Jobe 17 - Mukanda Wa Zambi 1970

¹ Songo lia mwono wami hiliakundama; matangwa jami haahwa, chuma changusala ko lume kufwa.

² Akwa kungukekuna kaanangujikinyina, ngunatale nee chize ananguchoko.

³ Zambi ngutumbikile chifungo yena mwene. Mukwo iya mangufwetela tombo?

⁴ Yena hiwaasulisa mu mana, kuuchi kwatayiza kukumba.

⁵ Makulwana haanate chishima ngwo: “Umwe mutu hanalanjisa masepa jenyi ni mbongo, mba ana jenyi yaamona lamba.”

⁶ Atu kaanangutela chishima chino; kaaneza ni kungufwila mate ku meso.

⁷ Meso jami haalaa ni chinyengo; moko jami ni molu haasala yifwaha.

⁸ Atu waze akulinyonga ngwo, akwa ululi, kaanalishimwoka. Eswe kaananguhisa ngwo, nguli chitanganyanyi,

⁹ waze akwamba ngwo, kaali akwa mbunge jitoma, enoo anangumono yibi.

¹⁰ Alioze nyi ngwe eswe kaanamana ku meso jami, chichi kumona chibwe umuwika mukwa mana.

¹¹ Matangwa jami haahwa, yize yeswe te nakunyonga hiyalela; chishi kusako nawa mbunge.

¹² Alioze masepa jami kaanambe ngwo: “Milima yili pangu.” Nawa ngwo: “Tangwa hiliabwa hakamwihi.” Alioze ngunanyingika ngwami, nguli lume mu milima.

¹³ Ngunase mbunge yami muma mwa afu, mwenamo mungukabomba kwami mu milima.

¹⁴ Munguvuluka muma mwa afu “Tata.” Mavuno waze maakangulia mungwavuluka “Mama, ni Mandumbu jami.”

¹⁵ Kwe mungusa nawa mbunge kulihi? Hanji nguli nawa ni mana akusako mbunge, nyi?

¹⁶ Muze mungupalumuka muma mwa afu, chichi kusa ko nawa mbunge, ngubwe ni yuma yibema.