialia mujimba wami, hindu mu mujimba unowene mungukamona Zambi.

²⁷ Mungumumona ni meso jami; neyo kechi kubwa ngeji. Mbunge yami yalezumuka mumu nwakwamba ngwenu:

²⁸ “Ngwe kuchi mutumumwesa lamba?” Yinufupa mana akuhamika ni yami.

²⁹ Alioze haliabwila ivwenu woma wa mukwale wa Zambi, mukwale uze wakumwesa lamba yingulungulu, hanga nunyingike ngwenu, ngaji kwali yoze mabatwila atu.