Jobe 14 - Mukanda Wa Zambi 1970

¹ Mutu kali wa matangwa akepe; kakumona lamba linji.

² Kakutemuka ni kuuma ngwe chitemo; kakuchina ngwe chizulie, keshi kulinduluka.

³ Zambi yena muumutala, nyi? Muumutwala ku ubatwilo ni kumusopesa, nyi?

⁴ Iya mahasa kuchiza chuma chibema mu chuma chibi ngwe mutu? Nimwe.

⁵ Hiunamusela kulu matangwa ni tukweji twenyi; hiunachibatula, niumwe mahasa kuchalumuna.

⁶ Zambi kanda muutala, mweche ukawenyi, hanga amanunune uhwahililo matangwa jenyi a kuhondangana.

⁷ Mutondo, nyi haaupakula, kuwakusoka nawa.

⁸ Miji chibwe hiyoma kushi lia mavu, ni lie shina liawo hiliabola,

⁹ nyi hiyabwa ni meya muyisokoloka nawa.

¹⁰ Alioze mutu nyi hafwa, kukwahwa lume. Muze hasutuka kulihi akuya?

¹¹ Ngwe chize lwiji ni meya a mu chitende akuma,

¹² chimuwika nawa atu kaakufwa. Hikeechi kuhinduka nawa, keechi kulaula, chibwe kukasumuka ndoo lilu mulihwa.

¹³ Zambi chinalite kachi ungusweke kama muma mwa afu, ngukaswame mo ndoo ufwatulo we muukahwa, mba ngwiwuluke kama.

¹⁴ Alioze nyi mutu mafwa, kumahinduka nawa, nyi? Ha matangwa jami eswe a kuhondangana chami mungukasa ko mbunge ndoo ku kutusuka chami.

¹⁵ Mba muukangutambika, mungukataya; muukazanga kungumona yami mutu we yoze watangile.

¹⁶ Mba muukatala shimbo jami jeswe, kuuchi kalula nawa milonga yami.

¹⁷ Muukanguvwila keke, muukavulama milonga yami yeswe liakulu.

¹⁸ Tangwa mulikeza milundu muyikabuzuka, mawe anene anene kumaakakatuka mu yihela yo.

¹⁹ Meya kaakukosa mawe, ni mihwiji kuyakuhungumuna mavu, chimuwika ni yena wakwonona chize mutu akusa mbunge.

²⁰ Muukumba mutu, muumuhanga ndoo ku miaka yeswe; meso jenyi maalumuka mu kufwa.

²¹ Ana jenyi maabwa ni lufuma, alioze kuchinyingika ka, ni atu keechi kumulweza nyi ana jenyi kaakulinga yuma ya sonyi.

²² Mevwa lume lamba lia mujimba wenyi mwene, ni chinyengo cha mbunge yenyi.