Jobe 1 - Mukanda Wa Zambi 1970

Sakwonga yeseka Jobe

¹ Yikubwa umwe lunga wa ku chifuchi cha Uze, jina lienyi Jobe. Te mutu mubema, mukwa ululi, yoze walemesene Zambi, walifungile ku yibi.

² Yabwa ni ana shimbiali a malunga, ni ana a mapwo atatu.

³ Yabita mapanga 7,000, ni tumelu 3,000, ni ngombe 1,000, ni yimbulu 500. Yabwa nawa ni ndungo anji. Te pichi kuhiana akwo eswe ku chivumbuko.

⁴ Ana jenyi a malunga te kaakulialia yiteleka, tangwa mu zuwo lia yeu tangwa mu zuwo lia yeu, mba te kaakulakenya mandumbu jo eze akalie ni akanwe no hamuwika.

⁵ Muze matangwa a yiteleka haamanunuka, Jobe malimeneka ni kulambula milambu yakwocha hali mwana mweswe ni kwaabemesa, mumu Jobe yanyonga ngwenyi: “Hanji ana jami haavulumuna, hanji haatuka Zambi, te kaachizangile.” Chino te kakuchilinga matangwa eswe.

⁶ Limwe tangwa, tunganda twa mwilu yeeza ku meso ja Mwene Zambi, Sakwonga neye yabwa mukachi ko.

⁷ Mwene Zambi yamuhula ngwenyi: “Kulihi unakatuka?” Sakwonga ngwenyi: “Ni kwendangana hashi ni kujingajinga ho.”

⁸ Mwene Zambi ngwenyi: “Kuchi, hiunashishika kavumbi kami Jobe, nyi? Hashi kuheshi mukwo yoze alifwa nenyi. Kali mutu mubema, mukwa ululi, yoze wakungulemesa, kakulifunga ku yibi.”

⁹ Sakwonga ngwenyi: “Kuma Jobe makuwayila chamokomoko, chibwe katambwile ko Chuma nichimwe, nyi?

¹⁰ Ngwami yena wakumufunga ni ana jenyi, ni yuma yenyi yeswe. Wakumuwahisa mu yuma yeswe yize akulinga, hiunamwehe nawa yimuna anji, haanalimwange mu chifuchi cheswe.

¹¹ Alioze nyi wamutambula yuma yeswe yize ali nayo, kachi kumakulelesa.”

¹² Mwene Zambi yamukumbulula ngwenyi: “Kuheshi Chuma, yuma yenyi yeswe yili mu moko je, alioze iye mwene kanda umukwata.” Mba Sakwonga yaya kwenyi.

Kufwa cha ana ja Jobe, ni akwa milimo, ni yimuna

¹³ Limwe tangwa, muze ana ja Jobe te anali chiteleka mu zuwo lia yayo,

¹⁴ yikwiza umwe kanganda fuji ni kulweza Jobe ngwenyi: “Twalimanga ni ngombe mu minda, ni yimbulu te kaanali mwambu hehi ni yetu.

¹⁵ Susumuku Asebeane alundumukanga ni kwanda yimuna yeswe, kaashiha akwa milimo eswe, shina yami wika nachina, hineza ni kukulweza.”

¹⁶ Shimbu te machihanjika, mukwa milimo mukwo yaheta, yamba ngwenyi: “Njaji hashiha mapanga ni tufunga, eswe haafwa. Shina yami wika nachina, hineza ni kukulweza.”

¹⁷ Shimbu te machihanjika, mukwa milimo mukwo yaheta, yamba ngwenyi: “Mbunga jitatu ja Akaldea alundumukanga ni kutuzwelesa, haambata tumelu eswe, haashiha akwa milimo je eswe, shina yami wika nachina, hineza ni kukulweza.”

¹⁸ Shimbu te machihanjika, mukwa milimo mukwo yaheta, yamba ngwenyi: “Ana je eswe kaabwanga mu zuwo lia yayo nikulia chiteleka.

¹⁹ Chijimbi chinene chakatukanga ku puya, yichiwuzula zuwo, ana eswe haafwa, shina yami wika nachina, hineza ni kukulweza.”

²⁰ Jobe yakatuka, yatanuna nahina jenyi ni chinyengo. Yatewula kawewe, yafulamana,

²¹ yamba ngwenyi: “Uselesele nasemukine, uselesele munguhiluka nawa. Mwene Zambi iye mwene wanguhele, hayitambula nawa. Jina lienyi lifumane!”

²² Jobe, chibwe lamba lize lieswe liamuwanyine, kavulumwine ko, kasumine ko Zambi mulonga.